Zumanɔ 104 - WE NU GALE 1995

Zuma dɔnggɔ do Gale kɛ a dɛa mɛnɔ vɛ ni

¹ Mi dɔnggɔ NWA do sila mi vɛ̃. Aa NWA Gale 'da mi, mɔ gã la mɔ vɛ̃. Gã wi do dɔ̃lɔ̃ li hi'da mɔ ɔ nɛ tulu ni.

² Yele ngbala kpa kɛ zã mɔ vɛ̃. Mɔ yala gbau li nza ɔ nɛ gbau tande ni,

³ nɛ mɔ dɛa tɔa 'da mɔ do ngɔ lìnɔ ngɔ i. Okutinɔ a ngilingili 'da mɔ, nɛ bũi ba mɔ, nɛ ma e mɔ fala mɔ kɔ̃a ni.

⁴ Mɔ ia bũi do wi nɛ tonɔ 'da mɔ, nɛ nyɛa li kolo dɛ to hã mɔ.

⁵ Mɔ zĩ nùi dɛ ngɔ nyanga nɛ, nɛ ma yula nganda, fo mɔ yaka ma bina.

⁶ Zɛ́ dati, gba lì kpa zi do ngɔ nù gɛ vɛ̃, nɛ ma gulu zi zu kalanɔ fɛɔɔ.

⁷ Nɛ mɔ dãlã dɛ tɛ nɛ, nɛ ma yu dati ua dã 'da mɔ,

⁸ nɛ ma kũ kalanɔ, nɛ ma zĩlĩ gbangɔlɔ̃nɔ, nɛ ma si dɛ fala mɔ 'dafa we nɛ ni.

⁹ Nɛ mɔ 'bili li ngbala hã gba lì na ma 'bana dɛ 'do nɛ, ma nɛ́ sɛ 'bɔ ngɔ nùi gɔ.

¹⁰ Mɔ dɛa na, zu lìnɔ ma fo, nɛ ma la do ngbala kalanɔ.

¹¹ Nɛ osa'denɔ vɛ̃ wa nɔ ma, nɛ zambɛlɛ nɔ, nɛ kɔ gɛlɛ a mbɔkɔ.

¹² Onɔɛnɔ wa dɛ tɔa ngɔ tenɔ nu lì ni, nɛ wa dungu dɛ di ni tɛ ga zuma.

¹³ Yolo do li nza i, nɛ mɔ tombo kolo dɛ ngɔ kalanɔ, nɛ nùi nɔ lì 'da mɔ, nɛ ma we do ma.

¹⁴ Mɔ dɛ na, wɔkɔsɔnɔ hɔ, hã sa'denɔ wa nyɔngɔ, nɛ nwá Sanggo 'bɔ we owinɔ. Na mɛ ni, mɛnɔ kɛ wele kpasa do ma ni, ma yolo kɔ nùi:

¹⁵ Mɛ a dɔ̃ we hã yangga hã wele, nɔ we 'dafa do tɛ̃ a, nyɔngɔmɔ we hã ngawi hã a.

¹⁶ Mɔ NWA, mɔ hã 'bɔ lì hã ogã te sɛdrɛnɔ, kɛ mɔ mi ma tɛ Libanɛ ni, nɛ ma nɔ lì ɔ nɛ kɛ ma wia ni.

¹⁷ Obe nɔɛnɔ wa dɛ tɔa ngɔ nɛ, nɛ ogba nɔɛnɔ wa ɔ zu te siprɛ.

¹⁸ Obe duanɔ wa ɔ ngɔ ngala kalanɔ, nɛ ongɛnzɛnɔ wa usu tɛ wa kɔ ta.

¹⁹ Mɔ dɛa zɛkɛ we be kɔ̃ tũnɔ, nɛ wese ĩ ti sa kɛ ma le do tũ ni.

²⁰ Mɔ tombo tũ fala, nɛ tũ tũ, nɛ osa'de zamɛnɔ wa ma ngɔ yɛnggɛ nɛ.

²¹ Nɛ ogbɔgbɔnɔ wa he mɔ tɛ fa sa'de, wa aka mɔ Gale we nyɔngɔmɔ.

²² Kɔ fala wese nɛ gba nɛ, nɛ wa yu, nɛ wa usu tɛ wa kɔ kɔ̃nɔ 'da wa.

²³ Nɛ wele hɔ nza we dɛ to, nɛ a dɛ toe gbaa gɛ̃a wese.

²⁴ Aa NWA, mɛnɔ mɔ dɛa ni, ma dɛlɛ wena! Nɛ mɔ dɛa ma vɛ̃ do gã hã zã! Ngɔ nùi gɛ dunu do omɛnɔ mɔ dɛa ni.

²⁵ Mɔ zɔ́ gba lì, ma gã la li ngele. Ogba dɔa sa'de wa kpasa dɛ kɔ nɛ ni, ogã sa'de do obe nɛ wa ɔ di ni.

²⁶ Omasua ma yɛnggɛ do ngɔ nɛ, nɛ mɔ fi gba sɔ sa'de 'dɔ lì ni, li a a leviatanɛ, mɔ ia a dɛ di ni we dɛ sa do a.

²⁷ Otunu li mɛnɔ ni vɛ̃ wa gbini zã wa do mɔ na, mɔ hã nyɔngɔmɔ hã wa do li zɔlɔ nɛ.

²⁸ Fala kɛ mɔ da kɔ̃ mɔ ngɔ nɛ hã wa, nɛ wa nyɔngɔ, nɛ zã wa hɛ̃.

²⁹ Kɔ fala kɛ mɔ bɛ̃ we hã ma hã wa, nɛ wa tana kili. Fala kɛ mɔ ba bũ nu zɔ̃ wa, nɛ wa fe, nɛ wa kifi nù.

³⁰ Mɔ ufu bũ nu mɔ, nɛ otunu li mɛnɔ wa hɔ, nɛ mɛnɔ ngɔ nù gɛ vɛ̃ kifi mbé nɛ.

³¹ Aa NWA, e kɔ dɔ̃lɔ̃ li 'da mɔ 'bana fai! E kɔ mɔ dɛ yangga we mɛnɔ mɔ dɛa gɛ!

³² Mɔ ka mɔ tɛ nùi, nɛ ma tana gbirr, mɔ e kɔ̃ mɔ tɛ kalanɔ, nɛ ma kutu gba zɛ̃ we.

³³ Aa Gale 'da mi, mi ga sɛ zuma hã mɔ kɔ dungu nza 'da mi vɛ̃, nɛ mi dɔnggɔ sɛ mɔ gbaa ndɔti nɛ a fio.

³⁴ E kɔ zuma 'da mi de tɛ mɔ NWA, mba gɔ, yangga 'da mi ma yolo kɔ̃ mɔ.

³⁵ E kɔ o'dã winɔ wa tɛ 'bànà ngɔ nù gɛ gɔ, nɛ wa, kɛ wa bɛ̃a gɛnɛ mɔ ni, wa kumu do'do. Mi nɛ dɔnggɔ NWA do sila mi vɛ̃! Aleluya, lɛ dɔnggɔ NWA fai!