Zumanɔ 145 - WE NU GALE 1995

¹ Zuma 'da Davidi. A ga ma we dɔnggɔ do Gale. Aa Gale 'da mi, mɔ a Nwa 'da mi. Mi tɔ̃ sɛ dia zu li mɔ, nɛ mi dɔnggɔ mɔ kɔ sabɛlɛ do sabɛlɛ.

² Mi gese sɛ iɔ̃nae hã mɔ tũ kpo kpo, nɛ mi sambala sɛ mɔ fai ndɔti nɛ bina.

³ NWA, mɔ a gã wi, ma wia na lɛ dɔnggɔ mɔ. Gã wi 'da mɔ la mɔ vɛ̃.

⁴ Owinɔ wa tɔ̃ sɛ lɛnggɛ mɛnɔ mɔ dɛa ni, nɛ wa tɔ̃ sako gba mɛnɔ 'da mɔ hã obe zã wa kɔ sabɛlɛ do sabɛlɛ.

⁵ Mi dala sɛ nu mi tɛ tɔ̃ lɛnggɛ gã wi do dɔ̃lɔ̃ li 'da mɔ, nɛ ɔngbamɛnɔ 'da mɔ ma dɛ sɛ zuma nu mi.

⁶ Owinɔ wa tɔ̃ sɛ sako gba mɛnɔ mɔ dɛa ni, nɛ mi tɔ̃ sako gã wi 'da mɔ.

⁷ Ta zu wa ma gba sɛ ngɔ gã kɔ̃a zã 'da mɔ, nɛ wa dɔnggɔ sɛ bɔlɔ zui 'da mɔ.

⁸ NWA do mbɔkɔ li wena, a a wi dia zã do du sila, nɛ kɔ̃a zã 'da a ma la mɔ vɛ̃.

⁹ A do dia zã we owinɔ vɛ̃, nɛ a kɔ̃a gɛnɛ mɛnɔ vɛ̃ a dɛa ma do kɔ̃ a ni.

¹⁰ Aa NWA, mɛnɔ vɛ̃ mɔ dɛa do kɔ̃ mɔ ni, ma dɔnggɔ sɛ mɔ, nɛ owinɔ 'da mɔ wa gese sɛ iɔ̃nae hã mɔ.

¹¹ Wa tɔ̃ sɛ lɛnggɛ dɔ̃lɔ̃ li dɛa to nwa 'da mɔ, nɛ wa tɔ̃ 'bɔ sako gba mɛnɔ mɔ dɛa ni.

¹² Na mɛ ni, winɔ vɛ̃ wa zele sɛ sako gba mɛnɔ 'da mɔ, nɛ wa ĩ ti dɔ̃lɔ̃ li dɛa to nwa 'da mɔ.

¹³ Dɛa to nwa 'da mɔ ma 'bana sɛ fai, nɛ mɔ sɛ a nwa kɔ sabɛlɛ do sabɛlɛ. NWA, mɔ a wi kɛ mɔ dɛ olo nu mɔ fai, nɛ mɔ dɛ mɛnɔ vɛ̃ do dia zã.

¹⁴ NWA gala winɔ wa kɔ ngamɔ ni, nɛ a yolo 'do wanɔ wa nɛ te tia ni.

¹⁵ Otunu li mɛnɔ vɛ̃ wa gbini zã wa do a na, a hã nyɔngɔmɔ hã wa do li zɔlɔ nɛ.

¹⁶ A da kɔ̃ a ngɔ nyɔngɔmɔ hã wa, nɛ wa nyɔngɔ, nɛ zã wa hɛ̃.

¹⁷ NWA dɛa mɛnɔ vɛ̃ do wala olo nɛ, nɛ dia zã 'da a be tɛ̃ ɛ kɔ mɛnɔ vɛ̃ a dɛa ni.

¹⁸ NWA nyɛlɛ do owinɔ wa sa mɔ hã a ni gɔ. A dɔ̃ɔ we gala winɔ wa sa mɔ hã a do gbãlã we ni.

¹⁹ A hã mɛ kɛ owinɔ 'da a wa kɔ̃a gɛnɛ nɛ ni hã wa, a zele hiamɔ gɛlɛ wa, nɛ a kpasa wa.

²⁰ NWA zɔ mɔ tɛ owinɔ wa kɔ̃a gɛnɛ a ni, nɛ a kumu sɛ o'dã winɔ vɛ̃.

²¹ Mi sambala sɛ NWA fai, a a Gale santo. E kɔ Otunu li mɛnɔ vɛ̃ wa dɔnggɔ a, nɛ wa dɛ ni kɔ sabɛlɛ do sabɛlɛ.