Zumanɔ 119 - WE NU GALE 1995

¹ Winɔ kɛ dɛa to tɛ wa fí kɔ'da zu wa gɔ, nɛ wa dɛ mɔ tɛ wa do 'da mbula 'da nwa ni, wa a wi yangga.

² Winɔ kɛ wa zele we nu nwa, nɛ wa dɛ olo nu a do sila wa kpo ni, wa a wi yangga.

³ Wa dɛ́ 'dã mɔ fala kpo gɔ, nɛ wa dɛ mɔ tɛ wa nɛ́ kɛ zã NWA kɔ̃a ni.

⁴ Mɔ NWA, mɔ bia mbulanɔ 'da mɔ na, lɛ zele, nɛ lɛ dɛ ma do dia nɛ.

⁵ E kɔ mi zele we nu mɔ, nɛ mi dɛ mɔ tɛ mi do bɔlɔ nɛ ngboo.

⁶ Fala kɛ mi dɛ mbula 'da mɔ na mɛ ni, nɛ nde sape bá sɛ li mi gɔ.

⁷ Mi yambala sɛ gbãlã wenɔ 'da mɔ, nɛ mi dɔnggɔ sɛ mɔ do sila mi kpo.

⁸ Mi dɛ sɛ olo nu mɔ fai, dɔ ta zu mɔ élé ngɔ mi fala kpo gɔ.

⁹ Wele 'bana zagbãlã, nɛ a zimi tɛ̃ a nɛ nde? A wia we dɛ mbulanɔ 'da mɔ NWA, takɔ a zimi do tɛ̃ a.

¹⁰ Mi fa we zele nu mɔ NWA do sila mi vɛ̃. Mɔ tɛ là mi hã mi yɔ dɛ olo nu mɔ gɔ.

¹¹ Mi usu we nu mɔ dɛ kɔ sila mi na, dɔ mi dɛ́ 'dã mɔ dɛ 'da mɔ gɔ.

¹² Aa NWA, mi dɔnggɔ mɔ, mɔ bé li wala 'da mɔ hã mi.

¹³ Mbulanɔ vɛ̃ mɔ ia ni, mi tɔlɔ ma do nu mi.

¹⁴ Dɛ olo nu mɔ ma hã yangga hã mi wena, ɔ nɛ mi kpa gã kpamɔ ni.

¹⁵ Mi nɛ lengge we nu mɔ, nɛ mi fa we ĩ gulu bia wenɔ 'da mɔ.

¹⁶ We nu mɔ ma ɛ̃fɛ̃ tɛ mi wena, nɛ ta zu mi élé sɛ ngɔ ma gɔ.

¹⁷ Aa nwa, mɔ bé dia zã hã mi, wi toe 'da mɔ na, mi 'bana do tunu li mi, nɛ mi dɛ olo nu mɔ.

¹⁸ Mɔ fĩ́ li mi hã mi zɔ dia mɛnɔ kɛ ma usu tɛ̃ ɛ kɔ mbulanɔ 'da mɔ ni.

¹⁹ Mi tɛa ngɔ nù gɛ a gɛnɛ iko, mɔ bé mbulanɔ 'da mɔ hã mi.

²⁰ Sila mi ɔ ngɔ ngbũu we zele we nu mɔ. Mi kɔ̃a we ĩ ti 'bili wenɔ 'da mɔ ngɔ mɛnɔ vɛ̃.

²¹ Mɔ ha etumbu hã owi walinɔ, kɛ wa bɛ̃ we dɛ olo nu mɔ ni.

²² Mɔ tɛ là wa hã wa dã mi, nɛ wa mɔmɔ mi gɔ, we kɛ mi dɛ mbulanɔ 'da mɔ.

²³ Gɛnɛ kɔ ogã winɔ wa ba zã zu we dɛ tɛ mi, nɛ nde mi a wi toe 'da mɔ, mi lengge olo nu mɔ fai.

²⁴ Mbulanɔ 'da mɔ ɛ̃fɛ̃ tɛ mi wena, ma be dia wala hã mi.

