Zumanɔ 20 - WE NU GALE 1995

Wa sambala Gale we duzu nwa

¹ Zuma 'da Davidi

² E kɔ nwa gese nu we hã mɔ, do 'da fala kɛ mɔ kɔ ngamɔ ni. E kɔ Gale 'da Yakɔbɔ zɔ mɔ tɛ mɔ.

³ E kɔ a yolo kɔ Tɛmpɛloe 'da a, kɔ a tɛ we gala mɔ. E kɔ a kulu ngɔ tɛ ngɔ kala Sioni, nɛ a yolo gba sala 'do mɔ.

⁴ E kɔ ta zu a gba ngɔ mɛnɔ vɛ̃, kɛ mɔ dɔnggɔ do a ni, nɛ a kɔ̃ gɛnɛ osa'denɔ kɛ mɔ dɔ ma hã a ni.

⁵ Mɛnɔ kɛ mɔ kɔ̃a gɛnɛ nɛ ni, e kɔ a hã ma hã mɔ, nɛ a dɛ 'bɔ na, mɛnɔ vɛ̃ kɛ mɔ 'dafa we dɛ ma ni, ma Sɔkpɔ do dia nɛ. E kɔ a dɛ mɛnɔ vɛ̃, kɛ mɔ aka a we nɛ ni hã mɔ.

⁶ Na mɛ ni, nɛ lɛ zɛ sɛ kɔ̃ lɛ, we duzu kɛ a gala mɔ, nɛ mɔ nɛa ngɔ Owi sɛnɛ mɔ ni. Nɛ lɛ ba sɛ bɛndɛlɛ dɛ ngɔ we dɔnggɔ do zu li a Gale 'da lɛ.

⁷ Ngangga ni, mi ĩ na, NWA Gale a gala nwa 'da lɛ, wele kɛ a saka a ni. A zele sɛ gɛlɛ a, tɛ fala santo 'da a li nza i, nɛ a gese nu we hã a. A be ngawi 'da a, nɛ a dɛ gba mɔ, nɛ a kpasa a.

⁸ Ombe winɔ wa gbini zã wa do ngilingili bolonɔ 'da wa. Nɛ ombee nɛ wa gbini zã wa do ombalatanɔ 'da wa. Nɛ nde lɛ, lɛ gbini zã lɛ do ngawi 'da NWA Gale 'da lɛ.

⁹ Owinɔ ni wa zɔlɔ, nɛ wa te, nɛ nde lɛ, lɛ ngua tɛ lɛ, nɛ lɛ 'bana ngɔ.

¹⁰ Aa NWA Gale, mɔ gálá nwa 'da lɛ, hã a nɛ ngɔ owi sɛnɛ a. Nɛ fala kɛ lɛ sa mɔ hã mɔ na, mɔ gbaka lɛ, nɛ mɔ kɔ̃̀ nu lɛ.