Zumanɔ 132 - WE NU GALE 1995

NWA ɔ tɛ Sioni

1 Zuma ga li wala gɛnɛ we nɛ dɛ Yeruzalɛmɛ.

¹ Zuma ga li wala gɛnɛ we nɛ dɛ Yeruzalɛmɛ. Aa NWA, mɔ lénggé do Davidi, nɛ ta mɔ tɛ èlè ngɔ ngamɛnɔ vɛ̃ a kpa zi ni gɔ.

² Mɔ lénggé mbuli kɛ a kpua zi hã mɔ nwa Gale ngawi 'da Yakɔbɔ ni. A zonggo zi tɛ̃ a na:

³ “Mi sí sɛ tɔa we ɔ nù gɔ.

⁴ Mi kpé sɛ tɛ mi gɔ, nɛ mi ɔ́ sɛ yala gɔ

⁵ gbaa na mi 'dafa fala hã NWA, nɛ mi dɛ tɔa hã a Gale ngawi 'da Yakɔbɔ sɛ nɛ de.”

⁶ Lɛ zila we Sanduku Gba Tɔkɛ tɛ Efrata, nɛ lɛ kpa ma dɔ̃ɔ do le Yarɛ.

⁷ Nɛ lɛ tɔ̃a na: “Lɛ lé kɔ tɔa 'da NWA, nɛ lɛ gú nù ti a.”

⁸ Aa NWA, mɔ kpé 'do Sanduku Gba Tɔkɛ, kɛ ma be ngawi 'da mɔ ni, nɛ mɔ tɛ do ma dɛ kɔ Tɛmpɛloe, kɛ mɛ a fala ɔmɔ tɛ wi 'da mɔ ni.

⁹ E kɔ onganganɔ 'da mɔ wa dɛ bɔlɔ zu dɛa mɔ fai! E kɔ owinɔ 'da mɔ wa he hiamɔ yangga!

¹⁰ Mɔ tɛ bɛ̃̀ gɛnɛ nwa mɔ ia a ni gɔ, we lengge do Davidi, wi toe 'da mɔ.

¹¹ NWA, mɔ kpua zi mbulu hã Davidi, nɛ mɔ kífí sɛ nu mɔ fala kpo gɔ. Mɔ tɔ̃a hã a na: “Mi saka sɛ mbe kɔ obe zã mɔ, nɛ mi e a do nwa dɛ olo mɔ.

¹² Kɔ fala kɛ obe zã mɔ wa dɔnggɔ gba tɔkɛ 'da mi, hã wa dɛ mbulanɔ 'da mi, nɛ obe zã wa wa dungu sɛ nwa dɛ olo wa, nɛ ma ɔ sɛ na mɛ ni kɔ sabɛlɛ do sabɛlɛ.”

¹³ Mba gɔ, NWA, mɔ saka Sioni, nɛ mɔ kɔ̃a we ɔ di ni.

¹⁴ Nɛ mɔ na: “Kɛ gɛ a fala ɔmɔ do tɛ mi, mi kɔ̃a na mi ɔ fai dɛ fala gɛ.

¹⁵ Mi dɛ sɛ de mɔ hã Owi Sioni, nɛ mi hã sɛ mɛnɔ wa dɛ wɔ nɛ ni hã wa. Mi hã sɛ nyɔngɔmɔ hã Owi sãnɔ kɔ le ni, nɛ wa nyɔngɔ, nɛ zã wa hɛ̃.

¹⁶ Mi wele sɛ nu mi tɛ onganganɔ kɔ le Sioni, nɛ Owi Sioni wa he sɛ hiamɔ yangga.

¹⁷ Mi e sɛ mbe be zã Davidi kpo do nwa tɛ Sioni, nɛ mi dɛ sɛ na, dɛa to nwa 'da a nganda, nɛ ma 'bana fai ɔ nɛ wese ni.

¹⁸ Mi hã sɛ sape hã Owi sɛnɛ a, nɛ dɛa to nwa 'da a ma de sɛ wena.”