²⁵ Aa NWA, mi tia bulu nù, kɔ mɔ kpásá mi ɔ nɛ kɛ mɔ kpua zi mbulu nɛ ni.

²⁶ Mi tɔ̃a lɛnggɛ mɛnɔ vɛ̃ mi dɛa ni hã mɔ, nɛ mɔ gisa nu nɛ hã mi, mɔ bé li wala 'da mɔ hã mi.

²⁷ Mɔ dɛ na, mi ĩ ti gulu we nu mɔ, nɛ mi lengge dia mɛnɔ kɔ nɛ ni.

²⁸ 'Bako ba mi, nɛ ma gulu zu mi, mɔ ha ngawi hã mi ɔ nɛ kɛ mɔ tɔ̃a ni.

²⁹ Mɔ fó mi li wala dɛa mɔ bɛlɛ, nɛ mɔ bé we nu mɔ hã mi do dia zã.

³⁰ Mi kɔ̃a na mi dɛ olo nu mɔ, nɛ mi nɛa 'do mbulanɔ 'da mɔ.

³¹ Mi na tɛ mi do we nu mɔ NWA, mɔ tɛ là mi hã mi kpa sape gɔ.

³² Mi do hɛ̃lɛ̃ we yɛnggɛ li wala mɔ bia hã mi ni, we kɛ mɔ fĩ hã zã mi na mi ĩ gulu nɛ.

³³ Aa NWA, mɔ bé mbulanɔ 'da mɔ hã mi, nɛ mi dɛ sɛ ma 'da fala fai.

³⁴ Mɔ bé gulu we nu mɔ hã mi, nɛ mi dɛ sɛ ma do sila mi vɛ̃.

³⁵ Mɔ kã́ mi tɛ li walanɔ 'da mɔ, we kɛ ma ɛ̃fɛ̃ tɛ mi wena.

³⁶ Mɔ é wɔ dɛ mbulanɔ 'da mɔ kɔ sila mi, nɛ ma nɛ ngɔ wɔ fa kpamɔ.

³⁷ Mɔ fá na, mi tɛ è linggamɛ 'da mi ngɔ mɔ yala gɔ, nɛ mi dɛ mɔ tɛ mi nɛ́ kɛ zã mɔ kɔ̃a ni.

³⁸ Mɔ dɛ́ olo nu mɔ hã mi wi toe 'da mɔ, mɔ dɛ́ mbuli mɔ kpua zi hã owinɔ 'da mɔ ni hã mi.

³⁹ Mɔ kpásá mi ti kɔ̃ Owi sɛnɛ mi kɛ wa dã mi, nɛ wa hã kili hã mi ni, we kɛ 'bili wenɔ 'da mɔ ma de wena.

⁴⁰ Mi kɔ̃a ngboo we dɛ mbula 'da mɔ, mɔ lá mi do tunu li mi, we kɛ mɔ a wi bɔlɔ zu.

⁴¹ Aa NWA, mɔ bé dia zã 'da mɔ hã mi, mɔ kpásá mi ɔ nɛ kɛ mɔ kpua mbulu nɛ ni.

⁴² Nɛ mi kpa sɛ lɛnggɛ we gese olo dɛlanɔ wa dã do mi ni, we kɛ mi gbini zã mi do we nu mɔ.

⁴³ Mɔ fó bɛlɛ kɔ nu mi do'do, we kɛ mi a sila mi ngɔ mbulanɔ 'da mɔ.

⁴⁴ Mi kɔ̃a we dɛ mbulanɔ mɔ ia ni fai, nɛ mi mbɔkɔ sɛ tɛ dɛ ma gɔ.

⁴⁵ Mi yɛnggɛ sɛ do mbɔkɔ sila, nɛ fo sɛ mɔ amba mi bina, we kɛ mi gbini zã mi do we nu mɔ.

⁴⁶ Mi be sɛ mbulanɔ 'da mɔ hã ogã winɔ, nɛ sape bá sɛ li mi tɛ be ma gɔ.

