Zumanɔ 121 - WE NU GALE 1995

Wi nɛ gala mi a wio nde?

1 Zuma ga li wala gɛnɛ we nɛ dɛ Yeruzalɛmɛ.

¹ Zuma ga li wala gɛnɛ we nɛ dɛ Yeruzalɛmɛ. Mi ba li mi ngɔ, nɛ mi ka mɔ dɛ ngɔ kalanɔ i, wi gala mi nɛ yolo ní do nde?

² Wi gala mi a NWA Gale, wele kɛ a dɛa li nza do nùi gɛ.

³ A zɔ sɛ mɔ tɛ mɔ fai do sɔ̃a li, a lá sɛ mɔ na mɔ te gɔ.

⁴ A kɛ a zɔ mɔ tɛ obe Israɛlɛ ni, a mbɔ́kɔ́ gɔ, nɛ a ɔ́ yala gɔ.

⁵ NWA a zɔ sɛ mɔ tɛ mɔ, a 'bana sɛ dɛ kɛ zã mɔ we kele zu mɔ.

⁶ Nɛ do gba wese, nɛ nde wese dɔ́ sɛ mɔ gɔ, nɛ zɛkɛ zɛ́lɛ́ sɛ tɛ mɔ do tũ gɔ.

⁷ NWA a zɔ sɛ mɔ tɛ mɔ falanɔ vɛ̃, nɛ a dɛ sɛ na mɔ tɛ kpà ngamɔ gɔ.

⁸ NWA a zɔ sɛ mɔ tɛ mɔ li wala gɛnɛ 'da mɔ vɛ̃, yolo do kɛ mɔ kulu ngɔ ni gbaa na mɔ hɔa nde. A dɛ sɛ ní ngangga gɛ, do kɔ sabɛlɛ do sabɛlɛ.