Zumanɔ 107 - WE NU GALE 1995

MƆLƆ 'BUKU ZUMANƆ (Zumanɔ 107—150) Gale a wi dia sila

¹ Lɛ dɔnggɔ NWA, we kɛ a a wi dia sila, kɔ̃a zã 'da a ma 'bana sɛ fai.

² Aa nɛ, owinɔ 'da NWA, nɛ tɔ̃́ lɛnggɛ gɛ kɔ sambala 'da nɛ, nɛ nɛ dala nu nɛ tɛ nɛ. Nɛ a owinɔ kɛ NWA fua nɛ ti kɔ̃ Owi sɛnɛ nɛ.

³ A kala nɛ ngɔ gele nùnɔ vɛ̃, yolo 'biti gba wese we hɔ 'biti gɛ̃a wese, yolo gbãlã ngɔ we hɔ ba gɔtɔ, nɛ a mba li nɛ kpo.

⁴ Ombe winɔ wa yɔa zi dɛ li gba zɔ̃, nɛ wa fa li wala le we si dɛ tɛ nɛ zãa.

⁵ Nɛ wa ala wɔ, nɛ kɔ gɛlɛ wa kula tɛ wɔ lì, nɛ ngawi 'da wa ia vɛ̃.

⁶ Nɛ dɛ kɔ 'bakoe ni, wa sa mɔ hã NWA, nɛ a kpasa wa kɔ ngamɔ.

⁷ A kã wa do dɔ wala dɛ tɛ le, kɛ wa wia we ɔ kɔ nɛ ni.

⁸ E kɔ wa dɔnggɔ NWA we kɔ̃a zã 'da a, do we ɔngbamɛnɔ a dɛa we wa ni.

⁹ A hã lì hã owinɔ wa ala wɔ lì ni, nɛ wanɔ wa fe wɛ ni, a hã nyɔngɔmɔ hã wa, nɛ ma hɛ̃a zã wa.

¹⁰ Ombee nɛ, wa kala zi wa do bɔlɔkɔ, nɛ wa fi dɔkpɔ gɛlɛ wa, nɛ wa a wa kɔ tũ tɔa.

¹¹ We kɛ wa bɛ̃a zi nu Gale, kɛ a nɛa ngɔ mɔ vɛ̃ ni, nɛ wa dɛ̃ mbulanɔ 'da a gɔ.

¹² Nɛ a ia dĩ tole ngamɔ zu wa, nɛ te 'do wa bili ti nɛ, nɛ nde fo wi ba ma zu wa bina.

¹³ Nɛ dɛ kɔ ngamɛ ni, wa sa mɔ hã NWA, nɛ NWA fua wa kɔ 'bako.

¹⁴ A fua wa kɔ tũ tɔa bɔlɔkɛ dɛ nza, nɛ a yala dɔkpɛ gɛlɛ wa.

¹⁵ E kɔ wa dɔnggɔ NWA we kɔ̃a zã 'da a, do we ɔngbamɛnɔ a dɛa we wa ni.

¹⁶ A ua gbangga tũ mɔ bolonɔ, nɛ a gbini mɔ bolonɔ, kɛ wa kpe do nu ngboe, nɛ wa kã do ma ni.

¹⁷ Ombee nɛ wa dɛa 'dã mɔ, nɛ ma vĩ zu wa, nɛ wa kpa zɛlɛ tɛ olo 'dã mɛnɔ ni.

¹⁸ Nyɔngɔmɔ dé 'bɔ nu wa gɔ, nɛ wa 'bɔ fio iko.

¹⁹ Nɛ dɛ kɔ ngamɛ ni, wa sa mɔ hã NWA, nɛ NWA fua wa kɔ 'bako.

²⁰ A ba nu a fala kpo, nɛ a kpasa wa, nɛ a fo wa kɔ fio.

²¹ E kɔ wa dɔnggɔ NWA we dia zã 'da a, do we ɔngbamɛnɔ a dɛa we wa ni.

