Zumanɔ 142 - WE NU GALE 1995

NWA a gba ngbo kele zu wi kɛ wa zɛlɛ tɛ a ni

¹ Zuma 'da Davidi. A ga zi ma 'da fala a usu kɔ ta ni.

² Aa NWA, mi zɛ nu mi, nɛ mi ala nu mi hã mɔ na, mɔ gbaka mi.

³ Mi ala nu mi dati mɔ, nɛ mi tɔ̃ gulu 'bakoe 'da mi hã mɔ.

⁴ Fala kɛ mi mbɔkɔ, nɛ mɔ a mɔ ĩ ti wala mi la nɛ ni. Owi sɛnɛ mi wa ndɔa bili li wala 'da mi.

⁵ Mɔ ká mɔ kɛ zã mi hã mɔ zɔ, fo wi gala mi bina. Mi zɔlɔ fala we usu do tɛ mi, nɛ fo wi lengge do mi bina.

⁶ Aa NWA, mi sa mɔ hã mɔ na, mɔ gala mi. Mɔ a wi amba zu mi, nɛ kpamɛ 'da mi ngɔ nùi gɛ, wi tati a mɔ.

⁷ Mɔ gɛ̃ zala mɔ, hã mɔ zele ala nui 'da mi, we kɛ mi mbɔka do'do. Mɔ kpásá mi ti kɔ̃ owi zɛlɛ tɛ mi, we kɛ wa nganda nɛa ngɔ mi.

⁸ Mɔ fó mi kɔ 'bakonɔ mi kpa gɛ, takɔ mi dɔnggɔ dia zu li mɔ, nɛ mi tɔ̃ lɛnggɛ dia mɛ mɔ dɛa do mi ni sanga owinɔ 'da mɔ.