Zumanɔ 138 - WE NU GALE 1995

Zuma dɔnggɔ do NWA

1 Zuma 'da Davidi

¹ Zuma 'da Davidi Aa nwa, mi nɛ dɔnggɔ mɔ do sila mi kpo. Mi nɛ ga zuma we dɔnggɔ do mɔ dɛ dati ogalenɔ.

² Mi siki li mi dɛ tɛ Tɛmpɛloe 'da mɔ kɛ ma santo, nɛ mi bili zu mi nù, nɛ mi dɔnggɔ zu li mɔ, we duzu kɛ mɔ dɛ olo nu mɔ fai, nɛ mɔ do kɔ̃a zã wena. We kɛ mɔ dɛa mbuli 'da mɔ, nɛ ma la ngɔ kɛ lɛ lingga zi ni.

³ 'Da fala mi sa zi mɔ hã mɔ, nɛ mɔ kɔ̃a nu mi, nɛ mɔ hã mbé ngawi hã mi.

⁴ Aa NWA, e kɔ Onwanɔ ngɔ nù gɛ vɛ̃ wa dɔnggɔ mɔ, we kɛ wa zila mbulanɔ 'da mɔ.

⁵ E kɔ wa ga zuma we mɛnɔ mɔ dɛa ni, nɛ wa tɔ̃ na: “Dɔ̃lɔ̃ li 'da mɔ ma gã wena.”

⁶ NWA, gɛnɛ kɔ mɔ a ndũu li ngɔ i, nɛ nde mɔ zɔ mɔ tɛ obe winɔ, nɛ mɔ ĩ ti mɛ owi gã zunɔ wa dɛ ni.

⁷ Fala kɛ 'bako gulu zu mi, nɛ mɔ kpasa mi, nɛ mɔ bi do owi sɛnɛ mi, nɛ mɔ kpasa mi do ngawi 'da mɔ.

⁸ Aa NWA, mɔ dɛ sɛ mɛnɔ vɛ̃ mɔ kpua mbulu nɛ hã mi ni. Kɔ̃a zã 'da mɔ ma 'bana sɛ kɔ sabɛlɛ do sabɛlɛ. Mɔ tɛ bɛ gɛnɛ lɛ owinɔ, kɛ mɔ dɛa lɛ do kɔ̃ mɔ ni gɔ.