²² E kɔ wa hã dɔnggamɔ hã Gale, e kɔ wa ga zuma yangga we tɔ̃ sako mɛnɔ a dɛa ni.

²³ Ombee nɛ wa lia zi masua, nɛ wa yɛnggɛ tɛ dɛ to 'da wa do ngɔ gba li i.

²⁴ Nɛ wa zɔa mɛnɔ kɛ NWA dɛ ni, wa zɔa ɔngbamɛnɔ 'da a tɛ ngɔ gba li i.

²⁵ A ba nu a kpo, nɛ gba bũ kamba dɛa, nɛ ma fi ngele ngɔ gba li.

²⁶ Ma go'do do masua 'da wa dɛ ngɔ, nɛ ma gbɛsɛ do ma ɔ nɛ kɛ ma tia 'du kɔ̃ ni. Nɛ gba li dɛa na wa ba zɛlɛ, nɛ wa ɔ̃lɔ̃.

²⁷ Zu wa zĩ, nɛ wa bɛmbɛ ɔ nɛ wi bá dɔ̃ ni, nɛ gbãlã zã wa bi do'do.

²⁸ Nɛ dɛ kɔ ngamɛ ni, wa sa mɔ hã NWA, nɛ NWA fua wa kɔ 'bako.

²⁹ A dɛa na, ngɔ tɛ gba bũ kamba gɛ̃, nɛ ngele li mbɔkɔ.

³⁰ Nɛ wa zɔa kɛ ngawi 'da li gɛ̃a dɛ olo nɛ ni, nɛ wa dɛa yangga. Nɛ Gale kã wa do dia nɛ dɛ nu kolo li wa kɔ̃a ni.

³¹ E kɔ wa dɔnggɔ NWA we kɔ̃a zã 'da a, do we ɔngbamɛnɔ a dɛa we wa ni.

³² E kɔ wa tɔ̃ lɛnggɛ gã wi 'da a sanga owinɔ, e kɔ okpasa winɔ wa dɔnggɔ a kɔ mba li ngba wi 'da wa.

³³ NWA dɛa na, fua li ɔ̃sɔ̃ na nù, nɛ dɛka lìnɔ kolo, nɛ nùi kifi li go.

³⁴ Nɛ a dɛa 'bɔ na, dia nù mi kpalɛ 'danga, nɛ kpalɛ tɛ dè 'bɔ tɛ nɛ gɔ. A dɛa ni we si olo 'dã mɛ 'da owinɔ ngɔ nùi ni.

³⁵ Nɛ nde a dɛa 'bɔ na, li fo tɛ li go, nɛ nga kula nù kifi dɛka li.

³⁶ Nɛ a kala owi wɔnɔ, nɛ a a wa di ni, nɛ wa dɛ tɔa ngɔ nùi ni.

³⁷ Nɛ wa wa fɔ, nɛ wa mi vinɔ, nɛ wa kala okpalɛ li fɔnɔ 'da wa.

³⁸ A wele nu a tɛ wa, nɛ wa ko ogba dɔa be. Nɛ a ia onadalamɛnɔ 'da wa na, wa dɛlɛ.

³⁹ 'Do nɛ, nɛ owinɔ 'da Gale wa kpa ngamɔ do zɛlɛ tɛ ti mbula 'da Owi sɛnɛ wa, nɛ wa 'bànà 'bɔ dɛlɛ gɔ.

⁴⁰ Gale dɛa na, ogã wi ngɔ wa wa hɔ mɔ yala, nɛ wa yɛnggɛ mba mba do li gba zɔ̃.

⁴¹ Nɛ nde a kpasa Owi 'bakonɔ, nɛ a dɛa na, nu kpala wa dɛlɛ ɔ nɛ onadalamɔ ni.

⁴² Odia winɔ wa zɔa mɛnɔ ni vɛ̃, nɛ wa dɛ yangga we duzu ma. Nɛ o'dã winɔ vɛ̃ wa kpe nu wa.

⁴³ E kɔ wi hã zã lengge mɛnɔ NWA dɛa ni, nɛ a ĩ na, NWA a wi dia sila.