Zumanɔ 144 - WE NU GALE 1995

Nwa Davidi gisa iɔ̃nae hã Gale

1 Zuma 'da Davidi

¹ Zuma 'da Davidi Mi dɔnggɔ NWA, we kɛ a a wi amba zu mi. A bia bi bolo hã mi, nɛ a dɛ na, mi ĩ ti nɛ bolo do dia nɛ.

² A si 'do mi, nɛ a bi bolo zu mi. A a gba ngbo kɛ ma usu zu mi, a a ngele kɛ ma kele mi li bolo. A ia ogele winɔ ti mbula 'da mi.

³ Aa NWA, wele tɛ mɛ a ge, takɔ mɔ lengge do a ni? Wele wia tɛ mɛ mbe mɔ dati mɔ wia, takɔ mɔ sɔnzɔ do a nde?

⁴ Kpasi 'da wele la ɔ nɛ bũ ni, nɛ tũ dungu nza 'da a la dɔ̃ ɔ nɛ gɔ̃lɔ̃ ni.

⁵ Aa NWA, mɔ fĩ́ nu li nza, nɛ mɔ zĩ́lĩ́, nɛ mɔ é kɔ̃ mɔ tɛ kalanɔ hã ma kutu gba zɛ̃ we.

⁶ Mɔ dɛ na, kolo nyɛ li ɛ kpa falanɔ vɛ̃, nɛ mɔ dá kpilinɔ 'da mɔ hã ma pɛsɛ Owi sɛnɛ mɔ.

⁷ Yolo do ngɔ i, mɔ ɛ́fɛ́ kɔ̃ mɔ, hã mɔ kpasa mi. Mɔ bá mi 'dɔ gba 'du lì dɛ nza, nɛ mɔ fó mi ti kɔ̃ ogele winɔ,

⁸ kɛ wa tɔ̃́ gbãlã we gɔ, nɛ wa kana tɛ wa do bɛlɛ ni.

⁹ Aa Gale, mi nɛ ga mbé zuma hã mɔ, mi nɛ zɛ gã kundu we dɔnggɔ do mɔ.

¹⁰ Mɔ a mɔ dɛ na, onwanɔ wa nɛ ngɔ ngba wa li bolo, nɛ mɔ a mɔ kpasa Davidi, wi toe 'da mɔ.

¹¹ Mɔ kpásá mi li du kɔya 'da Owi sɛnɛ mi, nɛ mɔ fó mi ti kɔ̃ ogele winɔ, kɛ wa tɔ̃́ gbãlã we gɔ, nɛ wa kana tɛ wa do bɛlɛ ni.

¹² E kɔ obulu benɔ 'da lɛ wa ɔ nɛ be te, kɛ ma gã, nɛ ma ngala do bɔlɔ nɛ ni. E kɔ oboko benɔ 'da lɛ wa de nɛ́ te bɛlɛduma, kɛ wa gɛzɛ tɛ nɛ, nɛ ma 'dafa kɔ tɔa nwanɔ ni.

¹³ E kɔ yangganɔ 'da lɛ dunu do onyɔngɔmɔ kpi do kpi, nɛ oduanɔ 'da lɛ kɔ le gɛ wa ko, nɛ wa dɔ dɛ dati fala koto do koto.

¹⁴ E kɔ ongɔmbɔnɔ 'da lɛ wa ko dɛ dati, nɛ dɔ mbe kpo yɔ tabi a fé gɔ, nɛ dɔ hiamɔ 'bako wélé 'da walanɔ 'da lɛ gɔ.

¹⁵ Owinɔ kɛ wa kpa dia mɔ ɔ na mɛ ni, wa a wi yangga. Owinɔ kɛ NWA a Gale 'da wa ni, wa a wi yangga.