⁴⁷ Mi kɔ̃a gɛnɛ we nu mɔ, nɛ mi do yangga wena we dɛ ma.

⁴⁸ Mi kala kɔ̃ mi dɛ ngɔ, nɛ mi dɔnggɔ mbulanɔ mɔ ia ni, nɛ mi yambala we nu mɔ.

⁴⁹ Aa NWA, mi a wi toe 'da mɔ, mɔ lénggé we kɛ mɔ tɔ̃a zi hã mi, nɛ ma gala mi na, mi gbini zã mi do mɔ ni.

⁵⁰ We nu mɔ ma nganda sila mi kɔ 'bako, nɛ ma hã ngawi hã mi.

⁵¹ Gɛnɛ kɔ owi walinɔ wa mɔmɔ mi, nɛ nde mi lá fala dɛ mbulanɔ 'da mɔ gɔ.

⁵² Aa NWA, ta zu mi gba ngɔ 'bili wenɔ mɔ 'bili zi ni fai, nɛ ma nganda sila mi.

⁵³ Fala kɛ mi zɔ owinɔ wa bɛ̃ we nu mɔ ni, nɛ sila mi dɛ dɛ tɛ wa fukuku.

⁵⁴ Bia wenɔ 'da mɔ ma hɔa zuma nu mi, mi kɛ mi a gɛnɛ ngɔ nù gɛ ni.

⁵⁵ Do tũi, nɛ mi lengge do mɔ NWA, nɛ mi fa we dɛ mbulanɔ 'da mɔ.

⁵⁶ Mɛ kɛ ma wia na mi dɛ ni, mɛ a dɔnggɔ we nu mɔ.

⁵⁷ Aa NWA, mi dala nu mi na, kpamɛ 'da mi vɛ̃, mɛ tati a dɛ olo nu mɔ.

⁵⁸ Mi fa do sila mi vɛ̃ na, mi hã yangga hã mɔ. Mɔ gala mi nɛ́ kɛ mɔ tɔ̃a ni.

⁵⁹ Mi yambala dɛa to tɛ mi, nɛ mi kɔ̃a we nɛ 'do mbulanɔ 'da mɔ.

⁶⁰ Mi zĩ́ tɛ mi we dɛ olo nu mɔ gɔ, nɛ mi dá'bá tɛ mi we dɛ ma gɔ.

⁶¹ Mi tia li bili 'da o'dã winɔ, nɛ nde ta mi èlè ngɔ mbulanɔ 'da mɔ gɔ.

⁶² Mi kulu ngɔ do gbogbo zã tũ, nɛ mi dɔnggɔ mɔ we bɔlɔ 'bili wenɔ 'da mɔ.

⁶³ Mi dɛ na do owinɔ vɛ̃ kɛ wa dɔnggɔ mɔ, nɛ wa dɛ mbula nu mɔ ni.

⁶⁴ Aa NWA, kɔ̃a zã 'da mɔ kpa ngɔ nù gɛ vɛ̃. Mɔ kɔ̃́, nɛ mɔ be li wala 'da mɔ hã mi.

⁶⁵ Aa NWA, mɔ dɛa dia mɔ hã mi, wi toe 'da mɔ, mɔ dɛa do mi nɛ́ kɛ mɔ kpua zi mbulu nɛ ni.

⁶⁶ Mɔ hã hã zã hã mi na, mi ĩ ti mbulanɔ 'da mɔ, nɛ mi kɔ̃ gɛnɛ nɛ, we kɛ mi gbini zã mi do ma.

⁶⁷ Mi yɔa zi wala, nɛ mɔ hã etumbu hã mi, nɛ nde ngangga gɛ, mi dɛ olo nu mɔ.

⁶⁸ Aa NWA, mɔ a wi dia sila, mɔ dɛ de mɔ wena, mɔ bé mbulanɔ 'da mɔ hã mi.

