Zumanɔ 118 - WE NU GALE 1995

Lɛ tɔ̃́ lɛnggɛ mɛnɔ kɛ NWA dɛa ni

¹ Lɛ dɔ́nggɔ́ NWA, we kɛ a a wi dia sila, nɛ dia zã 'da a ma 'bana sɛ fai.

² Aa nɛ, obe Israɛlɛ, nɛ dálá nu nɛ tɛ we gɛ na, dia zã 'da nwa ma 'bana sɛ fai.

³ Nɛ, onganganɔ, obe zã Aroni, nɛ dálá nu nɛ na, dia zã 'da nwa ma 'bana sɛ fai.

⁴ Nɛ, ogele winɔ kɛ nɛ dɔnggɔ nwa ni, nɛ dálá nu nɛ na, dia zã 'da NWA ma 'bana sɛ fai.

⁵ Mi zi a kɔ ngamɔ, nɛ mi sa mɔ hã nwa, nɛ a kɔ̃a nu mi, nɛ a kpasa mi.

⁶ NWA do mi boe, mi wè tɛ dɛ kili mɔ kpo gɔ, wele wè we dɛ 'dã mɔ do mi gɔ.

⁷ NWA do mi boe, a yolo gba sala 'do mi, nɛ mi nɛ ngɔ owi sɛnɛ mi li bolo.

⁸ Gbini zã wi do NWA de wena, ma dia nɛa ngɔ gbini zã wi do wele.

⁹ Gbini zã wi do NWA de wena, ma dia nɛa ngɔ gbini zã wi do ogã winɔ.

¹⁰ Ogba dɔa wi sɛnɛ mi wa linggi zi mi, nɛ mi ndaka wa do ngawi 'da NWA.

¹¹ Wa tɛa zi, nɛ wa zĩ mi takpa, nɛ mi ndaka wa do ngawi 'da NWA.

¹² Wa fi mi dɛ gbogbo wa ɔ nɛ ogɔlɔ ni, nɛ nde ngawi 'da wa bɛlɛ, nɛ ma liti dɔ̃ ɔ nɛ zɔ̃ ni, nɛ mi ndaka wa do ngawi 'da NWA.

¹³ Wa bi zi mi, nɛ wa nɛa we gbɛ mi, nɛ nde NWA gala mi.

¹⁴ NWA hã gã ngawi hã mi, nɛ mi kpasa we duzu ma.

¹⁵ NWA kpasa owinɔ 'da a, owi bɔlɔ zunɔ, we duzu ma, wa he mɔ yangga kɔ tɔanɔ 'da wa gboo. Nɛ wa na: “Ngawi 'da NWA nɛa ngɔ Owi sɛnɛ lɛ.

¹⁶ Gɛlɛ kɔ̃ a si ngɔ, nɛ a nɛa ngɔ wa li bolo!”

¹⁷ Mi fé sɛ gɔ, mi 'bana sɛ do tunu li mi, takɔ mi tɔ̃ lɛnggɛ mɛnɔ NWA dɛa ni.

¹⁸ Gbãlã we, NWA hã zi etumbu hã mi, nɛ nde a fì mi li fio gɔ.

¹⁹ Nɛ fĩ́ nu tɔa Tɛmpɛloe hã mi, takɔ mi le we dɔnggɔ NWA.

²⁰ Mɛ a nu ngboe 'da NWA, e kɔ Owi bɔlɔ zunɔ wa le do ma.

²¹ Mi dɔnggɔ NWA, we kɛ a kɔ̃a nu mi, nɛ a dɛa na mi nɛ ngɔ Owi sɛnɛ mi.

²² Ta kɛ owi dɛ tɔanɔ wa da zi ma nù ni, ma hɔa ta bɛlɛduma tɔa, nɛ tɔa yolo we duzu ma.

²³ Wi dɛa mɛ ni, wi a NWA, nɛ ki ni mɛ a ɔngbamɔ gbali lɛ.

²⁴ Sɔɛ gɛ, mɛ a tũ kɛ lɛ dɛ yangga, nɛ ta zu lɛ gba ngɔ kɛ NWA nɛa ngɔ owi sɛnɛ lɛ ni.

²⁵ Aa NWA, mɔ gbáká lɛ! Mɔ dɛ́ na, mɛnɔ lɛ dɛ ni ma Sɔkpɔ do dia nɛ.

²⁶ E kɔ NWA Gale wele nu ɛ tɛ wi kɛ a le kɔ Tɛmpɛloe gɛ do zu li a ni. Lɛ owinɔ kɔ Tɛmpɛloe 'da NWA gɛ, lɛ gbangba 'da wele nui 'da a hã nɛ.

²⁷ NWA a Gale zu a kpo, e kɔ yele ngbala 'da a yele kɛ zã lɛ. Nɛ kálá nwá 'bete dɛ kɔ̃ nɛ, nɛ nɛ la tɛ zĩ do gbagala kolo kolo.

²⁸ Aa NWA, mɔ a Gale 'da mi, mi dɔnggɔ mɔ, nɛ mi tɔ̃ dia zu li mɔ.

²⁹ Lɛ dɔ́nggɔ́ NWA, we kɛ a a wi dia sila, nɛ dia zã 'da a ma 'bana sɛ fai.