Zumanɔ 103 - WE NU GALE 1995

Zuma gese iɔ̃nae hã NWA Gale

1 Zuma 'da Davidi

¹ Zuma 'da Davidi Mi dɔnggɔ NWA do sila mi vɛ̃, mi dɔnggɔ zu li a kɛ ma santo.

² Mi dɔnggɔ NWA do sila mi vɛ̃, nɛ ta zu mi élé ngɔ dia zã 'da a gɔ.

³ A a wi fo ku'da 'dã mɛnɔ zu mi vɛ̃, nɛ a kpasa mi kɔ zɛlɛ mɛnɔ vɛ̃ ma ba mi ni.

⁴ A kɔ̃ gɛnɛ mi wena, a fua mi kɔ fio, nɛ a be dia zã hã mi.

⁵ A hã mbé ngawi hã mi kɔ dungu nza 'da mi, nɛ tɛ mi nganda nɛ́ tɛ ziki ni.

⁶ NWA 'bili we 'da winɔ wa kpa zɛlɛ tɛ kɔ̃ ngba wa ni, nɛ a gbɛ dia gulu we hã wa.

⁷ A bia zi mɛnɔ a 'dafa we dɛ nɛ ni hã Mɔizɛ, nɛ a dɛa oɔngbamɔ hã obe Israɛlɛ.

⁸ NWA do mbɔkɔ li wena, a a wi dia zã do du sila, nɛ kɔ̃a zã 'da a ma la mɔ vɛ̃.

⁹ A kɔ́'dɔ́ wele fai gɔ, nɛ a é mãlã hã wele pii gɔ.

¹⁰ A ha etumbu hã lɛ ɔ nɛ kɛ lɛ wia sɔ we kpa ma ni gɔ. A bìlì nu gbã 'dã mɛnɔ 'da lɛ hã lɛ gɔ.

¹¹ A do kɔ̃a zã we owinɔ 'da a, nɛ kɔ̃a zã ni dulu ɔ nɛ ngbala li nza do nùi ni.

¹² A fua 'dã mɛnɔ 'da lɛ, nɛ a da ma nyɛlɛ ndũu, ɔ nɛ 'biti gba wese nyɛlɛ do 'biti gɛ̃a wese ni.

¹³ NWA kɔ̃a gɛnɛ owi yu kili a, ɔ nɛ kɛ baa be kɔ̃a do benɔ 'da a ni.

¹⁴ A ĩ na, wele yula tɛ nù, nɛ ta zu a èlè ngɔ nɛ gɔ.

¹⁵ Kpasi 'da wele dùlù gɔ. Wele ɔ nɛ wɔkɔsɔ kɛ ma gã, nɛ ma do,

¹⁶ kɔ ngba soe kɛ bũi fi, nɛ ma zu'du ma do'do, nɛ wele zɔ́ 'bɔ olo nɛ gɔ ni.

¹⁷ Nɛ nde nwa kɔ̃a gɛnɛ owinɔ 'da a, nɛ kɔ̃a zã ni ma 'bana sɛ kɔ sabɛlɛ do sabɛlɛ. A dɛ sɛ de mɔ hã obe zã benɔ 'da wa,

¹⁸ wanɔ kɛ wa dɔnggɔ gba tɔkɛ 'da a, nɛ wa dɛ mbula olo nu a ni.

¹⁹ NWA dungu ngɔ kpongbo nwa 'da a tɛ li nza i, a a nwa ngɔ mɛnɔ vɛ̃.

²⁰ Aa nɛ, oanzɛnɔ 'da NWA, nɛ, kɛ nɛ zele wenɔ 'da a, nɛ nɛ dɛ ma do ti do ngawi 'da nɛ vɛ̃ ni, nɛ dɔnggɔ a.

²¹ Aa nɛ, ogili wi dɛa tonɔ 'da NWA tɛ li nza gɛ, nɛ, kɛ nɛ dɛ mɛnɔ vɛ̃ kɛ zã a kɔ̃a ni, nɛ dɔnggɔ a.

²² Aa nɛ, owinɔ vɛ̃ kɛ NWA dɛa nɛ ni, nɛ dɔ́nggɔ́ a ngɔ nùi 'da a vɛ̃. Nɛ mi tɛ mɛ 'bɔ, mi dɔnggɔ NWA do sila mi vɛ̃.