⁶⁹ O'dã wele wa 'danga zu li mi do bele, nɛ nde mi dɛ mbulanɔ 'da mɔ do sila mi vɛ̃.

⁷⁰ Gbãlã zã wa bi do'do, nɛ nde kɛ 'da mi, mi do yangga wena we dɛ olo nu mɔ.

⁷¹ Mɔ hã zi etumbu hã mi, nɛ ma dɛa na mi yambala mbulanɔ 'da mɔ, nɛ ki ni ma de tɛ mi wena.

⁷² We nu mɔ dia tɛ mi, nɛ ma nɛa ngɔ mbilinɔ ngɔ nù gɛ vɛ̃.

⁷³ Mɔ dɛa mi, nɛ mɔ hã ngawi hã mi, kɔ mi aka mɔ na, mɔ ha 'bɔ hã zã hã mi, takɔ mi ĩ gulu mbulanɔ 'da mɔ.

⁷⁴ Owinɔ 'da mɔ wa zɔ mi, nɛ wa dɛ yangga, we kɛ mi gbini zã mi do we nu mɔ.

⁷⁵ Aa NWA, mi ĩ na 'bili wenɔ 'da mɔ ma ɔ bɔlɔ, nɛ mɔ hã zi sape hã mi do gulu nɛ.

⁷⁶ E kɔ dia zã 'da mɔ ma nganda sila mi, nɛ́ kɛ mɔ tɔ̃a zi hã mi, wi toe 'da mɔ ni.

⁷⁷ Mɔ ĩ́ 'bako hã mi, nɛ mi kpasa sɛ, we kɛ mi do yangga we dɛ olo nu mɔ.

⁷⁸ E kɔ o'dã winɔ kɛ wa tɔ̃ bɛlɛ dɛ ngɔ mi ni, wa kpa sape. Nɛ nde kɛ 'da mi, mi lengge mbulanɔ 'da mɔ.

⁷⁹ E kɔ winɔ wa dɔnggɔ mɔ, nɛ wa ĩ ti we nu mɔ ni, wa mba ngba wa do mi.

⁸⁰ Mi kɔ̃a we dɛ olo nu mɔ do sila mi vɛ̃, na dɔ mi kpá sape gɔ.

⁸¹ Mi mbɔka tɛ 'bɔ 'da mɔ na, mɔ kpasa mi, nɛ mi gbini zã mi do we nu mɔ.

⁸² Gbali mi gɛ̃a tɛ 'bɔ 'da mbulanɔ 'da mɔ, nɛ mi aka tɛ mi na: “Mɔ gbaka sɛ mi soe ki nge nde?”

⁸³ Mi hɔa mɔ yala ɔ nɛ ua daka ni, nɛ nde ta mi èlè ngɔ mɛ mɔ kɔ̃a ni gɔ.

⁸⁴ Tala kɔ̃ tũ dungu nza 'da mi 'bana nɛ nde? Mɔ 'bili sɛ we 'da owi zɛlɛ tɛ mi soe ki nge nde?

⁸⁵ O'dã winɔ kɛ wa dɛ́ mbula 'da mɔ gɔ ni, wa gu kɔ̃ hã mi.

⁸⁶ Mbulanɔ 'da mɔ vɛ̃ a gbãlã we, owi sɛnɛ mi wa 'bili bɛlɛ dɛ ngɔ mi, nɛ wa zɛlɛ tɛ mi yala iko, kɔ mɔ tɛ́ hã mɔ gala mi.

⁸⁷ Mi tia zi nù, nɛ mi kɔlɔ dɔ̃ɔ do fio, nɛ nde mi là fala dɛ olo nu mɔ gɔ.

⁸⁸ Mɔ kpásá mi do dia zã 'da mɔ, nɛ mi dɛ sɛ olo nu mɔ.

⁸⁹ Aa nwa, mbula 'da mɔ ma 'bana sɛ fai, mɔ 'dafa fala we ma tɛ li nza i.

⁹⁰ Bɔlɔ zui 'da mɔ ma 'bana sɛ kɔ sabɛlɛ do sabɛlɛ, mɔ dɛa nùi, nɛ ma yula nganda.

