Zumanɔ 140 - WE NU GALE 1995

Sambala 'da wi kɛ wa gu kɔ̃ hã a

¹ Zuma 'da Davidi

² Aa nwa, mɔ kpásá mi ti kɔ̃ o'dã winɔ, nɛ mɔ dɛ́ na, owi dɛ ngatɛnɔ wa tɛ zɛ̀lɛ̀ tɛ mi gɔ.

³ Owinɔ ni wa lengge tati a we dɛ 'dã mɔ, nɛ tũ kpo kpo, wa fa mɔ̃lã we mɔ̃lɔ̃ ma.

⁴ Lɛnggɛ nu wa dè gɔ, ma ba wele ɔ nɛ fãlĩ kangge ni.

⁵ Aa NWA, mɔ dɛ́ na, mi tɛ tè dɛ kɔ̃ o'dã winɔ gɔ. Mɔ fó mi ti kɔ̃ Owi dɛ ngatɛnɔ, kɛ wa ba zã zu mi we fi mi nù ni.

⁶ Owi gã zunɔ wa ndɔa bili hã mi. Wa kpua fɛlɛ, nɛ wa fi gbanda hã mi we ba mi, nɛ wa 'bili ngindo te dɛ li wala 'da mi.

⁷ Mi tɔ̃a hã nwa na: “Mɔ a Gale 'da mi!” NWA, mɔ gɛ́ zala mɔ we zele hiamɔ ala nui 'da mi.

⁸ NWA Gale, mɔ a mɔ kele zu mi do ngawi 'da mɔ, nɛ mɔ zɔ mɔ tɛ mi do ngba soe bolo.

^9-10 NWA, mɔ dɛ́ na, linggamɔ zu o'dã winɔ tɛ dɛ̃ tɛ̃ ɛ gɔ. Mɔ kélé ti mɛnɔ wa 'dafa we dɛ nɛ ni. Owinɔ wa linggi mi ni, wa dɛ gã zu, wa zonggo zu mi na mi kpa ngamɔ. E kɔ ngamɛ ni si dɛ ngɔ wa wele nɛ!

¹¹ Gale, mɔ tómbó gba nyɛa we do kalĩ we na, ma ala dɛ ngɔ wa. E kɔ mɔ ili wa dɛ kɔ gba 'du kɔ̃, nɛ wa tɛ hɔ̀ 'bɔ nza gɔ.

¹² E kɔ wa ndaka wi tɔ̃ tɛ winɔ kɔ le gɛ do'do. E kɔ ngamɔ te ngɔ owi dɛ ngatɛnɔ hã ma kumu wa.

¹³ Aa NWA, mi ĩ na mɔ yolo sɛ 'do owi 'bakonɔ, nɛ mɔ 'bili sɛ dia gulu we hã owi sãnɔ.

¹⁴ Gbãlã we, owi bɔlɔ zunɔ wa dɔnggɔ sɛ mɔ, nɛ wa sɛ fala nɛ kpo do mɔ fai.