Zumanɔ 149 - WE NU GALE 1995

Owinɔ 'da NWA wa dɔnggɔ a

¹ Aleluya, lɛ dɔ́nggɔ́ nwa! Nɛ gá mbé zuma hã nwa, nɛ dɔ́nggɔ́ a kɔ mba li ngba wi 'da owinɔ 'da a.

² Aa nɛ, obe Israɛlɛ, nɛ dɛ́ yangga, we kɛ wi dɛa nɛ, wi a NWA. Nɛ, owi kɔ le Sioni, nɛ té salangga, we kɛ nwa 'da nɛ, wi a a.

³ Nɛ yɔ́ yɔla we dɔnggɔ do NWA, nɛ zɛ́ biã do kundu hã a.

⁴ Mba gɔ, NWA dɛ yangga owinɔ 'da a, a gala obe winɔ, nɛ wa nɛ ngɔ ngba wa li bolo.

⁵ E kɔ owinɔ 'da NWA wa dɛ yangga, nɛ wa gese iɔ̃nae hã a. E kɔ wa ga zuma yangga hã a do tũ gbaa sa fala.

⁶ E kɔ wa dɔnggɔ Gale dɛ wila fala, nɛ wa 'be du kɔya bole 'da wa dɛ kɔ̃ wa.

⁷ Owinɔ 'da Gale wa bili sɛ gbã hã ogele winɔ, nɛ wa hã sɛ etumbu hã wa.

⁸ Wa kala sɛ Onwanɔ do ogã wi ngɔ ogele winɔ ni, nɛ wa ɛnzɛ wa do dɔkpɔ.

⁹ Owinɔ 'da Gale wa hã sɛ etumbu hã ogele winɔ, nɛ wa dɛ sɛ do wa ɔ nɛ kɛ Gale 'bili ni. Ki ni, mɛ a dɔ̃lɔ̃ li 'da owinɔ 'da Gale vɛ̃. Aleluya, lɛ dɔ́nggɔ́ NWA!