Zumanɔ 146 - WE NU GALE 1995

NWA gala Owi 'bakonɔ

¹ Aleluya, lɛ dɔ́nggɔ́ NWA! Mi dɔnggɔ NWA Gale do sila mi vɛ̃!

² Mi dɔnggɔ sɛ a fai, nɛ mi ga sɛ zuma hã a kɔ dungu nza 'da mi vɛ̃.

³ Nɛ tɛ gbìnì zã nɛ do ogã winɔ gɔ, wa a Owele iko, wa wè tɛ kpasa nɛ gɔ.

⁴ Fala kɛ wa fe, nɛ wa mi wa, nɛ mɛnɔ vɛ̃ kɛ wa 'dafa zi we dɛ ma ni, ma le nù do wa.

⁵ Wi kɛ Gale 'da Yakɔbɔ gala a ni, a a wi yangga. Wi kɛ a gbini zã a do NWA Gale 'da a ni, a a wi yangga.

⁶ NWA dɛa li nza, do nù, do gba lì, nɛ a dɛa 'bɔ mɛnɔ nyanga nza gɛ yerr. Wele wia we gbini zã ɛ do a fai.

⁷ NWA 'bili we do bɔlɔ nɛ hã winɔ, kɛ wa zɛlɛ tɛ wa ni, nɛ a hã nyɔngɔmɔ hã wanɔ wa fe wɔ ni. NWA yala dɔkpɔ tɛ Owi bɔlɔkɔnɔ, nɛ a fo wa dɛ nza,

⁸ nɛ a fi li Owi lɔa linɔ, nɛ wa zɔ mɔ. NWA yolo 'do winɔ wa nɛ te tia ni, nɛ a kɔ̃a gɛnɛ Owi bɔlɔ zunɔ.

⁹ NWA zɔ mɔ tɛ ogele winɔ ngɔ nùi 'da lɛ gɛ, nɛ a gala owi fio wili, do obe gula, nɛ a 'danga wala ti o'dã winɔ.

¹⁰ NWA Gale a nwa fai. A a Gale 'da nɛ, owi Sioni kɔ sabɛlɛ do sabɛlɛ. Aleluya, lɛ dɔ́nggɔ́ NWA!