Zumanɔ 21 - WE NU GALE 1995

Nwa 'da lɛ gbini zã a do Gale

¹ Zuma 'da Davidi

² Aa NWA Gale, nwa 'da lɛ dɛ yangga, we kɛ mɔ hã ngawi hã a. Mɔ gala a we nɛ ngɔ wi sɛnɛ a, nɛ ma dia tɛ̃ a nɛ ge nde ni.

³ Mɛnɔ kɛ a ia wɔ nɛ kɔ sila a ni, mɔ hã ma hã a. Nɛ mɛnɔ kɛ a aka ma kɔ̃ mɔ ni, mɔ bɛ we hã ma hã a gɔ.

⁴ Mɔ tɛa dɛ 'da a, nɛ mɔ wila nu mɔ tɛ̃ a, nɛ mɔ ba ndasa nwa, nɛ mɔ gu ma zu a.

⁵ A aka zi mɔ na, a ɔ do kpasi, nɛ mɔ hã ma hã a, nɛ mɔ gbala 'da dungu nza 'da a, nɛ 'do a nyɛlɛ ngɔ nù gɛ wena.

⁶ Mɔ gala a, nɛ a hɔa gã wi, nɛ sako li a dɔ̃lɔ̃ ngɔ nù gɛ vɛ̃.

⁷ Mɔ wele nu mɔ tɛ̃ a 'da fala fai. Mɔ dungu dɛ kɛ zã a, nɛ ma hã yangga hã a.

⁸ Mɛ a gbãlã we, nwa 'da lɛ gbini zã a do mɔ NWA Gale. A wè tɛ mbɔkɔ nɛ gɔ, we duzu gã dia zã 'da mɔ Gale, kɛ mɔ nɛa ngɔ mɔ vɛ̃ ni.

⁹ Nwa 'da lɛ a kala sɛ owi sɛnɛ a, nɛ kɔ̃ a ma kpa sɛ tɛ wa vɛ̃.

¹⁰ Ngba soe kɛ mɔ NWA Gale mɔ hɔ, nɛ mɔ bɛlɛ sɛ owinɔ ni ɔ nɛ we ni, nɛ mɔ yɔ'dɔ sɛ wa do dã, nɛ we ma bɛlɛ sɛ wa vɛ̃.

¹¹ Nwa 'da lɛ a mbiti sɛ obe zã wa, nɛ a kumu sɛ nu kpala wa, nɛ a fo sɛ wa ngɔ nù gɛ do'do.

¹² Wa ba zã zu we, nɛ wa 'dafa 'dã mɔ we dɛ ma do nwa 'da lɛ, nɛ nde wa kpá sɛ li nɛ gɔ.

¹³ Mba gɔ, a ndɔlɔ sɛ wa do kpili 'da a, nɛ wa kpolo sɛ tɛ wa do yu.

¹⁴ Aa NWA Gale, mɔ kúlú ngɔ, hã mɔ be gã ngawi 'da mɔ, nɛ lɛ ga sɛ zuma hã mɔ, we duzu gba mɛnɔ kɛ mɔ dɛa ma ni.