⁹¹ Mɛnɔ vɛ̃ boe we duzu we nu mɔ, nɛ ma vɛ̃ ma zele nu mɔ.

⁹² Ɔ do kɛ mbula 'da mɔ dɛ̀ sɔ dia mɔ hã mi gɔ, nɛ 'bako ma gbɛ sɔ mi.

⁹³ Ta zu mi élé sɛ ngɔ we nu mɔ fala kpo gɔ, we kɛ mɔ kpasa mi do wala 'da ma.

⁹⁴ Mi a wi 'da mɔ, mɔ kpásá mi, we kɛ mi fa we dɛ olo nu mɔ.

⁹⁵ O'dã winɔ wa wɛ mi we gbɛ mi, nɛ nde mi lengge mbulanɔ 'da mɔ.

⁹⁶ Mi zɔa na, mɛnɔ vɛ̃ do ndɔti nɛ boe, nɛ nde we nu mɔ ma 'bana sɛ fai.

⁹⁷ Mi kɔ̃a gɛnɛ we nu mɔ la li ngele, nɛ mi lengge ma tũ kpo kpo.

⁹⁸ Mi ba mbula 'da mɔ dɛ zu mi fai, nɛ ma dɛa na, hã zã mi nɛ ngɔ Owi sɛnɛ mi.

⁹⁹ Mi do hã nɛa ngɔ owinɔ kɛ wa be mɛ hã mi ni, we kɛ mi lengge mbulanɔ 'da mɔ fai.

¹⁰⁰ Gbãlã zã mi siki nɛa ngɔ okpasa winɔ, we kɛ mi dɛ olo nu mɔ.

¹⁰¹ Mi bɛ̃a gɛnɛ yɛnggɛ li 'dã wala, we kɛ mi kɔ̃a we dɛ mbula 'da mɔ.

¹⁰² Mi dɛ olo nu mɔ do bɔlɔ nɛ, we kɛ mɔ a mɔ bia ma hã mi.

¹⁰³ We nu mɔ ɛ̃fɛ̃ tɛ mi wena, ma ɛ̃fɛ̃ nu mi nɛa ngɔ nɔ gɔlɔ.

¹⁰⁴ Gbãlã zã mi siki we mbulanɔ 'da mɔ, gulu nɛ a mi bɛa gɛnɛ dɛ 'dã mɔ.

¹⁰⁵ We nu mɔ yele dati mi ɔ nɛ mwinda ni, nɛ ma sa li wala 'da mi.

¹⁰⁶ Mbulanɔ 'da mɔ ma a bɔlɔ, mi dɛ sɛ ma fai ɔ nɛ kɛ mi kpua mbulu nɛ hã mɔ ni.

¹⁰⁷ Aa nwa, mi kpa sape la li ngele, kɔ mɔ kpásá mi ɔ nɛ kɛ mɔ kpua mbulu nɛ ni.

¹⁰⁸ NWA, mɔ kɔ̃́ gɛnɛ sambala kɛ mi dɔnggɔ do mɔ ni, nɛ mɔ bé 'bili wenɔ 'da mɔ hã mi.

¹⁰⁹ Mi hɔ fai fɛna fio, nɛ nde ta zu mi élé ngɔ mbulanɔ 'da mɔ gɔ.

¹¹⁰ O'dã winɔ wa ndɔ bili hã mi, nɛ nde mi lá fala dɛ do nu mɔ gɔ.

¹¹¹ We nu mɔ a gã kpamɛ 'da mi 'da fala fai, ma hã yangga kɔ sila mi.

¹¹² Mi kɔ̃a we dɛ do nu mɔ, mi kpa sɛ si olo nɛ fai.

¹¹³ Mi bɛ̃a gɛnɛ winɔ wa do sila wa bɔa ni, nɛ mi kɔ̃a gɛnɛ mbula 'da mɔ.

¹¹⁴ Mɔ a ngele amba bolo zu mi, mi gbini zã mi do we nu mɔ.

