Zumanɔ 137 - WE NU GALE 1995

Obe Israɛlɛ wa ala nu wa hã Gale tɛ kɔlɔ 'duli

¹ Lɛ dungu zi nù nu kolo lìnɔ tɛ ngɔ nù Babilonia, nɛ lɛ lengge le Sioni, kɛ owinɔ wa 'danga ma ni, nɛ li lɛ dunu do mili kɔ̃a.

² Lɛ gãlã okundunɔ 'da lɛ ngɔ, tɛ nu kpolo tenɔ nu kolo lìnɔ ni, we kɛ lɛ zi 'bɔ do yangga zɛ ma bina.

³ Tɛ i mɔ, owinɔ wa kala zi lɛ do 'duli ni, wa ngbɔkɔ lɛ na, lɛ ga zuma yangga hã lo. Wa na: “Nɛ gá mbe zuma kɔ le Sioni hã lɛ!”

⁴ Lɛ nɛ dɛ fala ga zuma 'da nwa ngɔ gele nù nɛ nde?

⁵ E kɔ ngawili kɔ̃ mi konggo, fala kɛ ta zu mi ele ngɔ le Yeruzalɛmɛ ni.

⁶ E kɔ wala gɛlɛ mi nãlã, fala kɛ mi ba sila mi ngɔ le Yeruzalɛmɛ, kɔ mi la fala lengge na, gã yangga 'da mi yolo kɔ le ni ni.

⁷ Aa NWA, ta mɔ tɛ èlè ngɔ mɛ Oedɔmɛ wa dɛa zi, do ngba soe kɛ owinɔ wa ba le Yeruzalɛmɛ ni gɔ. Wa he zi mɔ na: “Nɛ 'dángá le, nɛ nɛ zã tɔanɔ dɛ nù!”

⁸ Aa nɛ, owi kɔ le Babilɔnɛ, wa 'danga sɛ le 'da nɛ. Winɔ wa bili sɛ nu gbã 'dã mɛnɔ, kɛ nɛ dɛa do lɛ gɛ hã nɛ ni, wa a wi yangga.

⁹ Owinɔ kɛ wa kala sɛ benɔ 'da nɛ, nɛ wa mbɔtɔ sanga wa ngɔ tanɔ ni, wa a wi yangga.