Zumanɔ 102 - WE NU GALE 1995

Wi 'bako sambala Gale

¹ Mbe wi 'bako kpo, a 'bɔ do ngawi bina, kɔ a ala nu a hã NWA kɔ sambala.

² Aa NWA, mɔ gɛ́ zala mɔ tɛ sambala 'da mi. Mɔ zélé sa mɔ ala nui 'da mi.

³ 'Da fala kɛ mi kɔ 'bako, nɛ mɔ tɛ ùsù li mɔ hã mi gɔ. Ngba soe kɛ mi sa mɔ hã mɔ, nɛ mɔ gɛ́ zala mɔ, nɛ mɔ kɔ̃ nu mi dɔ̃ dɔ̃.

⁴ Kɔ̃ tũ dungu nza 'da mi la dɔ̃ dɔ̃ ɔ nɛ zɛ̃ we, nɛ tɛ mi ba we kpangbangba ɔ nɛ kalĩ we ni.

⁵ Mi ɔ nɛ wɔkɔsɔ kɛ wa ma zu nɛ ma ni, ngawi ia tɛ mi vɛ̃, nɛ wɔ nyɔngɔmɔ bá 'bɔ mi gɔ.

⁶ Wa zele tati a ɔmɔ gɛlɛ mi iko, fo 'bɔ mulu ti ndala tɛ mi bina.

⁷ Oyali ngba mi wa la mi zu mi kpo, nɛ mi ɔ nɛ ganakele li go, tabi dili kɔ gbɛsɛ tɔa ni.

⁸ Mi ɔ́ yala gɔ, nɛ mi dungu zu mi kpo ɔ nɛ nɔɛ tɛ zu tɔa ni.

⁹ Tũ kpo kpo, owi sɛnɛ mi wa tulu mi fai, nɛ wa zonggo zu mi, nɛ wa fi gbɛlɛgbɛsɛ zu mi.

¹⁰ Aa NWA, nyɔngɔmɔ nu mi a bũ, nɛ mili kɔ̃a li mi ala dɛ 'dɔ lì mi nɔ ni.

¹¹ We kɛ zã mɔ nɔ̃lɔ̃ dɛ tɛ mi, nɛ mɔ da mi nyɛlɛ do mɔ ndũu.

¹² Kpasi 'da mi la dɔ̃ dɔ̃ ɔ nɛ gɔ̃lɔ̃ gɛ̃a wese ni. Mi kolo ɔ nɛ wɔkɔsɔ, kɛ wa wa ma wa ni.

¹³ Nɛ nde mɔ NWA Gale, mɔ a nwa 'da fala fai, owinɔ wa tɔ̃ sɛ sako li mɔ kɔ sabɛlɛ do sabɛlɛ.

¹⁴ Mɔ ĩ sɛ 'bako hã Owi Sioni, nɛ mɔ be sɛ dia zã 'da mɔ hã wa. Ngba soe yolo 'do wa ma wia ia, gbãlã we, ngba soe nɛ wia ia.

¹⁵ Lɛ, owi dɛa tonɔ 'da mɔ, lɛ kɔ̃a gɛnɛ le gɛ do sila lɛ kpo. Kɔ lɛ zɔ kɛ ma 'danga do'do ni, nɛ 'bako ba lɛ wena.

¹⁶ Ogele winɔ wa yu sɛ kili mɔ NWA, nɛ Onwanɔ ngɔ nù gɛ vɛ̃, wa dɛ sɛ kili dɔlɔ li 'da mɔ.

¹⁷ 'Da fala kɛ mɔ dɛ sɛ le Sioni dɛ olo nɛ ni, nɛ mɔ be sɛ dɔlɔ li 'da mɔ dɛ nza.

¹⁸ Nɛ mɔ zele sɛ sambala 'da owinɔ, kɛ mɔ bɛ̃a zi gɛnɛ wa ni, nɛ mɔ kɔ́ sɛ gɛnɛ we 'da wa.

¹⁹ Nɛ kɔ́mɔ́ wenɔ gɛ do mbɛti, nɛ nɛ la ma we obenɔ 'do gɛ, takɔ owinɔ wa ko sɛ wa 'do lɛ gɛ, wa dɔ́nggɔ́ zu li NWA.

²⁰ Yolo do li nza i, NWA gɛa zu ɛ we zɔ nùi. A a tɛ fala santo 'da a i, nɛ a ka mɔ dɛ nù nga,

²¹ we zele hiamɔ ala nui 'da Owi bɔlɔkɔnɔ, nɛ owanɔ wa 'bili we 'da wa na wa fe ni, a fi wa nza.

²² Na mɛ ni, owi Sioni wa tɔ̃ sɛ dia sako li NWA, nɛ wa sambala sɛ a.

²³ Do ngba soe kɛ owinɔ ngɔ nùi gɛ, wa mba sɛ li ngba wa dɛ Yeruzalɛmɛ ni, nɛ wa dɔnggɔ sɛ NWA.

²⁴ 'Da fala kɛ mi 'bana zi ngɔ nga tɛ mi ni, nɛ NWA fua ngawi 'da mi, nɛ a 'bili tɛ tũ dungu nza 'da mi.

²⁵ Ma hã mi he mɔ na: “Aa Gale 'da mi, mɔ, kɛ mɔ 'bana sɛ kɔ sabɛlɛ do sabɛlɛ ni, mɔ tɛ gbɛ̃ mi ngɔ nga tɛ mi gɔ.”

²⁶ Mɔ dɛa nùi zɛ́ belee, nɛ mɔ 'bɔ a mɔ dɛa li nza.

²⁷ Mɛnɔ ni vɛ̃ ma 'danga sɛ, nɛ nde mɔ sɛ boe fai. Li nza do nùi ma dɛ sɛ ã ɔ nɛ tulu ni, nɛ mɔ da sɛ ma nù, nɛ mɔ kpolo do gele nɛ.

²⁸ Nɛ nde mɔ 'bana fai ɔ nɛ ã olo tɛ mɔ ni, nɛ kpasi 'da mɔ do ndɔti nɛ bina.

²⁹ Mɔ zɔ sɛ mɔ tɛ obenɔ 'da lɛ wi tonɔ 'da mɔ, nɛ wa kpa sɛ gɛ̃a dungu ti mɔ.