Zumanɔ 108 - WE NU GALE 1995

Sambala we gɔ gbaka wi kɔ̃ Gale

¹ Zuma 'da Davidi

² Aa Gale, sila mi gɛ̃a, nɛ mi do yangga. Mi kɔ̃a we ga zuma we dɔnggɔ do mɔ.

³ Mi nɛ kulu ngɔ do titole belee, dati kɛ na wese kulu ngɔ ni, mi nɛ ba kembe do kundi 'da mi dɛ kɔ̃ mi, hã mi zɛ ma.

⁴ Aa NWA, mi gese sɛ iɔ̃nae hã mɔ, nɛ mi dɔnggɔ sɛ mɔ dɛ sanga onu kɔnggɔ winɔ.

⁵ Mba gɔ, kɔ̃a zã 'da mɔ we owinɔ 'da mɔ, ma gã la mɔ vɛ̃, nɛ dia zã 'da mɔ ma nɛa gbaa, nɛ ma la ngɔ li nza.

⁶ Aa Gale, mɔ kúlú ngɔ tɛ li nza i, nɛ mɔ be na mɔ a gã wi, nɛ dɔ̃lɔ̃ li 'da mɔ pɛsɛ ngɔ nù nga vɛ̃.

⁷ Mɔ kɔ̃́ nu mi, hã mɔ kpásá lɛ. Lɛ a owinɔ kɛ lɛ ngɔ sila mɔ. Mɔ bé ngawi 'da mɔ, nɛ mɔ fó lɛ kɔ ngamɔ.

⁸ Gale a kɔ Tɛmpɛloe 'da a kɛ ma santo, nɛ a tɔ̃a na: “Mi nɛ sɛ ngɔ Owi sɛnɛ mi, nɛ mi kala sɛ le Sikɛmɛ do gbangɔlɔ̃ Sukɔtɛ, nɛ mi gɔnɔ sanga nɛ dɛ kɔ̃ owinɔ 'da mi.

⁹ Nù Galadɛ do Manase a mɔ́ mi, nɛ nù Efraimɛ, mɛ a ndasa 'da mi, nɛ dɔndɔlɔ nwa 'da mi, mɛ a nù Yuda.

¹⁰ Nù Moabɛ ma hɔ sɛ gba sani fɔlɔ tɛ mi, nɛ mi da sɛ mɔ nyanga mi dɛ ngɔ nù Edɔmɛ, takɔ wa ĩ na mɛ a mɔ́ mi. Nɛ mi he sɛ hiamɔ ngawi zu Ofilisti.”

¹¹ Wi kɛ a wia we e mi kɔ le kɛ gba ngboe zĩ ma takpa ni a wio nde? Wi kɛ a wia we kpe ti mi, kɔ a e mi ngɔ nù Edɔmɛ a wio nde?

¹² Wi tati a mɔ Gale gɔ nde? Nɛ nde mɔ bɛ̃a gɛnɛ lɛ, nɛ mɔ ka 'bɔ osodanɔ 'da lɛ li bolo gɔ.

¹³ Aa Gale, mɔ gálá lɛ dati Owi sɛnɛ lɛ. Mba gɔ, gala wi kɛ ma yolo kɔ́ wele ni, ma a mɔ yala iko.

¹⁴ Nɛ nde lɛ mba do Gale fala nɛ kpo, nɛ lɛ dɛ sɛ gba mɔ, wi nɛ sɛ ngɔ owi sɛnɛ lɛ, wi a a.