Zumanɔ 105 - WE NU GALE 1995

Gale gba tɔkɔ do owinɔ 'da a

¹ Nɛ dɔnggɔ NWA, nɛ nɛ tɔ̃́ de sako li a. Nɛ tɔ̃̀ lɛnggɛ gba mɛnɔ a dɛa ni hã ogele winɔ.

² Nɛ gá zuma, nɛ nɛ zɛ́ biã we dɔnggɔ do a, nɛ nɛ tɔ̃ sako ɔngbamɛnɔ vɛ̃ a dɛa ni.

³ Nɛ, owinɔ 'da NWA Gale, nɛ dɛ́ yangga, nɛ nɛ dɔnggɔ tɛ nɛ do a kɛ a santo.

⁴ Nɛ síkí li nɛ dɛ 'da NWA kɛ a do nganda vɛ̃, nɛ nɛ lénggé do a 'da fala fai.

^5-6 Nɛ, obe zã Abrahama, wi dɛa toe 'da Gale, kɛ nɛ 'bɔ a obenɔ 'da Yakɔbɔ, kɛ Gale saka nɛ ni, nɛ lénggé ɔngbamɛnɔ kɛ Gale dɛa ni, do 'bili wenɔ kɛ a 'bili zi ni.

⁷ Gale 'da lɛ wi a NWA, a ia mbula ngɔ nù gɛ vɛ̃.

⁸ Ta zu a élé ngɔ mbuli kɛ a kpua ni gɔ, olo nu a ma 'bana sɛ kɔ sabɛlɛ do sabɛlɛ.

⁹ A gba zi tɔkɔ do Abrahama, nɛ a gbangba 'da nɛ hã Izaka,

¹⁰ nɛ a kpo mbulu hã Yakɔbɔ. Nɛ mbuli ni, ma 'bana sɛ we lɛ obe Israɛlɛ fai.

¹¹ A tɔ̃a zi hã oyaa lɛ na: “Mi 'dɔla nù Kanana hã nɛ, nɛ ma 'bana sɛ do mɔ́ nɛ fai.”

¹² Owinɔ 'da Gale wa dɛlɛ zi gɔ, nɛ wa zi a gɛnɛ tɛ ngɔ nù Kanana.

¹³ Wa yɛnggɛ zi mba mba do ngɔ nù 'da owinɔ,

¹⁴ nɛ nde Gale amba zi zu wa na, wele tɛ zɛlɛ tɛ wa gɔ, nɛ a mbisa zi onwanɔ we wa na:

¹⁵ “Nɛ tɛ 'bè tɛ owi tonɔ 'da mi gɔ, nɛ tɛ dɛ̃ 'dã mɔ do wa, owi gba olo nu mi gɔ.”

¹⁶ Nɛ NWA dɛa na, gba wɔ te ngɔ nù Kanana, nɛ fo 'bɔ mbé nyɔngɔmɔ bina.

¹⁷ Nɛ nde a tumba wele dati owinɔ 'da a. Wi ni a Yozɛfu, kɛ wa tɛka zi a do ngbá ni.

¹⁸ Wa ɛnzɛ zi nyanga a do dɔkpɔ, nɛ wa fi fɛlɛ mɔ bolo gɛlɛ a.

¹⁹ Wa dɛa do a ni gbaa, we hɔ ngba soe kɛ olo nu a dɛa tɛ̃ ɛ. Nɛ NWA Gale bia na, a do dia gulu we ni.

²⁰ Nɛ nwa ngɔ nù Ezipeto ba nu ɛ na, wa yala a. Nwa 'da gele winɔ ni tɔ̃a na, wa da kɔ̃ wa tɛ Yozɛfu.

²¹ Nɛ a ia a do wi dɛ to mbati ngɔ nùi 'da a, nɛ Yozɛfu zi a gã wi ngɔ kpamɛnɔ 'da nwa vɛ̃.

²² Na mɛ ni, a e zi mbula ngɔ owi olo li nwa, nɛ a be wala hã zã hã okumunɔ 'da a.

²³ 'Do nɛ, nɛ Yakɔbɔ la dɛ Ezipeto, nɛ a kulu tɔa dɛ i mɔ.