¹¹⁵ Nɛ, owi dɛ 'dã mɛnɔ, nɛ fó tɛ nɛ kɛ zã mi do'do, nɛ mi dɛ sɛ mbulanɔ 'da Gale 'da mi.

¹¹⁶ Aa NWA, mi gbini zã mi do mɔ, mɔ tɛ 'dàngà linggamɛ ni gɔ. Mɔ ha ngawi hã mi nɛ́ kɛ mɔ tɔ̃a ni, nɛ mi kpasa sɛ.

¹¹⁷ Mɔ yóló gba sala 'do mi, nɛ mi kpasa sɛ, nɛ mi lengge sɛ we nu mɔ fai.

¹¹⁸ Mɔ ndaka owinɔ wa bɛ̃a we dɛ do nu mɔ ni, we kɛ wa dɛ mɔ tɛ wa do bɛlɛ.

¹¹⁹ Mɔ da o'dã winɔ nù gɛ ngɔ zubu ɔ nɛ 'dɔlɔ bolo ni, gulu nɛ a mi kɔ̃a gɛnɛ we nu mɔ.

¹²⁰ Mi tana kili dati mɔ, nɛ kili 'bili wenɔ 'da mɔ ba mi wena.

¹²¹ Mi dɛ do nu mɔ do bɔlɔ nɛ, mɔ tɛ là mi dɛ kɔ̃ owi zɛlɛ tɛ mi gɔ.

¹²² Mi a wi toe 'da mɔ, mɔ bé mbe mɔ hã mi, takɔ mi ĩ na, mɔ gala sɛ mi, nɛ owi walinɔ wa zɛ́lɛ́ sɛ 'bɔ tɛ mi gɔ.

¹²³ Gbali mi gɛa tɛ 'bɔ 'da mɔ na, mɔ gala mi, nɛ mɔ kpasa mi, ɔ nɛ kɛ mɔ kpua mbulu nɛ ni.

¹²⁴ Mi ala nu mi hã mɔ na, mɔ dɛ mɛnɔ do mi do dia zã, nɛ mɔ bé li wala 'da mɔ hã mi.

¹²⁵ Mɔ fĩ́ hã zã mi wi toe 'da mɔ, takɔ mi ĩ ti mbulanɔ 'da mɔ.

¹²⁶ Aa NWA, mɔ dɛ́ mɔ, we kɛ ngba soe nɛ wia ia, owinɔ wa bɛ̃a we nu mɔ.

¹²⁷ Mi kɔ̃a mbulanɔ 'da mɔ la mɔ vɛ̃, mi kɔ̃a ma la mɔ mbali olo gã gole.

¹²⁸ Na mɛ ni, we nu mɔ ɔ li mi fai a bɔlɔ, nɛ mi bɛ̃a gɛnɛ dɛ 'dã mɔ.

¹²⁹ Mbulanɔ mɔ ia ni ma de wena, mi dɛ ma do sila mi kpo.

¹³⁰ Mɔ be we nu mɔ hã owinɔ, nɛ ma sa kɛ zã wa ɔ nɛ nyɛa we ni, nɛ ma hã siki gbãlã zã hã obe winɔ.

¹³¹ Mi nɔ we nu mɔ ɔ nɛ lì ni, we kɛ mi do wɔ nɛ wena.

¹³² Mɔ síkí li mɔ dɛ 'da mi, nɛ mɔ gálá mi, ɔ nɛ kɛ mɔ 'bili we gala do owi kɔ̃ zu li mɔ ni.

¹³³ Mɔ ngándá sila mi nɛ́ kɛ mɔ kpua zi mbulu nɛ ni, nɛ mɔ tɛ là 'dã mɔ, hã ma nɛ ngɔ mi gɔ.

¹³⁴ Mɔ kpásá mi ti kɔ̃ owinɔ wa zɛlɛ tɛ mi ni, takɔ mi dɛ olo nu mɔ.

