Zumanɔ 22 - WE NU GALE 1995

Gale 'da mi, mɔ bɛ̃a gɛnɛ mi we ge nde?

¹ Zuma 'da Davidi

² Aa Gale 'da mi, Gale 'da mi, mɔ bɛ̃a gɛnɛ mi we ge nde? Mi hia mɔ ala nu hã mɔ na, mɔ gbaka mi. Nɛ nde mɔ yula ndũu do mi, nɛ mɔ tɛ̃ we gbaka mi gɔ.

³ Do gba wese, nɛ mi sa mɔ hã mɔ, Gale 'da mi, nɛ nde mɔ kɔ̃̀ nu mi gɔ. Nɛ do tũi, mi sa 'bɔ mɔ hã mɔ fai, nɛ mɔ kɔ̃̀ 'bɔ nu mi gɔ.

⁴ Mɛ ni, nɛ nde mɔ a Gale santo, kɛ lɛ obe Israɛlɛ, lɛ dɔnggɔ mɔ. Mɔ dungu nwa dɛ sanga lɛ.

⁵ Oyaa lɛ wa gbini zi zã wa do mɔ, nɛ mɔ amba zi zu wa.

⁶ Wa zɛa zi nu wa hã mɔ, nɛ mɔ fua wa kɔ ngamɔ. Wa gbini zi zã wa do mɔ, nɛ mɔ bɛ̃̀ gɛnɛ wa gɔ.

⁷ Nɛ nde kɛ 'da mi, mi a wele gɔ. Owinɔ wa zɔ mi li wa ɔ nɛ tɔlɔfɛ iko ni. Owinɔ wa dã mi, nɛ wa bɛ̃a gɛnɛ mi.

⁸ Owinɔ vɛ̃ kɛ wa zɔ mi ni, wa nyɛ nu wa, nɛ wa yaka zu wa, nɛ wa la do mɔmu.

⁹ Nɛ wa tɔ̃ hã mi na: “Mɔ ia kpasi 'da mɔ dɛ kɔ̃ nwa, kɔ gulu kɛ a gbáká mɔ gɔ we ge nde? NWA kɔ̃a gɛnɛ mɔ, kɔ gulu kɛ a kpásá mɔ gɔ we ge nde?”

¹⁰ Aa NWA, mɔ a mɔ fua zi mi kɔ zã naa mi dɛ nza, nɛ mɔ zɔa zi mɔ tɛ mi, do 'da fala kɛ mi zi a nzɔ be ni.

¹¹ Wa kua zi mi nɛ́, nɛ wa ia mi hã mɔ, nɛ mɔ a Gale 'da mi fai.

¹² Mɔ tɛ là mi ndũu gɔ, mba gɔ, ngamɔ ma kɔlɔ do mi dɔ̃ɔ, nɛ nde fo wi gala mi bina.

¹³ Owi sɛnɛ mi wa linggi mi ɔ nɛ owili ngɔmbɔ ni. Wa tɛa dɛ kɛ zã mi ɔ nɛ odã yele ni.

¹⁴ Wa 'bã nu wa dɛ tɛ mi, nɛ wa he mɔ we ɛ̃ sanga mi, ɔ nɛ kɛ wa a ogbɔgbɔ ni.

¹⁵ Ngawi 'da mi ma yu, nɛ ma la ɔ nɛ lì kɛ wa a nù ni. Gbãlã tɛ mi ma gbini vɛ̃, nɛ sila mi 'bɔa do'do, mi wè 'bɔ tɛ yolo ngɔ gɔ.

¹⁶ Kɔ gɛlɛ mi kula kparr, nɛ lɛfɛ mi nãlã dɛ kɔ langgala mi. Mɔ la mi na, mi fe, hã mi le ti nù.

¹⁷ O'dã winɔ wa mba ngba wa, nɛ wa zĩ mi takpa ɔ nɛ o'dã tolo ni. Wa ɛnzɛ kɔ̃ mi do nyanga mi.

