Zumanɔ 16 - WE NU GALE 1995

Yangga do wi kɛ NWA kpasa a

1 Zuma 'da Davidi

¹ Zuma 'da Davidi Aa Gale, mɔ zɔ́ mɔ tɛ mi, mi gbini zã mi do mɔ, we kɛ mɔ a wi amba zu mi.

² Mi tɔ̃a hã NWA na: “Mɔ a NWA 'da mi! Nɛ yangga 'da mi vɛ̃ ma yolo kɔ̃ mɔ.”

³ Mi dɔnggɔ Owi bɔlɔ zunɔ ngɔ nùi gɛ, we kɛ wa do gã dɔ̃lɔ̃ li ngboo.

⁴ Nɛ nde owinɔ kɛ wa nɛ 'dɔkɔlɔ ogele galenɔ ni, wa fa we kpa zɛlɛ tɛ iko. Nɛ nde mi, mi sá sɛ li galenɔ ni gɔ, nɛ mi gbɛ́ sɛ sa'de we dɔnggɔ do wa gɔ.

⁵ Aa NWA, kpamɛ 'da mi vɛ̃, wi a mɔ. Mɛnɔ vɛ̃ kɛ mi zɔlɔ ma ni, mɔ hã ma hã mi, nɛ kpasi 'da mi, ma dɛ tambala kɔ̃ mɔ.

⁶ Mi kɔ̃a gɛnɛ dungi mɔ saka hã mi ni, nɛ odia mɛnɔ kɛ mɔ hã hã mi ni, ma hã yangga hã mi wena.

⁷ Mi dɔnggɔ mɔ NWA. Mɔ a wi tɔ̃ mbula hã mi, nɛ gɛnɛ kɔ do tũ, nɛ sila mi mbese mi ngɔ ma.

⁸ Aa NWA, mi siki li mi dɛ 'da mɔ, nɛ ta zu mi wè tɛ ele ngɔ mɔ gɔ. Mɔ kpo wè tɛ yɛkɛ mi gɔ, we kɛ mɔ dɔ̃ɔ do mi boe ni.

⁹ Gulu nɛ a sila mi do yangga, nɛ mi te salangga ni. Ngamɔ kpo wè tɛ kpa mi gɔ, we kɛ mɔ kele zu mi ni.

¹⁰ Mi a wi kɛ mi dɛ olo nu mɔ NWA, mɔ wè tɛ la mi na, mi fe, hã mi le ti nù, nɛ mi la dɛ kɔ le 'da ofionɔ i gɔ.

¹¹ Mɔ bé wala kpasi hã mi na, mi ĩ ti ma. Fala kɛ mɔ do mi boe, nɛ mi dɛ yangga. Fala kɛ mi ɔ dɛ kɛ zã mɔ, nɛ mi do yangga kɛ ndɔti nɛ bina ni.