Zumanɔ 139 - WE NU GALE 1995

NWA ĩ ti mi vɛ

1 Zuma 'da Davidi

¹ Zuma 'da Davidi Aa NWA, mɔ suka go'do zã mi, nɛ mɔ ĩ ti mi de wena.

² Mi dungu nu tabi mi kulu ngɔ, nɛ mɔ ĩ. Mɔ ĩ ti linggamɔ zu mi zɛ́ belee.

³ Mɔ soko mɔ tɛ mi 'da fala mi yɛnggɛ tabi mi ɔ nù ni, nɛ mɔ ĩ ti mɛnɔ mi dɛ ni vɛ̃.

⁴ Dati kɛ na mi 'bã nu mi ngɔ we, nɛ nde mɔ ĩ ti wenɔ mi nɛ tɔ̃ ma ni ia.

⁵ Mɔ zĩ mi takpa ɔ nɛ ngbo ni, nɛ mɔ zɔ mɔ tɛ mi do ngawi 'da mɔ.

⁶ Mɔ ĩ ti mi la li ngele, nɛ ma nɛa ngɔ kɛ mi wia we ĩ nɛ ni.

⁷ Mi nɛ yu si do nde, takɔ mi nyɛlɛ do mɔ ni? Mi nɛ usu do nde na, dɔ mɔ zɔ́ mi gɔ ni?

⁸ Gɛnɛ kɔ mi kũ dɛ li nza i, nɛ nde mɔ i mɔ boe. Gɛnɛ kɔ mi ɔ nù kɔ le 'da ofionɔ, nɛ nde mɔ i mɔ boe.

⁹ Gɛnɛ kɔ mi yu si 'biti gba wese, tabi mi nɛ we ɔ si 'biti gɛ̃a wese,

¹⁰ nɛ nde mɔ i mɔ boe we gala mi, nɛ ngawi 'da mɔ ma kã sɛ mi.

¹¹ Mi wia we tɔ̃ na, gba tũ gú mi kpuku, tabi sa fala kɛ zã mi ni ma kífí gba tũ.

¹² Nɛ nde gba tũ li mɔ bina. Tũ sa li mɔ ɔ nɛ gba wese ni, nɛ gba tũ do sa fala ma wia kɔ̃ dati mɔ.

¹³ Wi a mɔ a mɔ ia kuli mi kɔ zã naa mi, nɛ mɔ a mɔ dɛa 'bili tɛ mi kpo kpo vɛ̃.

¹⁴ Aa NWA, mi gese iɔ̃nae hã mɔ, we kɛ kili tɛ mi mɔ dɛa ni, mɛ a gã ɔngbamɔ. Nɛ mi ĩ do sila mi vɛ̃ na, mɛnɔ kɛ mɔ dɛ ni, mɛ vɛ̃ a gba mɔ.

¹⁵ 'Da fala kɛ mɔ zi tɛ dɛ kili tɛ mi, nɛ mɔ kpɔ zi gbãlã tɛ mi dɛ nu ngbɛ ɛ kɔ zã naa mi i, nɛ mi gã zi do usu nɛ ni, nɛ nde mɔ kpo ùsù zi tɛ̃ ɛ li mɔ gɔ.

¹⁶ Dati kula 'da mi, nɛ nde mɔ zɔ zi mi zɔa. Mi tɛ ɔ̃ zi mbamba tũ kpo nza gɔ, nɛ nde mɔ kɔma tũ dungu nza 'da mi kɔ 'buku 'da mɔ ia.

¹⁷ Aa Gale, mɛnɔ mɔ 'dafa we dɛ nɛ ni, fala ĩ ti nɛ nganda do mi wena, we kɛ ma dɛlɛ wena.

¹⁸ Mi nɛ dɛ fala tɔlɔ ma nɛ nde? Ma dɔa nɛa ngɔ gbãlã kɛnzɛnɔ nù gɛ. Gɛnɛ kɔ mi tɔlɔ ma gbaa Sɔkpɔ nɛ, nɛ nde mi wé sɛ tɛ ĩ ti gulu mɔ gɔ.

¹⁹ Aa Gale, ma wia sɔ na, mɔ kumu o'dã winɔ, nɛ mɔ ndáká owi dɛ ngatɛnɔ ni kɛ zã mi do'do.

²⁰ Wa tɔ̃ bɛlɛ do zu li mɔ, nɛ wa wele 'dã we dɛ ngɔ mɔ.

²¹ Aa NWA, mi sɛnɛ owi sɛnɛ mɔ wena. Fala kɛ mi zɔ winɔ wa bɛ̃ we nu mɔ ni, nɛ sila mi nɛ nɛa.

²² Mãlã dunu kɔ sila mi dɛ tɛ wa ngurr, nɛ mi zɔ wa nɛ́ Owi sɛnɛ mi ngboo ni.

²³ Aa Gale, mɔ sókó go'do zã mi, takɔ mɔ ĩ ti mi do dia nɛ ngboo. Mɔ yámbá sila mi, takɔ mɔ ĩ ti linggamɔ zu mi.

²⁴ Mɔ zɔ na, tabi mi ba wala 'dɔkɔlɔ o'dã winɔ nde, nɛ mɔ fo mi li nɛ do'do, nɛ mɔ kã mi do li wala ma nɛ dɛ 'da mɔ ni.