Zumanɔ 10 - WE NU GALE 1995

¹ Aa NWA, gulu kɛ mɔ yolo nyɛlɛ ndũu do lɛ we ge nde? Gulu kɛ mɔ usu tɛ mɔ 'da fala lɛ do ngamɔ ni we ge nde?

² 'Dã wi dɛ wali, nɛ a zɛlɛ tɛ wi 'bakonɔ. A ndɔ bili hã wa, nɛ a kala wa, nɛ a hã ngamɔ hã wa.

³ Na mɛ ni, nɛ 'dã wi ni, a dɔnggɔ tɛ̃ a na, linggamɔ zu ɛ dɛa tɛ̃ ɛ, nɛ ɛ kpa dia mɔ do nga ngu'du. Nɛ nde a lénggé do dɔnggɔ NWA Gale gɔ, a mɔmɔ a mɔma iko.

⁴ Fala kɛ 'dã wele dungu kɔ kpamɔ, nɛ ta zu a ele ngɔ fa Gale. Nɛ a lengge tati nɛ na: “Gale dɛ́ mɔ kpo gɔ.”

⁵ 'Dã wi ni dɛ mɔ, nɛ ma Sɔkpɔ fai do dia nɛ. A zele ngbangganɔ kɛ Gale 'bili ni, nɛ nde a lénggé nɛ gɔ. A kpa ngba a do Owi sɛnɛ a, nɛ a zɔ wa li a yala iko.

⁶ Nɛ a lengge na, mɔ kpo dɛ́ sɛ ɛ gɔ, ɛ kpá sɛ 'bako fala kpo gɔ.

⁷ A tɔ̃ tati a bɛlɛ, nɛ a wele we do dã, nɛ a fɔmbɔ owinɔ vɛ̃. Lɛnggɛ kɛ a tɔ̃ ma ni, ma hã ngamɔ do 'bako.

⁸ A usu tɛ̃ a tɛ nu ngba lenɔ, nɛ a gbɛ wi dia gulu we, nɛ nde wa ĩ́ fala nɛ gɔ. A wɛ osulu winɔ do li a fai.

⁹ A 'dafa fala, nɛ a usu do tɛ̃ a ɔ nɛ gbɔgbɔ ni, nɛ a wɛ wi 'bako we ba a. A ndɔ bili hã a, nɛ a ba a, nɛ a la do a.

¹⁰ A hala wi 'bakoe, nɛ a ba a, nɛ a te do a, tua kɛ a nganda wena.

¹¹ Nɛ 'dã wi ni tɔ̃ do kɔ zã ɛ na: “Gale lénggé do mɛnɔ kɛ mi dɛ ma gɛ gɔ. A usu li a usu, a zɔ̃ ma gɔ.”

¹² Aa NWA Gale, mɔ kúlú ngɔ hã mɔ dɛ́ mɔ. Ta zu mɔ tɛ èlè ngɔ Owi 'bakonɔ gɔ.

¹³ Gulu kɛ o'dã winɔ wa mɔmɔ mɔ we ge nde? Gulu kɛ wa tɔ̃ na, mɔ ha sɛ etumbu hã lo gɔ we ge nde?

¹⁴ Mɔ a wi kɛ mɔ ĩ ti ngamɔ do zɛlɛ tɛ, kɛ ma kpa Owi 'bakonɔ ni, nɛ mɔ fa we gbaka wa kɔ nɛ. Osulu winɔ do obe gulanɔ wa hã tɛ wa hã mɔ, nɛ mɔ a mɔ gbaka wa.

¹⁵ Mɔ fó ngawi 'da o'dã winɔ, nɛ mɔ hã etumbu hã wa olo 'dã mɛnɔ 'da wa, takɔ wa la fala 'dã mɔ.

¹⁶ Aa NWA Gale, mɔ a nwa 'da fala fai. Ogele winɔ wa fe sɛ vɛ̃, nɛ wa kumu sɛ kɔ lenɔ 'da wa.

¹⁷ Aa NWA, mɔ gɛ́ zala mɔ, nɛ mɔ zélé sambala 'da owinɔ kɛ wa ba tɛ wa dɛ nù ni, nɛ mɔ hã ngawi hã wa.

¹⁸ Mɔ zélé hiamɛ 'da obe gulanɔ, do owinɔ kɛ wa kpa zɛlɛ tɛ ni, nɛ mɔ 'bili dia gulu we hã wa. Na mɛ ni, nɛ owinɔ ngɔ nù gɛ, wa zɛ́lɛ́ sɛ 'bɔ tɛ ngba wa gɔ.