¹⁸ Mi ɔkɔ wena, gbãlã tɛ mi hɔa nza vɛ̃, nɛ nde Owi sɛnɛ mi, wa zɔ mɔ tɛ mi do li wa iko.

¹⁹ Wa tua zeke ngɔ tulunɔ 'da mi, nɛ wa kɛ̃a sanga nɛ dɛ kɔ̃ wa.

²⁰ Nɛ nde mɔ NWA, mɔ tɛ là mi ndũu gɔ. Ngawi 'da mi wi a mɔ, mɔ tɛ́ dɔ̃, hã mɔ gbaka mi.

²¹ Mɔ ámbá zu mi li gogo otolonɔ ni, nɛ mɔ kpasa mi li du kɔya 'da wa.

²² Mɔ fó mi kɔ nu ogbɔgbɔnɔ ni, nɛ mɔ kpasa mi li zamba zu oyelenɔ.

Zuma we dɔnggɔ do Gale

²³ Mi tɔ̃ sɛ lɛnggɛ mɛnɔ kɛ mɔ dɛa ma ni hã onya mi, nɛ mi dɔnggɔ sɛ mɔ dɛ sanga ogba dɔa winɔ.

²⁴ Aa nɛ, owi dɛa tonɔ 'da NWA, nɛ sámbálá a. Aa nɛ, obe zã Yakɔbɔ, nɛ yú kili a. Aa nɛ, obe Israɛlɛ, nɛ dɔ́nggɔ́ a.

²⁵ Mba gɔ, a bɛ gɛnɛ wi 'bakonɔ gɔ, nɛ ta zu a èlè ngɔ ngamɛ 'da wa gɔ. Wa sa mɔ hã a, nɛ a zila gɛlɛ wa, nɛ a ùsù li a hã wa gɔ.

²⁶ Aa NWA, mi dɔnggɔ mɔ dɛ sanga gba gili owinɔ, we duzu mɛnɔ kɛ mɔ dɛa ni. Mi dɛ sɛ mbuli kɛ mi kpua ma hã mɔ ni, dɛ dati owinɔ wa yu kili mɔ yu ni.

²⁷ Mi sa sɛ mɔ hã owi sãnɔ, nɛ wa nyɔngɔ mɔ, nɛ zã wa hɛ̃. Owinɔ kɛ wa fa mɔ NWA ni, wa dɔnggɔ sɛ mɔ, nɛ tũ kɔ̃ wa ma dɔ sɛ ngɔ nù gɛ, nɛ wa kpa sɛ dia dungu.

²⁸ Ta zu owinɔ ngɔ nù gɛ vɛ̃ ma gba sɛ ngɔ mɔ NWA, nɛ wa kpolo sɛ tɛ wa 'da mɔ. Nɛ nu kpala winɔ vɛ̃, wa bili sɛ zu wa nù dati mɔ, nɛ wa dɔnggɔ sɛ mɔ.

²⁹ Aa NWA Gale, mɔ a nwa, mɔ a nwa ngɔ onu kɔnggɔ winɔ.

³⁰ Owi kpamɛnɔ ngɔ nù gɛ vɛ̃, wa bili sɛ zu wa nù dati mɔ. Owinɔ kɛ wa fe fio fia ni, wa dɔnggɔ sɛ mɔ zu mɔ kpo.

³¹ Nɛ obe zã wa, wa dɛ sɛ to hã mɔ NWA, nɛ wa tɔ̃ sɛ lɛnggɛnɔ 'da mɔ hã obenɔ 'do wa ni.

³² Mɛnɔ kɛ NWA mɔ dɛa ma, we kpasa do owinɔ 'da mɔ ni, wa tɔ̃ sɛ lɛnggɛ nɛ hã obenɔ, kɛ wa tɛ zɔ̃ nza gɔɛ ni.