Zumanɔ 15 - WE NU GALE 1995

Tɛlɛ tɛ wi kɛ zã Gale kɔ̃a a ni

1 Zuma 'da Davidi

¹ Zuma 'da Davidi Aa NWA, wi wia tɛ le kɔ tɔa Tɛmpɛlo 'da mɔ, wi a wio nde? Wi wia we dɔnggɔ mɔ tɛ ngɔ kala 'da mɔ kɛ ma santo, wi a wio nde?

² Wi a wele kɛ a do 'dã mɔ bina, nɛ a dɛ mɔ kɛ zã mɔ Gale kɔ̃a ni. Nɛ lɛnggɛ nu a mɛ a kɛ ma yula kɔ sila a ngboo ni.

³ A tɔ̃̀ 'dã we mɔ wele gɔ. A 'bílí ngbangga dɛ zu ngba a gɔ. Nɛ a 'dángá 'bɔ dɔ̃lɔ̃ li mɔ́ ngba a gɔ.

⁴ A bɛ̃a gɛnɛ winɔ kɛ Gale bɛ̃a wa ni, nɛ a kɔ̃ gɛnɛ winɔ kɛ wa dɛ kili NWA ni. A kpo mbulu ia, nɛ a dɛ ma. Gɛnɛ kɔ ma hã ngamɔ hã a hã, nɛ nde a kpóló nu a gɔ.

⁵ A kɔ̃̀ na, ɛ kpa ngɔ mbilinɔ kɛ wa ba kɔ ɛ do ku'da ni gɔ. A kɔ̃̀ na, wa 'dɔlɔ omɔ hã ɛ na, ɛ tɔ̃ 'dã we dɛ ngɔ wi bɔlɔ zu gɔ. Wi kɛ a dɛ mɛnɔ gɛ vɛ̃ ni, nɛ nde mɔ kpo yɛ́kɛ́ sɛ a gɔ.