Zumanɔ 143 - WE NU GALE 1995

Sambala gɔ mbɔkɔ wi kɔ̃ NWA

1 Zuma 'da Davidi

¹ Zuma 'da Davidi Aa nwa, fala kɛ mi ala nu mi hã mɔ, nɛ mɔ gɛ́ zala mɔ, nɛ mɔ zélé sambala 'da mi, nɛ mɔ gésé nu nɛ hã mi do dia zã, do bɔlɔ zui 'da mɔ.

² Mi ĩ na, fo dia wi ngboo li mɔ bina, kɔ mi aka mɔ na, mɔ tɛ fì mi, wi toe 'da mɔ li ngbangga gɔ.

³ Wi sɛnɛ mi tɛ zɛlɛ tɛ mi, a fi mi nù, nɛ a ma mi ti nyanga a. A ili mi, nɛ a fi mi kɔ gba tũ, ɔ nɛ kɛ wa mi mi kɔ le 'da ofionɔ ni.

⁴ Hi mi ma ha, nɛ gbãlã tɛ mi gbini do 'bako.

⁵ Ta mi gba ngɔ tũnɔ ma la zi ia ni, nɛ mi lingga mɛnɔ vɛ̃ mɔ dɛa zi ni, nɛ mi zengge mɔ ngɔ nɛ.

⁶ Mi ɛfɛ kɔ̃ mi dɛ 'da mɔ we sambala mɔ, nɛ wɔ tɛ mɔ ba mi, ɔ nɛ kɛ wɔ tɛa kolo ba do nù ni.

⁷ Aa nwa, mɔ kɔ̃́ nu mi dɔ̃, we kɛ sila mi 'bɔa do'do. Mɔ tɛ sìkì 'do mɔ lo do mi gɔ. Ní gɔ, nɛ mi ɔ sɛ nɛ fio ni iko.

⁸ Titole kpo kpo, nɛ mɔ bé kɔ̃a zã 'da mɔ hã mi, we kɛ mi gbini zã mi do mɔ. Mɔ bé li wala mi wia we ba ma ni hã mi, we kɛ mi siki li mi dɛ 'da mɔ.

⁹ Aa NWA, mi usu tɛ mi kɛ zã mɔ, mɔ fó mi ti kɔ̃ Owi sɛnɛ mi do'do.

¹⁰ Mɔ a Gale 'da mi, mɔ bé mbula 'da mɔ hã mi na, mi dɛ ma. E kɔ mɔ be kɔ̃a zã 'da mɔ hã mi, nɛ mɔ kã mi do li dia wala.

¹¹ Aa NWA, mɔ kpásá mi we duzu dɔ̃lɔ̃ li 'da mɔ, mɔ dɛ́ olo nu mɔ, hã mɔ fo mi kɔ ngamɔ.

¹² Mɔ bé kɔ̃a zã 'da mɔ hã mi. Mɔ gbɛ́ Owi sɛnɛ mi, nɛ mɔ kúmú wa vɛ̃ do'do, we kɛ mi a wi toe 'da mɔ.