¹³⁵ Mɔ kpɔ́ kɔ̃ mɔ ti mi, wi toe 'da mɔ, nɛ mɔ bé we nu mɔ hã mi.

¹³⁶ Mi hia, nɛ mili kɔ̃a li mi 'bɔa tɛ mi vɛ̃, we kɛ mi zɔa na owinɔ wa dɛ́ mbula 'da mɔ gɔ.

¹³⁷ Aa nwa, mɔ a wi bɔlɔ zu, mɔ 'bili wenɔ 'da mɔ do bɔlɔ nɛ.

¹³⁸ Mbulanɔ kɛ mɔ ia ni ma bɔlɔ wena, nɛ mɛ a gbãlã we ngboo.

¹³⁹ Mi zɔ owi sɛnɛ mi, kɛ ta zu wa ila ngɔ we nu mɔ ni, nɛ zã mi nɔ̃lɔ̃ nganda wena.

¹⁴⁰ Mbulanɔ 'da mɔ ma dɛa tɛ̃ ɛ gbãlã we, nɛ mi, wi dɛa toe 'da mɔ, mi kɔ̃a gɛnɛ nɛ.

¹⁴¹ Mi gɛ a be wi, nɛ winɔ wa zɔ mi li wa yala iko, nɛ nde ta zu mi èlè ngɔ we nu mɔ gɔ.

¹⁴² Bɔlɔ zui 'da mɔ ma 'bana sɛ kɔ sabɛlɛ do sabɛlɛ, nɛ we nu mɔ fai a gbãlã we.

¹⁴³ Mi kpa ngamɔ do 'bako, nɛ nde mbulanɔ 'da mɔ hã yangga hã mi.

¹⁴⁴ Mbulanɔ 'da mɔ fai a bɔlɔ, mɔ dɛ̃ na mi ĩ ti gulu nɛ, nɛ mi 'bana do tunu li mi.

¹⁴⁵ Aa NWA, mi sa mɔ hã mɔ do sila mi vɛ̃, mɔ kɔ̃ nu mi, nɛ mi dɛ sɛ olo nu mɔ.

¹⁴⁶ Mi sa mɔ hã mɔ na mɔ kpásá mi, nɛ mi dɛ sɛ mbulanɔ 'da mɔ.

¹⁴⁷ Do sanga zɛ, nɛ mi sa mɔ hã mɔ na mɔ gbaka mi, nɛ mi gbini zã mi do we nu mɔ.

¹⁴⁸ Mi 'bã li mi do tũi, nɛ mi lengge mbulanɔ 'da mɔ.

¹⁴⁹ Aa NWA, mɔ a wi dia sila, mɔ zélé sa mɛ 'da mi, mɔ ĩ́ 'bako hã mi, nɛ mɔ kpasa mi.

¹⁵⁰ O'dã winɔ wa wɛ mi we zɛlɛ tɛ mi, wa lénggé do mbulanɔ 'da mɔ gɔ.

¹⁵¹ Nɛ nde mɔ NWA, mɔ kɔlɔ do mi dɔ̃ɔ, nɛ mbulanɔ 'da mɔ vɛ̃ a gbãlã we.

¹⁵² Mɔ ia we nu mɔ na ma 'bana fai, nɛ mi ĩ ti nɛ zi belee.

¹⁵³ Mɔ zɔ́ 'bakoe 'da mi hã mɔ kpasa mi, we kɛ ta zu mi èlè ngɔ mbula 'da mɔ gɔ.

¹⁵⁴ Mɔ yóló 'do mi hã mɔ tɔ̃ ngbangga ngɔ mi, mɔ fó mi li ngbangga nɛ́ kɛ mɔ kpua mbulu nɛ ni.

¹⁵⁵ O'dã winɔ wa kpásá sɛ gɔ, we kɛ wa dɛ́ mbulanɔ 'da mɔ gɔ.

¹⁵⁶ NWA, mɔ do mbɔkɔ li wena, mɔ lá mi do tunu li mi ɔ nɛ kɛ mɔ 'bili ni.

