Zumanɔ 12 - WE NU GALE 1995

NWA gbaka lɛ ti kɔ̃ Owi tɔ̃ bɛlɛnɔ

¹ Zuma 'da Davidi

² Aa NWA, mɔ gbáká lɛ! Tala dia wele kpo 'bànà gɔ. Fo 'bɔ wi dɛ mɔ do wala olo nɛ bina.

³ Owinɔ wa tɔ̃ 'dã li ngba wa, wa tɔ̃ ɛ̃fɛ̃ nu hã ngba wa, nɛ nde kɔ sila wa si kpi.

⁴ Aa NWA, mɔ mbítí owinɔ vɛ̃, kɛ wa tɔ̃ ɛ̃fɛ̃ nu hã ngba wa we kpa mɔ kɔ̃ wa ni, nɛ mɔ mbítí 'bɔ owanɔ kɛ wa tɔ̃ lɛnggɛ walinɔ na:

⁵ “Lɛ dɛ́ kili wele kpo gɔ, lɛ ĩ ti wele we wena, nu lɛ ma amba sɛ zu lɛ” ni.

⁶ Nɛ nde NWA tɔ̃a na: “Mi tɛ sɛ ngangga ni, we zɔ Owi sãnɔ kɛ tɛ wa zɛlɛ ni, do Owi 'bakonɔ, kɛ wa zɛ nu wa kɔ ngamɛ ni. Mi gbaka sɛ wa, nɛ mi a sɛ wa tɛ dia fala kɛ wa 'bã ma ni.”

⁷ We nu NWA Gale mɛ a gbãlã we, ma fɛngɛ wena ɔ nɛ fɛ̃a mɔ bolo kɛ wa gi ma kɔ furu fala sambo ni.

⁸ Aa NWA, mɔ a wi kɛ mɔ wele we, nɛ mɔ dɛ olo nu mɔ. Mɔ kɔ̃́, nɛ mɔ zɔ́ mɔ tɛ lɛ fai, dɔ o'dã winɔ wa dɛ́ mɔ do lɛ gɔ.

⁹ Mba gɔ, o'dã winɔ wa kpa falanɔ vɛ̃, nɛ 'dã mɔ ma yɛ'bɛ sanga owinɔ.