Zumanɔ 116 - WE NU GALE 1995

Sambala 'da wi kɛ Gale kpasa a kɔ fio

¹ Mi kɔ̃a gɛnɛ NWA, we kɛ a zila sa mɛ 'da mi.

² A gɛa zala a hã mi, mi sa sɛ mɔ hã a kɔ dungu nza 'da mi vɛ̃.

³ Ngawi 'da fio zĩ zi mi takpa, nɛ nu ngbo 'da ofionɔ kpia dɛ ngɔ mi, nɛ kili ba mi, nɛ mi dɛ 'bako wena.

⁴ Nɛ mi hia mɔ do li NWA na: “Aa NWA, mɔ kpásá mi!”

⁵ NWA Gale 'da lɛ a wi bɔlɔ zu do wi dɛ de mɔ, sila a dunu do kɔ̃a zã.

⁶ A zɔ mɔ tɛ obe winɔ, mi zi a kɔ ngamɔ, nɛ a kpasa mi.

⁷ Ngangga ni, sila mi wia we gɛ̃ nɛ, we kɛ NWA dɛa odia mɔ hã mi.

⁸ NWA 'bia mi na mi tɛ tè gɔ, a dili mili kɔ̃a li mi nɛ ma kolo, nɛ a kpasa mi kɔ fio.

⁹ Nɛ mi 'bana do tunu li mi dɛ ngɔ nù gɛ, nɛ mi yɛnggɛ fala nɛ kpo do a.

¹⁰ Gɛnɛ kɔ mi tɔ̃ zi na: “Mi do 'bako wena”, nɛ nde mi gbini zã mi do NWA fai.

¹¹ Zu mi vĩ zi, nɛ mi na: “Wele wè tɛ gbini zã a do ngba a gɔ.”

Nɛ nde mi gbini zã mi do NWA.

¹² Mɛ kɛ mi nɛ hã hã NWA, we si olo dia mɛ a dɛa do mi ni a ge nde?

¹³ Mi ba sɛ kɔpɔ dɔ̃, nɛ mi dɔnggɔ do a, nɛ mi gese iɔ̃nae hã a olo kɛ a kpasa mi ni.

¹⁴ Mbuli mi kpua hã NWA ni, mi dɛ sɛ ma sanga mba li ngba wi 'da owinɔ 'da a.

¹⁵ Wi mɔ́ NWA fe, nɛ ma zɛlɛ tɛ̃ a wena.

¹⁶ Aa NWA, mi a wi dɛa toe 'da mɔ, mi dɛ to hã mɔ ɔ nɛ kɛ naa mi dɛ zi hã mɔ ni. Mɔ kpasa zi mi kɔ fio.

¹⁷ Mi hã sɛ dɔnggamɔ we gese iɔ̃nae hã NWA, nɛ mi dɔnggɔ sɛ dia zu li a.

¹⁸ Mbuli mi kpua hã NWA ni, mi dɛ sɛ ma sanga mba li ngba wi 'da owinɔ 'da a,

¹⁹ tɛ kɔ ngbo Tɛmpɛloe 'da a, tɛ gbogbo zã le Yeruzalɛmɛ. Aleluya, lɛ dɔ́nggɔ́ NWA!