¹⁵⁷ Owi sɛnɛ mi do Owi zɛlɛ tɛ mi wa dɛlɛ wena, nɛ nde mi là fala dɛ olo nu mɔ gɔ.

¹⁵⁸ Fala kɛ mi zɔ owinɔ wa vũ to tɛ mɔ Gale ni, nɛ sila mi 'danga dɛ tɛ wa, we kɛ wa dɛ́ olo nu mɔ gɔ.

¹⁵⁹ Aa NWA, mɔ ĩ́ na, mi kɔ̃a gɛnɛ mbulanɔ 'da mɔ wena, mɔ bé gã dia zã 'da mɔ hã mɔ kpasa mi.

¹⁶⁰ Gba gulu we nu mɔ, mɛ a gbãlã we, nɛ bɔlɔ 'bili wenɔ mɔ 'bili ni, ma vɛ̃ ma 'bana sɛ kɔ sabɛlɛ do sabɛlɛ.

¹⁶¹ Ogã winɔ wa zɛlɛ tɛ mi yala iko, nɛ nde mi dɛ tati a kili mbulanɔ 'da mɔ.

¹⁶² We nu mɔ hã yangga hã mi, ɔ nɛ kɛ mi kpa gã kpamɔ ni.

¹⁶³ Mi bɛ̃a gɛnɛ bɛlɛ, nɛ mi sɛnɛ ma wena, nɛ nde mi kɔ̃a gɛnɛ mbulanɔ 'da mɔ.

¹⁶⁴ Tũ kpo kpo, nɛ mi dɔnggɔ mɔ fala sambo, we duzu bɔlɔ 'bili wenɔ 'da mɔ.

¹⁶⁵ Owinɔ wa kɔ̃a gɛnɛ mbulanɔ 'da mɔ ni, wa kpa dia dungu ngboo, nɛ fo mɔ we kele wala ti wa bina.

¹⁶⁶ Aa nwa, mi dɛ mbulanɔ 'da mɔ, nɛ mi 'bɔ 'da mɔ na, mɔ kpasa mi.

¹⁶⁷ Mi dɛ olo nu mɔ do sila mi kpo, nɛ mi kɔ̃a gɛnɛ nɛ la li ngele.

¹⁶⁸ Mi dɛ mbulanɔ 'da mɔ do we nu mɔ, nɛ mɛnɔ vɛ̃ mi dɛ ni, mɔ zɔ ma zɔa.

¹⁶⁹ Aa nwa, mɔ bé dia zã 'da mɔ, nɛ mɔ zele sa mɔ ala nùi 'da mi. Mɔ dɛ́ na gbãlã zã mi siki ɔ nɛ kɛ mɔ tɔ̃a ni.

¹⁷⁰ E kɔ ala nui 'da mi gbo zala mɔ, nɛ mɔ kpasa mi ɔ nɛ kɛ mɔ kpua zi mbulu nɛ ni.

¹⁷¹ E kɔ mi dɔnggɔ mɔ 'da fala fai, we kɛ mɔ bia mbula 'da mɔ hã mi.

¹⁷² E kɔ mi ga mbulanɔ 'da mɔ do zuma, we kɛ we nu mɔ vɛ̃ a gbãlã we.

¹⁷³ E kɔ mɔ gala mi 'da fala fai, we kɛ mi dɛ olo nu mɔ.

¹⁷⁴ Aa nwa, mi do hɛ̃lɛ̃ wena na mɔ kpasa mi. We nu mɔ hã yangga hã mi wena.

¹⁷⁵ E kɔ mi 'bana do tunu li mi hã mi dɔnggɔ mɔ, e kɔ 'bili wenɔ 'da mɔ ma gala mi.

¹⁷⁶ Mi yɛnggɛ mba mba ɔ nɛ bata kɛ a yɔa wala ni, kɔ mɔ tɛ hã mɔ fa mi, wi toe 'da mɔ, we kɛ ta mi èlè ngɔ we nu mɔ gɔ.