FILIPƐ 3 - WE NU GALE 1995

Tɛlɛ tɛ kɛ wele hɔ wi bɔlɔ zu li Gale

¹ Onyae, ngangga ni, mi aka nɛ na, nɛ dɛ́ yangga, we kɛ nɛ mba kpo do Nwa. Fala dala nu mi tɛ wenɔ hã nɛ, ma bá tɛ mi gɔ, nɛ ma gala kɔ̃a we 'da nɛ na, ma nganda dɛ dati.

² Li nɛ sɔ̃́ tɛ Owi dɛ 'dã mɛnɔ, wa a otolo, nɛ wa lengge na wele nɛ gaza, sɛ nɛ a hɔ wi bɔlɔ zu li Gale de.

³ Ĩ na, ngbongbo owi nɛ gaza, wi a lɛ gɛ. Lɛ dɔnggɔ Gale do ngawi 'da Hi Wi Santo, nɛ lɛ dɔnggɔ tɛ lɛ do zu li Yezu Kristo, nɛ nde lɛ á sila lɛ ngɔ mɔ kɛ wa dɛ tɛ kili tɛ wi ni gɔ.

⁴ Kafi bina, mi wia sɔ tɛ mɛ 'bɔ we a sila mi ngɔ mɔ kɛ wa dɛa tɛ kili tɛ mi ni. Fala kɛ wele lengge na, ɛ wia we a sila ɛ ngɔ mɔ kɛ wa dɛa tɛ kili tɛ̃ ɛ ni, nɛ a ĩ́ na, mi nɛa ngɔ a do ma.

⁵ Mi a be Israɛlɛ, wa kua mi kɔ nu kpala Bɛnzamɛ. Nɛ do ngbɛ'dɛ'dɛ tũ olo kula 'da mi, nɛ wa gɔnɔ mi. Mi a be zã Hebrenɔ ngboo. Nɛ we duzu mbula 'da Oyudanɔ, nɛ nde mi a Fariziɛ̃.

⁶ Mi ba zi tɛ mi vɛ̃ we dɛ to hã Gale, nɛ mi zɛlɛ zi 'bɔ tɛ oeklezianɔ. Nɛ mi hã tɛ mi vɛ̃ we dɛ mbula 'da Oyudanɔ, takɔ mi hɔ wi bɔlɔ zu li Gale, nɛ a kpà mɔ kɛ na a kɔ'dɔ mi ngɔ nɛ ni gɔ.

⁷ Nɛ nde ngangga ni, mi kɔ̃a zu li Yezu Kristo, nɛ mɛnɔ mi zɔ zi nɛ́ dia mɛ ni, ma ɔ li mi vɛ̃ yala iko.

⁸ Gbãlã we, mi zɔa na, gele mɛnɔ vɛ̃ kɛ mi zi do ma ni, ma 'bɔ do gulu nɛ we mi bina. We kɛ mi ĩ ti Nwa 'da mi Yezu Kristo ia, nɛ ki ni dia nɛa ngɔ mɔ vɛ̃. We duzu Kristo, ma kɛ mi bɛ̃a gɛnɛ ogele mɛnɔ vɛ̃, nɛ mi zɔ ma li mi nɛ́ wɔkɔsɔ ngɔ zubu ni, takɔ mi nɛ we kpa Yezu Kristo,

⁹ nɛ mi mba kpo do a. Mi á 'bɔ tɛ mi ngɔ dɛ mbula 'da Oyudanɔ we hɔ bɔlɔ zu wele li Gale gɔ. Nɛ nde mi hɔa wi bɔlɔ zu li a, we duzu kɛ mi kɔ̃a zu li Yezu Kristo. Gale hã a dɛ na, wele hɔ wi bɔlɔ zu li ɛ, we kɛ a kɔ̃a zu li Kristo ni.

¹⁰ Mi kɔ̃a kpo na, mi ĩ ti Kristo, nɛ mi ĩ ti ngawi kɛ a tunu zi nɛ kɔ fie ni. Mi kɔ̃a na, mi mba do a kɔ zɛlɛ tɛ kɛ a kpa zi ni, nɛ mi fe ɔ nɛ kɛ a fia nɛ ni.

¹¹ Nɛ mi e sila mi ngɔ Gale na, a kɔ̃, nɛ a tunu mi kɔ fio.

Le yú gbaa we hɔ ndɔti yui

¹² Mi ĩ na, mi tɛ hɔ̀ ndɔti yui 'da mi gɔ, nɛ dungi 'da mi tɛ wè 'bɔ vɛ̃ gɔ. Nɛ nde mi 'bana tɛ yu dɛ dati, takɔ mi kpa mɔ olo yui ni, we kɛ Yezu Kristo ba mi do wi mɔ́ a ia.

¹³ Onyae, mi do linggamɔ na, mi kpa mɔ olo yui 'da mi ia ni bina. Nɛ nde mi fa kpo na, mi tɛ lènggè 'bɔ do mɛnɔ kɛ ma la ia ni gɔ, nɛ mi ba tɛ mi vɛ̃ we kpa kɛ ma 'bana dati mi i ni.

¹⁴ Ma kɛ mi tɛ yu a nga we hɔ ndɔti yui, takɔ mi kpa de mɛ kɛ Gale sa zi mɔ hã lɛ we nɛ li nza i do wala 'da Yezu Kristo ni.

¹⁵ Ma wia na, lɛ winɔ kɛ kɔ̃a we 'da lɛ nganda ia ni, lɛ ɔ do kpo linggamɔ na mɛ ni. Kɔ fala kɛ ombe sanga nɛ, wa lengge si tɛ̃ ɛ nde, nɛ Gale a be sɛ gulu nɛ hã nɛ.

¹⁶ Gɛnɛ kɔ ge nde, nɛ lɛ tɛ fò tɛ lɛ ngɔ wala lɛ ba ni gɔ, lɛ yú do ki ni dɛ dati fai.

¹⁷ Onyae, nɛ vɛ̃ nɛ 'bã́ olo kɔ̃ mi. Nɛ kálá li nɛ, hã nɛ zɔ mɛ kɛ winɔ dɛa mɔ tɛ wa wia kɔ̃ do kɛ nɛ zɔa kɔ̃ lɛ ni, wa dɛ ni.

¹⁸ Mi tɔ̃a zi hã nɛ fala dɛlɛ wena, nɛ sɔɛ gɛ mi tɔ̃ 'bɔ do mili kɔ̃a li mi na, dɛa mɔ tɛ ombe winɔ wena ma 'danga gulu fie 'da Kristo ngɔ finda te.

¹⁹ Winɔ ni, wa kã tɛ wa hã fio, we kɛ gale 'da wa mɛ a zã wa. Wa dɔnggɔ tɛ wa do mɛnɔ kɛ ma wia sɔ we hã sape hã wa ni, nɛ wa lengge tati a mɛnɔ nù gɛ iko.

²⁰ Nɛ nde kɛ 'da lɛ, le 'da lɛ ngboo a le nwa 'da Gale. Nɛ lɛ 'bɔ 'da tɛa 'da Nwa 'da lɛ Yezu Kristo, wi kpasa lɛ, kɛ a yolo sɛ i mɔ ni.

²¹ A tɛ, nɛ a kifi sɛ kili tɛ wi nùi tɛ lɛ kɛ ma a mbɔkɔ ni, nɛ ma we sɛ kɔ̃ do kili tɛ wi dɔ̃lɔ̃ li 'da a. A dɛ sɛ ni do ngawi kɛ ma dɛ na, a e mbula ngɔ mɛnɔ nyanga nza gɛ vɛ̃ ni.