Zumanɔ 11 - WE NU GALE 1995

Kɔ ngamɔ nɛ mi gbini zã mi do NWA

1 Zuma 'da Davidi

¹ Zuma 'da Davidi Wi kɛ a kele zu mi, wi a NWA Gale. Kɔ gulu kɛ nɛ owinɔ, nɛ tɔ̃ hã mi na, mi yú nganda wena dɛ ngɔ kalanɔ i, ɔ nɛ kɛ mi a nɔɛ ni we ge nde?

² Nɛ nɛ tɔ̃ 'bɔ na, o'dã winɔ wa 'dafa kpili dɛ li nzabele, nɛ wa mana ma do ti tũ nɛ we ndɔlɔ do wi dia silanɔ.

³ Fo 'bɔ mbula ngɔ lenɔ bina, nɛ dia wele wè 'bɔ tɛ dɛ de mɔ gɔ.

⁴ Nɛ nde mi ĩ na, NWA dungu kɔ Tɛmpɛloe 'da a kɛ ma santo. Kpongbo nwa 'da a, ma a tɛ li nza i. A ka mɔ tɛ owinɔ falanɔ vɛ̃, nɛ a ĩ ti mɛnɔ kɛ wa dɛ ma ni.

⁵ NWA ĩ ti Owi bɔlɔ zunɔ, nɛ a ĩ 'bɔ ti o'dã winɔ. A sɛnɛ wi kɛ a hã ngamɔ hã ongba a ni.

⁶ Aa NWA, mɔ tómbó gba nyɛa we, do okãlĩ we, hã ma ala dɛ ngɔ o'dã winɔ ɔ nɛ tɛa kolo ni. Mɔ tómbó gba bũ kamba dɛ ngɔ wa we hã do etumbu hã wa.

⁷ NWA, mɔ a wi bɔlɔ zu, nɛ mɔ kɔ̃a gɛnɛ mɔ kɛ ma ɔ bɔlɔ ni. Owinɔ kɛ wa dɛ mɔ do bɔlɔ nɛ ni, wa zɔ sɛ mɔ do li wa ngboo.