Zumanɔ 17 - WE NU GALE 1995

Sambala 'da dia wele

1 Sambala 'da Davidi

¹ Sambala 'da Davidi Aa NWA, mɔ gɛ́ zala mɔ, hã mɔ zélé sa mɔ ala nui 'da mi. Mba gɔ, mi do dia gulu we, nɛ mi sambala mɔ do sila mi kpo.

² Mɔ 'bili we 'da mi, nɛ mɔ gbɛ́ dia gulu nɛ hã mi.

³ Mɔ ĩ ti kɔ sila mi. Mɔ tɛa 'da mi do tũ, nɛ mɔ yamba sila mi, nɛ nde mɔ kpà mi do 'dã mɔ gɔ. Nɛ mi tɔ̃̀ mbe 'dã we kpo,

⁴ ɔ nɛ kɛ owinɔ wa tɔ̃ ni gɔ. Mi dɔngga mbulanɔ 'da mɔ, nɛ mi bà do wala olo wi dɛ ngatɛ gɔ.

⁵ 'Da fala fai, mi ba do li wala 'da mɔ, nɛ mi yɔ nyanga mi gɔ.

⁶ Aa Gale, mi sa mɔ hã mɔ, we kɛ mɔ kɔ̃ sɛ nu mi. Mɔ síkí li mɔ dɛ 'da mi, nɛ mɔ zele wenɔ mi tɔ̃ hã mɔ ni.

⁷ Mɔ bé gã dia zã 'da mɔ hã mi, we kɛ mɔ a wi kɛ mɔ kpasa owinɔ, wa yu Owi zɛlɛ tɛ wa, nɛ wa usu tɛ wa ti kɔ̃ mɔ ni.

⁸ Mɔ fɔ́mɔ́ mi ɔ nɛ kɛ wele fɔmɔ do gbali ɛ ni, nɛ mɔ usu mi dɛ ti sala 'baka mɔ,

⁹ sɛ a mi nyɛlɛ do o'dã winɔ wa bi mi ni de, nɛ Owi sɛnɛ mi wa wé sɛ we gbɛ mi gɔ.

¹⁰ Owinɔ ni wa wele wenɔ do wali, nɛ wa ĩ́ 'bako fala kpo gɔ.

¹¹ Ngangga ni, wa 'bã 'do mi, nɛ wa linggi mi. Wa 'bɔ ni a 'da fala kɛ ma wia na, wa fi mi nù ni.

¹² Wa ɔ nɛ gbɔgbɔ kɛ a nɔ̃sɔ̃ tɛ̃ a we ba sa'de ni. Sila wa ngɔ, nɛ wa 'bɔ na, wa bũlũ dɛ ngɔ mi hã wa ɛ̃ sanga mi.

¹³ Aa nwa, mɔ kúlú ngɔ, nɛ mɔ bí do Owi sɛnɛ mi. Mɔ té do wa, nɛ mɔ nɛ́ ngɔ wa. Mɔ fó mi ti kɔ̃ o'dã winɔ do'do.

¹⁴ Aa nwa, mɔ bá du kɔya 'da mɔ hã mɔ gbɛ́ do wa. Mɔ mbítí wa ngɔ nù gɛ do'do. Mɔ hã etumbui mɔ usu ma we wa ni hã wa. Nɛ mɔ hã́ ma gã wena, nɛ ma kpa kɔ̃ obe zã wa do obe yaa wa.

¹⁵ Nɛ nde we mi, mi zɔ sɛ bula li mɔ, we kɛ mi a wi bɔlɔ zu. Hã fala kɛ mi tunu, nɛ mi dɛ sɛ yangga we zɔ mɔ.