Zumanɔ 106 - WE NU GALE 1995

Gale do dia zã we owinɔ 'da a

¹ Aleluya, lɛ dɔ́nggɔ́ NWA fai! Lɛ dɔ́nggɔ́ NWA we kɛ a a wi dia sila, nɛ kɔ̃a zã 'da a do ndɔti nɛ bina.

² Wi kɛ a wia we tɔlɔ gba mɛnɔ kɛ NWA dɛa ma ni vɛ̃, wi a wio nde? Wi kɛ a wia we dɔnggɔ NWA nɛ́ kɛ ma wia ni, wi a wio nde?

³ Owinɔ kɛ wa dɛ mbulanɔ 'da Gale, nɛ wa dɛ to tɛ wa fai ɔ bɔlɔ ni, wa a wi yangga.

⁴ Aa NWA, kpadɛ nɛ mɔ lengge do mi, do fala kɛ mɔ be sɛ dia zã hã owinɔ 'da mɔ ni. Mɔ kpásá sɛ mi fala nɛ kpo do wa,

⁵ takɔ mi zɔ dia dungu kɛ wa kpa sɛ ni, nɛ mi dɛ yangga fala nɛ kpo do wa, kɛ mɔ saka wa ni.

⁶ Lɛ dɛa 'dã mɔ ɔ nɛ kɛ oyaa lɛ wa dɛa zi ni, lɛ dɛ̃ de gɔ, nɛ lɛ tia li ngbangga.

⁷ Aa NWA, 'da fala kɛ oyaa lɛ wa zi a ngɔ nù Ezipeto wa ĩ̀ zi ti gulu ɔngbamɛnɔ mɔ dɛa ni gɔ. Ta zu wa ila zi ngɔ gã dia zã 'da mɔ, kɛ mɔ be zi hã wa 'do ngbɛ ɛ do 'do ngbɛ ɛ ni. Nɛ wa bɛ̃a we nu mɔ tɛ nu gba lì Sala Tɔ̃.

⁸ Nɛ nde mɔ kpasa wa we lengge do dɔ̃lɔ̃ li 'da mɔ, takɔ mɔ be ngawi 'da mɔ dɛ nza.

⁹ Mɔ ba nu mɔ fala kpo, nɛ gba lì Sala Tɔ̃ ɔ̃sã na nù, nɛ owinɔ 'da mɔ wa la do olo wakala lì, ɔ nɛ wa la ngɔ kula nù ni.

¹⁰ Mɔ bɛ̃a we ngɔ wa hã owi zɛlɛ tɛ wa, nɛ mɔ kpasa wa ti kɔ̃ Owi sɛnɛ wa.

¹¹ Mɔ dɛa na, lì nɛ ngɔ owi sɛnɛ wa, nɛ wele kpo sanga wa ni kpàsà gɔ.

¹² Na mɛ ni, nɛ owinɔ 'da mɔ wa kɔ̃a gɛnɛ mbuli 'da mɔ, nɛ wa ga zuma we dɔnggɔ do mɔ.

¹³ Nɛ nde 'da kala gɔ, nɛ ta zu wa ila ngɔ mɛnɔ mɔ dɛa ni, nɛ wa 'bɔ̀ na, mɔ dɛ mɛnɔ mɔ 'dafa ni gɔ.

¹⁴ Wa hɔa li gba zɔ̃ i, nɛ wa 'bã mɛnɔ wa zɔla ma ni, nɛ wa yamba sila mɔ Gale.

¹⁵ Nɛ mɔ hã mulu sa'de wa gɔa ni hã wa, nɛ wa nyɔngɔ gbaa, nɛ ma nɛ ngɔ sila wa.

¹⁶ Nɛ tɛ fala ɔinɔ i, wa dɛa bɔnɛ hã Mɔizɛ, do Aroni, wi toe kɛ mɔ nwa, mɔ saka a ni.

¹⁷ Ma hã nùi fi, nɛ ma kpe dɛ ngɔ Datanɛ, fala nɛ kpo do Abiramɛ do owinɔ 'da a.

¹⁸ Nɛ mɔ tumba gba nyɛa we dɛ ngɔ Owi bɛ̃ wenɔ ni, nɛ ma bɛlɛ wa vɛ̃.

¹⁹ Wa hɔa tɛ kala Horɛbɛ, nɛ wa dula be wili ngɔmbɔ, nɛ wa dɔnggɔ kpikima wa dula ni.

²⁰ Wa la fala dɔnggɔ Gale kɛ a gã wena ni, nɛ wa dɔnggɔ ngɔmbɔ kɛ a a sa'de nyɔngɔ wɔkɔsɔ iko.

²¹ Nɛ ta zu wa ila ngɔ Gale, kɛ a dɛa ogba mɛnɔ ngɔ nù Ezipeto, nɛ a kpasa wa ni.

²² A dɛa zi oɔngbamɔ ngɔ nù Ezipeto, nɛ a dɛ kpo li dɛa mɔ tɛ nu gba lì Sala Tɔ̃.

²³ Nɛ 'da fala kɛ Gale kɔ̃a we mbiti owinɔ 'da a ni, nɛ Mɔizɛ, wi toe kɛ a saka a ni kulu ngɔ, nɛ a ala nu a hã a na, a tɛ dɛ nɔ̃lɔ̃ zã, hã a kumu wa vɛ̃ gɔ.

