Zumanɔ 25 - WE NU GALE 1995

Sambala we gɔ mbɔkɔ wi kɔ̃ Gale

1 Zuma 'da Davidi

¹ Zuma 'da Davidi Aa NWA, mi siki li mi dɛ 'da mɔ.

² Aa Gale 'da mi, mi gbini zã mi do mɔ, mɔ tɛ ha sape hã mi gɔ. Mɔ tɛ là owi sɛnɛ mi, hã wa nɛ ngɔ mi gɔ.

³ Owinɔ kɛ wa gbini zã wa do mɔ ni, mbe kpo sanga wa sá sɛ tɛ̃ ɛ gɔ. Nɛ nde wanɔ kɛ wa bɛ̃ we nu mɔ ni, wa kpa sɛ sape, nɛ wa 'bana sɛ do wila kɔ̃ wa.

⁴ Aa nwa, mɔ bé wala kɛ mɔ kɔ̃a na, mi ba do ma ni hã mi.

⁵ Mɔ bé mbula 'da mɔ hã mi, takɔ mi ĩ ti gbãlã we 'da mɔ, we kɛ wi kpasa mi, wi a mɔ Gale. Mi gbini zã mi do mɔ 'da fala fai.

⁶ Aa NWA, ta zu mɔ tɛ èlè na, mɔ a dia wi, nɛ mɔ a wi kɔ̃a zã ni gɔ.

⁷ Mɔ fó 'dã mɛnɔ kɛ mi dɛa zi ma, nɛ nde mi 'bana do be zagbãlã ni. Nɛ mɔ tɛ lènggè do bɛ̃a we kɛ mi bɛ̃a zi nu mɔ ni gɔ. Mɔ lénggé mi ɔ dia fai, we kɛ mɔ NWA, mɔ do dia zã wena.

⁸ NWA Gale bia wala hã o'dã winɔ, we kɛ a de wena, nɛ a a wi bɔlɔ zu.

⁹ A be bɔlɔ wala hã Owi dia sila na, wa ba do ma.

¹⁰ A kɔ̃a gɛnɛ owinɔ kɛ wa dɛ mbula 'da a, nɛ wa dɔnggɔ gba tɔkɛ 'da a ni. A dɛ olo nu a hã wa, nɛ a kã wa li dia wala.

¹¹ Aa NWA, 'dã mɛnɔ 'da mi, ma dɔ wena, kɔ mi aka mɔ na, mɔ fo ma zu mi do'do, we lengge do dɔ̃lɔ̃ li 'da mɔ.

¹² Fala kɛ wele dɛ kili mɔ NWA, nɛ mɔ be li wala kɛ a wia we ba do ma ni hã a.

¹³ Nɛ wi ni kpa dia dungu, nɛ obe zã a wa ba nùi do mɔ wa.

¹⁴ NWA, mɔ dɛ na do owinɔ kɛ wa yu kili mɔ yu ni, nɛ mɔ gba ta zu wa ngɔ gba tɔkɛ 'da mɔ do wa.

¹⁵ Mi siki li mi fai dɛ 'da mɔ NWA, we kɛ mɔ gbaka sɛ mi kɔ ngamɛ kɛ mi kpa ma ni.

¹⁶ Aa NWA, mɔ ĩ́ 'bako hã mi, nɛ mɔ siki li mɔ dɛ 'da mi, we kɛ mi do wele bina, nɛ mi a wi 'bako.

¹⁷ Mɔ fó linggamɔ kɔ sila mi do'do, nɛ mɔ kpásá mi kɔ zɛlɛ tɛnɔ kɛ mi kpa ma gɛ.

¹⁸ Mɔ lénggé do 'bako 'da mi, nɛ mɔ zɔ ngamɛ 'da mi, nɛ mɔ fó ku'da 'dã mɛnɔ vɛ̃ zu mi do'do.

¹⁹ Mɔ zɔ́ Owi sɛnɛ mi, kɛ wa dɛlɛ nɛ ge nde gɛ. Nɛ mɔ zɔ́ 'bɔ tɛlɛ tɛ kɛ wa sɛnɛ do mi ni.

²⁰ Mɔ zɔ́ mɔ tɛ mi, nɛ mɔ kpásá mi ti kɔ wa. Mi ia mɔ do wi amba zu mi, kɔ mɔ tɛ ha sape hã mi gɔ.

²¹ E kɔ bɔlɔ zui 'da mi do dia dɛa to tɛ mi, ma amba zu mi, we kɛ mi gbini zã mi do mɔ NWA.

²² Aa Gale, mɔ gɔ́nɔ́ zu obe Israɛlɛ, nɛ mɔ fó wa kɔ ngamɛnɔ, kɛ wa kpa ma gɛ do'do.