Zumanɔ 111 - WE NU GALE 1995

Lɛ lénggé oɔngbamɛnɔ NWA dɛ ni

¹ Aleluya, lɛ dɔ́nggɔ́ nwa! Mi nɛ dɔnggɔ nwa do sila mi vɛ̃ tɛ kɔ mba li ngba wi 'da owinɔ 'da a.

² Mɛnɔ kɛ NWA dɛ ni, mɛ a gba mɔ. Owinɔ vɛ̃ kɛ wa kɔ̃a gɛnɛ ma ni, wa yambala gulu nɛ fai.

³ Mɛnɔ vɛ̃ kɛ a dɛ ni, ma be dɔ̃lɔ̃ li do gã wi 'da a. Bɔlɔ zui 'da a ma 'bana sɛ fai.

⁴ NWA kɔ̃a na, ta zu lɛ 'bana ngɔ ɔngbamɛnɔ ɛ dɛ ni, a a wi dia sila do wi mbɔkɔ li.

⁵ A hã nyɔngɔmɔ hã owinɔ wa dɛ kili a ni, nɛ ta zu a élé ngɔ mbuli a kpua hã wa ni gɔ.

⁶ A dɛa mɔ ngawi hã owinɔ 'da a, a ba nùi kɔ̃ ogele winɔ, nɛ a 'dɔlɔ hã wa.

⁷ Gbãlã we do bɔlɔ zu be tɛ̃ ɛ li toe 'da a. Lɛ wia we gbini zã lɛ do mbulanɔ a e ni.

⁸ A e mbula 'da a do bɔlɔ nɛ, do gbãlã we, nɛ ma 'bana sɛ fai.

⁹ A fua owinɔ 'da a ti mbula 'da ogele winɔ, nɛ a kpua mbulu hã wa, nɛ mbuli ni ma 'bana sɛ fai. A a Gale santo, a a wi hã kili hã wi.

¹⁰ Ndo nyanga kpa hã zã, mɛ a dɛ kili NWA. Winɔ vɛ̃ kɛ wa dɛ kili a ni, wa be na, gbãlã zã lo boe. Ma wia na, lɛ dɔnggɔ nwa fai!