Zumanɔ 19 - WE NU GALE 1995

¹ Zuma 'da Davidi

² Omɛnɔ li nza gɛ vɛ̃, ma be dɔ̃lɔ̃ li 'da Gale. Osɔlanɔ ngɔ gɛ, ma be hã lɛ na, Gale ngboo a dɛa ma.

³ Wese kpo do kpo tɔ̃ we dɔ̃lɔ̃ li ni, nɛ ma mbese wese kɛ ma hɔ sɛ 'do ma ni, nɛ tũ kpo do kpo tɔ̃ 'bɔ 'da nɛ. Ma tɔ̃ 'da nɛ hã mbé tũi kɛ ma hɔ sɛ ni.

⁴ Mɛ a wila we tabi olɛnggɛ, takɔ wele zele do zala ɛ gɔ.

⁵ Nɛ nde sako nɛ yɛnggɛ ngɔ nù gɛ vɛ̃, nɛ nyanga nza vɛ̃ zele ma. Gale dɛa tɔa hã wese, nɛ a ia ma tɛ li nza i.

⁶ Do titole, nɛ wese gba do yangga, nɛ ma ɔ nɛ wi ba mbé ko, kɛ a hɔ nza kɔ tɔa ɔi 'da a ni. Ma hɔ do yangga ɔ nɛ wi dɛa to, kɛ a e kɔ̃ a tɛ toe kɛ ngɔ sila a ni.

⁷ Wese hɔ nza tɛ ndɔti nùi, nɛ ma nɛ gbaa, nɛ ma bi tũ tɛ mbee nɛ. Mɔ kpo úsú tɛ̃ ɛ li wese gɔ.

Dɔ̃lɔ̃ li 'da Gale Mbula 'da NWA

⁸ Mbula 'da NWA zɔ̀lɔ̀ mɔ kpo gɔ, ma hã mbé ngawi hã lɛ. Bia wenɔ 'da NWA mɛ a gbãlã we, ma hã hã zã hã owinɔ wa zɔlɔ ma ni.

⁹ We nu NWA ma a bɔlɔ, ma hã yangga kɔ sila wele. Mbulanɔ 'da NWA ma a sa, ma gbaka wele na, li a fĩ.

¹⁰ Dɛ kili NWA mɛ a dia mɔ, nɛ wa 'bana sɛ dɛ kili a fai. NWA 'bili wenɔ do gulu nɛ, nɛ a dɛ ma vɛ̃ do bɔlɔ nɛ.

¹¹ Mbulanɔ 'da NWA ma de wena, ma dia nɛa ngɔ mɔ mbali, nɛ ma de 'bɔ nɛ ngɔ mɔ bolo olo gã gole. Ma ɛ̃fɛ̃ nɛa ngɔ nɔ gɔlɔ, nɛ ma ɛ̃fɛ̃ 'bɔ nɛ ngɔ ngele gɔlɔ.

¹² Aa NWA, mɔ zɔ́ mi wi toe 'da mɔ, mi ĩ na, mɔ hã ombulanɔ, takɔ li mi ĩ mɔ. Wi kɛ a dɛ olo nu mɔ, nɛ a kpa sɛ de mɔ.

¹³ Wele vɛ̃ dɛ 'dã mɔ dɛa, nɛ nde a ĩ̀ ti o'dã mɛnɔ, kɛ a dɛ ma ni do wala olo nɛ vɛ̃ gɔ. Kɔ NWA, mɔ fó ku'da 'dã mɛnɔ kɛ mi ĩ̀ fala nɛ gɔ ni zu mi do'do.

¹⁴ Nɛ mɔ tɛ è mi dɛ sanga wi walinɔ gɔ, da dɛ kɔ mi yámbálá wali 'da wa gɔ. Mɔ dɛ́ ni, nɛ nde wa sá sɛ 'bɔ kɔ'da tɛ mi gɔ, nɛ mi sɛ do gã 'dã mɔ bina.

¹⁵ E kɔ mi gbini zã mi do mɔ NWA, nɛ mɔ kɔ̃ sɛ gɛnɛ wila we nu mi, do linggamɔ zu mi. Aa NWA, mɔ a wi amba bolo zu mi, mɔ ɔ nɛ kpangba ta kɛ mi usu kɔ nɛ ni.