²⁴ Nɛ nwa dɛa na, owinɔ 'dɛ ɛ wa sanza, nɛ wa nganda nɛ ngɔ owi sɛnɛ wa.

²⁵ Nɛ a kpolo sila Oezipeto, nɛ wa sɛnɛ Owi dɛa tonɔ 'da a, nɛ wa zɛlɛ tɛ wa.

²⁶ Nɛ a sa mɔ hã Mɔizɛ, wi dɛa toe 'da a, do Aroni kɛ a saka a ni, nɛ a tombo wa ngɔ nù Ezipeto.

²⁷ Nɛ wa dɛa oɔngbamɔ tɛ ngɔ nùi. Wa dɛa ogã ɔngbamɛnɔ ni, ɔ nɛ kɛ Gale ba do nu ɛ hã wa ni.

²⁸ Nɛ Gale fi gba tũ ngɔ nu Ezipeto, nɛ ma kpia kpã kpã, nɛ nde Oezipeto wa zèlè nu a gɔ.

²⁹ Nɛ a kifi lìnɔ 'da wa do tɔkɔ, nɛ a gbɛa okɔyɔnɔ 'da wa.

³⁰ Nɛ odalɛ wa yɛ'bɛ ngɔ nùi 'da wa, nɛ wa le gbaa kɔ tɔa ɔinɔ 'da nwa i.

³¹ Nɛ Gale ba nu ɛ, nɛ ozufa do zĩ tolo wa kpa do ngɔ nù Ezipeto vɛ̃.

³² Nɛ a tumba gbãlã mũlũ olo li tɛa kolo, nɛ a tombo 'bɔ ua dã kolo, nɛ ma fi we tɛ nùi ni.

³³ Nɛ a 'danga ote vinɔnɔ do figɛnɔ 'da wa, nɛ a gbini tenɔ ngɔ nùi ni dɛ nù.

³⁴ Nɛ Gale ba 'bɔ mbé nu ɛ, nɛ odɔla wa hɔa dɛlɛ wena,

³⁵ nɛ wa nyɔngɔ nwánɔ, do kpalɛnɔ ngɔ nùi ni vɛ̃.

³⁶ Nɛ Gale gbɛa okuti bulu benɔ kɔ nu fɛlɛ kula 'da Oezipeto vɛ̃.

³⁷ 'Do nɛ, nɛ Gale kpia dati obe Israɛlɛ, nɛ wa kala mɔ mbali do fɛ̃a mɔ bolo kɔ̃ Oezipeto, nɛ wa hɔa nza ngɔ nùi ni, nɛ wa la do lɔa tɛ wa.

³⁸ Nɛ Oezipeto wa zɔa kɛ wa la ni, nɛ wa dɛa yangga, we kɛ wa dɛ zi kili wa wena.

³⁹ Nɛ Gale fi zɛ̃ we ngɔ owinɔ 'da a we kele do zu wa, nɛ a dɛ 'bɔ na, nyɛa we yele kɛ zã wa do tũ.

⁴⁰ Wa aka NWA, nɛ a tumba do onɔɛ ɔ nɛ ogbanu ni, mba do onyɔngɔmɔ tɛ li nza i hã wa, nɛ wa nyɔnga, nɛ zã wa hɛ̃.

⁴¹ Nɛ a fi sanga ta, nɛ lì yula kɔ nɛ, nɛ ma fo do li goe, nɛ ma la ɔ nɛ gba lì ni.

⁴² Ta zu a gba ngɔ mbuli kɛ ma santo, kɛ a kpua zi hã wi toe 'da a Abrahama ni.

⁴³ Owinɔ kɛ a saka wa ni, wa ga zi zuma, nɛ wa zɛ kaliã do yangga, 'da fala kɛ a fua wa ngɔ nù Ezipeto ni.

⁴⁴ Nɛ a 'dɔlɔ nùi 'da ogele winɔ hã wa, nɛ a dɛa 'bɔ na, wa dĩlĩ do fɔ olo wa.

⁴⁵ A dɛa ni takɔ owinɔ 'da a wa zele nu a, nɛ wa dɛ mbulanɔ 'da a vɛ̃. Aleluya, lɛ dɔnggɔ NWA fai!