²⁴ 'Do nɛ nyɛla, nɛ wa bɛ̃a we le dɛ ngɔ dia nùi kɛ Gale kpua mbulu nɛ hã wa ni. Nɛ wa ba kafi we nu Gale.

²⁵ Wa si ti tandenɔ 'da wa, nɛ wa lungu we, nɛ wa zélé zi 'bɔ wenɔ kɛ NWA tɔ̃ ni gɔ.

²⁶ Na mɛ ni, nɛ NWA zonggo tɛ̃ ɛ na, ɛ la wa hã wa fe dɛ li gba zɔ̃ɛ ni,

²⁷ nɛ ɛ pɛsɛ obe zã wa do nyanga nza gɛ vɛ̃, nɛ wa fe do gele fala, tɛ ngɔ nùi 'da ogele winɔ.

²⁸ 'Do nɛ, nɛ owinɔ 'da Gale wa hɔa kɔ le Peɔrɛ, nɛ wa dɔnggɔ gale Bala, nɛ wa nyɔngɔ mulu sa'denɔ kɛ wa dɔnggɔ do galenɔ, kɛ wa do kpasi bina ni.

²⁹ Na mɛ ni, dɛa to tɛ wa nɔ̃lɔ̃ zã NWA, nɛ 'dã zɛlɛ tia ngɔ wa.

³⁰ Nɛ nde Pinasi kulu ngɔ dɛ sanga wa ni, nɛ a hã etumbu hã Owi dɛ 'dã mɛnɔ, nɛ 'dã zɛlɛ ni Sɔkpɔ.

³¹ Nɛ winɔ wa kɔ̃a gɛnɛ mɛ a dɛa ni, nɛ wa lengge do ma kɔ sabɛlɛ do sabɛlɛ.

³² Owinɔ 'da NWA wa hɔa nu lì Mɛriba, nɛ wa nɔ̃lɔ̃ zã a, nɛ mɛ wa dɛa ni, ma fi Mɔizɛ kɔ ngamɔ.

³³ Wa 'danga sila a, nɛ a wila we mba mba, nɛ a lènggè ma lingga gɔ.

³⁴ Nɛ owinɔ 'da nwa wa kùmù Okanana, ɔ nɛ kɛ a ba zi do nu a hã wa ni gɔ.

³⁵ Nɛ nde wa ba ngba wa do opaganɔnɔ ni, nɛ wa yambala dɛa to tɛ wa.

³⁶ Nɛ wa dɔngga osɛa tenɔ 'da wa, nɛ ma fi wa kɔ 'dã mɔ.

³⁷ Wa gbɛa obulu benɔ do oboko benɔ 'da wa, we dɔnggɔ do gale bɛlɛnɔ ni.

³⁸ Wa kala obenɔ 'da wa kɛ wa do 'dã mɔ bina ni, nɛ wa gbɛ wa we dɔnggɔ do galenɔ 'da Okanana. Nɛ 'dã mɛnɔ wa dɛa ni ma faka le 'da wa.

³⁹ Nɛ wa hɔa wi ndi li Gale we 'dã mɛnɔ wa dɛa ni, nɛ a zɔa na, wa a wi vĩ zu.

⁴⁰ Ma a zã NWA nɔ̃lɔ̃ dɛ tɛ wa, nɛ a da sila a ngɔ wa, owinɔ kɛ a saka zi wa ni.

⁴¹ Nɛ a la wa dɛ kɔ̃ ogele winɔ, nɛ Owi sɛnɛ wa wa ia mbula ngɔ wa.

⁴² Na mɛ ni, wa kpa zɛlɛ tɛ ti kɔ̃ owi sɛnɛ wa, nɛ wa bili zu wa ti mbulanɔ 'da wa.

⁴³ NWA kpasa zi owinɔ 'da a 'do ngbɛ ɛ do 'do ngbɛ ɛ, nɛ nde wa tɛ bɛ̃ we nu a, nɛ wa dɛ 'dã mɔ dɛ dati fai.

⁴⁴ Nɛ NWA zila ala nui 'da wa, nɛ a zɔ 'bɔ zɛlɛ tɛ kɛ wa kpa ni.

⁴⁵ Nɛ ta zu a gba ngɔ gba tɔkɛ kɛ a gba zi do wa ni. Nɛ a kpula linggamɔ zu a, we kɛ a do dia zã wena.

⁴⁶ Nɛ a dɛa na, owinɔ wa zɛlɛ tɛ winɔ 'da a ni, wa ĩ 'bako hã wa.

⁴⁷ Aa NWA Gale 'da lɛ, mɔ kpásá lɛ. Mɔ fó lɛ ti kɔ̃ ogele winɔ, nɛ mɔ mbá li lɛ fala nɛ kpo. Na mɛ ni, nɛ lɛ gese sɛ iɔ̃nae hã mɔ, nɛ lɛ dɔnggɔ sɛ dɔ̃lɔ̃ li 'da mɔ.

⁴⁸ Lɛ dɔ́nggɔ́ NWA Gale 'da lɛ obe Israɛlɛ, lɛ sámbálá a kɔ sabɛlɛ do sabɛlɛ. E kɔ winɔ vɛ̃ wa tɔ̃ na: “Amɛ!” Aleluya, lɛ dɔnggɔ NWA fai!