Zumanɔ 141 - WE NU GALE 1995

NWA, mɔ fó lɛ kɔ 'dã mɔ

1 Zuma 'da Davidi

¹ Zuma 'da Davidi Aa NWA, mi sa mɔ hã mɔ, mɔ tɛ́ dɔ̃, hã mɔ gbaka mi. Fala kɛ mi sa mɔ hã mɔ, nɛ mɔ zélé mi sɛ.

² E kɔ sambala 'da mi nɛ ndirr dɛ 'da mɔ i, ɔ nɛ zɛ̃ we yɔmbɛ kɛ wa dɔ hã mɔ ni. E kɔ do gɛ̃a wese, fala mi kala kɔ̃ mi dɛ ngɔ we sambala mɔ ni, nɛ mɔ zɔ ma li mɔ nɛ́ dɔnggamɔ ni.

³ NWA, mɔ é nwá tɛ nu mi, mɔ zɔ́ mɔ tɛ mi na, dɔ mi wélé 'dã we gɔ.

⁴ Mɔ fó linggamɔ dɛ 'dã mɔ kɔ sila mi, nɛ mɔ dɛ́ na, mi tɛ lè sanga o'dã winɔ, hã mi mba do wa we dɛ 'dã mɔ gɔ. E kɔ mɔ zɔ mɔ tɛ mi na, dɔ mi lé kɔ ɛngga 'da wa, hã mi nyɔngɔ mɛ 'da wa gɔ.

⁵ Fala kɛ wi bɔlɔ zu kɔ'dɔ mi, kɔ a hã etumbu hã mi do dia zã, nɛ mi kɔ̃ sɛ gɛnɛ nɛ. Nɛ nde mi wè tɛ kɔ̃ na, o'dã wi wa dɔnggɔ mi gɔ, we kɛ mi sambala fai dɛ ngɔ 'dã mɛnɔ 'da wa.

⁶ Wenɔ mi tɔ̃ ni, owi sɛnɛ mi wa ĩ sɛ gulu nɛ, do 'da fala kɛ owele wa ili sɛ nwanɔ 'da wa, nɛ wa te nù ngɔ tanɔ ni.

⁷ Nu ngbo 'da ofionɔ ma fí sɛ gã wena, nɛ ma yɔ'dɔ sɛ gbãlã wa kɛ ma pɛsɛ ni.

⁸ Aa NWA Gale 'da mi, mi siki li mi, nɛ mi yu dɛ 'da mɔ, mɔ lá mi do tunu li mi.

⁹ Mɔ dɛ́ na, mi tɛ tè li bili 'da o'dã winɔ gɔ, nɛ dɔ zonggo zu wi 'da wa bá mi gɔ.

¹⁰ E kɔ o'dã winɔ do tɛ wa ngboo, wa te li bilinɔ wa ndɔa ni, nɛ mi, mi gbili ma, nɛ ma tɛ bà mi gɔ.