Zumanɔ 135 - WE NU GALE 1995

Zuma we dɔnggɔ do NWA Gale

¹ Aleluya, lɛ dɔ́nggɔ́ nwa! Aa nɛ, owi dɛa tonɔ 'da NWA, nɛ dɔ́nggɔ́ dia zu li a!

² Nɛ, kɛ nɛ dungu kɔ tɔa Tɛmpɛloe 'da NWA Gale 'da lɛ ni,

³ nɛ dɔ́nggɔ́ a, we kɛ a do kɔ̃a zã wena. Nɛ zɛ́ zuma hã a, we kɛ a a wi dia sila.

⁴ NWA saka lɛ obe Israɛlɛ, obe zã Yakɔbɔ, nɛ lɛ hɔa owinɔ 'da a ngboo.

⁵ Gbãlã we, mi ĩ na NWA 'da lɛ gã wena, a gã nɛa ngɔ ogele galenɔ vɛ̃.

⁶ NWA dɛ mɛnɔ vɛ̃ kɛ zã a kɔ̃a ni, tɛ li nza i do ngɔ nù nga, tɛ ngɔ gba lìnɔ do ti go'do nɛ i vɛ̃.

⁷ A ba nu a, nɛ bũnɔ ma ngɔ fi ma, nɛ gba kutunɔ danga dɛ ngɔ, nɛ kolo nyɛ li ɛ, nɛ ma tɛ.

⁸ Wi 'bɔ a a hã a gbɛa zi Okuti bulu benɔ, do kuti be wili sa'denɔ ngɔ nù Ezipeto.

⁹ A dɛa oɔngbamɔ do gba sɔ̃ mɔ, kɛ gulu nɛ gã wena ni, we hã do etumbu hã nwa ngɔ nù Ezipeto do owinɔ 'da a.

¹⁰ A bi ogba dɔa nu kɔnggɔnɔ, nɛ a nɛ ngɔ wa. A gbɛa Onwanɔ kɛ wa nganda wena ni.

¹¹ A gbɛa Sihoni, nwa 'da Oamori, do Ɔgɛ, nwa ngɔ nù Basanɛ, do Onwanɔ ngɔ nù Kanana vɛ̃.

¹² Nɛ a 'dɔlɔ nùi olo wa ni hã lɛ owinɔ 'da a. A hã ma hã lɛ obe Israɛlɛ na, ma ɔ do mɔ́ lɛ fai.

¹³ Aa nwa, mɔ fai a Gale, nɛ dɔ̃lɔ̃ li 'da mɔ ma 'bana sɛ fai kɔ sabɛlɛ do sabɛlɛ.

¹⁴ NWA, mɔ yolo 'do owinɔ 'da mɔ, nɛ mɔ ĩ 'bako hã winɔ wa dɔnggɔ mɔ ni.

¹⁵ Okpikima fɛ̃a mɔ bole tabi mɔ mbali 'da ogele winɔ, mɛ a mɔ kɛ wele a dula ma iko.

¹⁶ Nu kpikimanɔ ni boe, nɛ nde wa wélé we gɔ, gbali wa boe, nɛ nde wa zɔ́ mɔ gɔ.

¹⁷ Zala wa boe, nɛ nde wa zélé we gɔ, wa wè tɛ ama mbe bi sĩ gɔ.

¹⁸ E kɔ owinɔ wa dula kpikimanɔ ni, do wanɔ wa gbini zã wa do ma ni, wa we kɔ́ do ma.

¹⁹ Aa nɛ, obe Israɛlɛ, nɛ dɔ́nggɔ́ NWA. Aa nɛ, onganganɔ, obe zã Aroni, nɛ dɔ́nggɔ́ NWA.

²⁰ Aa nɛ, olevitɛnɔ, nɛ dɔ́nggɔ́ NWA. Aa nɛ, ogele winɔ kɛ nɛ sambala NWA ni, nɛ dɔ́nggɔ́ a.

²¹ Nɛ nɛ, owi Yeruzalɛmɛ, nɛ zɛ́ nu nɛ we dɔnggɔ do NWA, wele kɛ a ɔ ngɔ kala Sioni ni. Aleluya, lɛ dɔ́nggɔ́ NWA!