FILIPƐ 2 - WE NU GALE 1995

Nɛ dɛ́ mɔ tɛ nɛ ɔ nɛ kɛ 'da Kristo ni

¹ Kɔ̃a we nɛ kɔ̃a do Kristo ni, ma hã́ ngawi hã nɛ gɔ nde? Nɛ kɔ̃a zã 'da Kristo ma hã̀ kpã sila hã nɛ, nɛ ma mba li nɛ kpo do Hi Wi Santo gɔ nde? Nɛ kɔ̃a gɛnɛ ongba nɛ, nɛ nɛ ĩ 'bako hã wa ĩ.

² Kɔ ma ɔ ni, nɛ mi aka nɛ na, nɛ ɔ́ do linggamɔ kpo, nɛ kɔ̃́ gɛnɛ ngba nɛ, nɛ nɛ ɔ́ do sila nɛ kpo, nɛ ma hã sɛ yangga hã mi ngboo.

³ Nɛ tɛ fà we nɛ ngɔ ngba nɛ gɔ, nɛ nɛ tɛ dɔ̀nggɔ̀ tɛ nɛ gɔ. Nɛ bá tɛ nɛ dɛ nù, nɛ nɛ zɔ́ ongba nɛ na, wa nɛa ngɔ nɛ.

⁴ Nɛ wele do wele tɛ fà dia mɔ tati a we a wele nɛ iko gɔ, nɛ nde a fa we dɛ dia mɔ hã ongba a.

⁵ Nɛ ɔ́ do kpo linggamɛ kɛ Yezu Kristo zi do ma ni.

⁶ Gɛnɛ kɔ a a kpo tɛlɛ tɛ Gale, nɛ nde a bà zi tɛ̃ a na, ɛ wɛlɛ we we kɔ̃ do Gale gɔ.

⁷ A la dɔ̃lɔ̃ li 'da a, nɛ a hɔa wi dɛa to. A hɔa wele, nɛ wa zɔa kili tɛ̃ a.

⁸ A ba tɛ a dɛ nù, nɛ a zila nu Gale gbaa ndɔti nɛ a fio, nɛ a fia ngɔ finda te.

⁹ Ma kɛ Gale ba a dɛ ngɔ, nɛ a hã dɔ̃lɔ̃ li hã a la li ngele. A ia li zu a, nɛ li ni nɛa ngɔ linɔ vɛ̃.

¹⁰ A dɛa ní na, winɔ li nza i, do wanɔ nù gɛ, do ofionɔ ti nù gɛ vɛ̃, wa dɔnggɔ zu li Yezu, nɛ wa gu nù ti a,

¹¹ nɛ wa vɛ, wa tɔ̃ dɛ nza na, Yezu Kristo a Nwa. Na mɛ ni, nɛ wa hã dɔ̃lɔ̃ li hã Baa a Gale.

Nɛ to ɔ nɛ osɔla ni

¹² Aa oyali ngba mi, 'da fala kɛ mi zi sanga nɛ i mɔ ni, nɛ zele zi nu mi zila fai. Kɔ ngangga ni, gɛnɛ kɔ mi sanga nɛ bina, nɛ nde ma dia fɛ̃ na, nɛ 'bana tɛ zele nu mi na mɛ ni. Gale kpasa nɛ ia, kɔ nɛ yú kili a, nɛ nɛ dɛ́ nganda na, kpasi 'da nɛ ni we vɛ̃.

¹³ We kɛ Gale tɛ dɛ to kɔ sila nɛ na, nɛ kpa wɔ tɛ mɛnɔ kɛ ma de tɛ̃ a ni, nɛ nɛ kpa 'bɔ ngawi we dɛ ma.

¹⁴ Nɛ dɛ́ mɛnɔ vɛ̃ kɛ nɛ wia tɛ dɛ nɛ ni, nɛ nɛ tɛ lùngù we gɔ, nɛ nɛ tɛ mɔ̃̀ mɔ̃lã gɔ.

¹⁵ Nɛ dúngú do sa sila, nɛ nɛ tɛ dɛ̀ mɔ kɛ wa wia we kɔ'dɔ nɛ we nɛ ni gɔ. Nɛ ɔ́ benɔ 'da Gale, nɛ 'dã mɔ tɛ ɔ̀ kɔ nɛ gɔ. Nɛ nɛ tó ɔ nɛ sɔla ni sanga winɔ nù gɛ, kɛ wa a owi 'dã hã, do Owi nga zu ni.

¹⁶ Nɛ nɛ bé Dia Sakoe kɛ ma hã kpasi ni hã wa. Kɔ nɛ dɛ ni, nɛ mi dɔnggɔ sɛ tɛ mi do nɛ, do 'da fala kɛ Kristo a tɛ sɛ nɛ ni. Mba gɔ, ki ni ma be sɛ na, olo toe mi dɛa zi, do ngamɛnɔ mi zɔa zi ni, ma ɔ̀ yala iko gɔ.

¹⁷ Kɔ̃a we 'da nɛ ɔ nɛ dɔnggamɔ kɛ nɛ dɔnggɔ do Gale ni. Kɔ fala kɛ ma we na, tɔkɔ tɛ mi ma a nù we mba do dɔnggamɛ 'da nɛ ni, nɛ mi dɛ sɛ yangga wena, nɛ nɛ mba sɛ do mi kɔ yangga ni.

¹⁸ Kɔ ma wia tɛ mɛ 'bɔ na, nɛ dɛ yangga, nɛ mi mba do nɛ kɔ yangga ni.

We ngɔ Timote do Epafroditɛ

¹⁹ Mi gbini zã mi do Nwa Yezu na, a hã wala hã mi, hã mi tombo Timote 'da nɛ i dɔ̃ gɛ, kɔ a si do Sakonɔ 'da nɛ hã mi, hã sila mi gɛ.

²⁰ I nga gɛ, fo gele wele kɛ lɛ do a ngɔ linggamɔ kpo, nɛ a lengge nɛ ngboo lingga ni bina, wi tati a Timote iko.

²¹ Tala winɔ vɛ̃, wa lengge tati a dia mɛ 'da wa wele nɛ iko, wa lénggé do we 'da Yezu Kristo gɔ.

²² Nɛ nde kɛ 'da Timote, nɛ ĩ ti de dɛa mɔ tɛ̃ a. A dɛa to be Dia Sakoe do mi fala nɛ kpo, ɔ nɛ kɛ be dɛ to do baa ɛ ni.

²³ Ma kɛ mi lengge na, fala kɛ wa 'bili we 'da mi do'do, nɛ mi tombo a 'da nɛ i do ti.

²⁴ Nɛ mi gbini zã mi do Nwa na, mi do tɛ mi, mi nɛ sɛ 'bɔ 'da nɛ i mɔ dɔ̃ gɛ.

²⁵ Nɛ nde mi zɔa na, ma dia fɛ̃ na, mi tombo nya mi Epafroditɛ hã nɛ. A a ngba mi wi dɛa to, nɛ lɛ bi zi bole do a kpo we be Dia Sakoe. Nɛ nɛ tumba zi a hã mi, takɔ a gala mi do mɛnɔ kɛ mi zɔla ni.

²⁶ Ngangga gɛ, wɔ zɔ tɛ nɛ ba a wena, nɛ a do linggamɔ wena, we kɛ a ĩ na, nɛ zila zi sako zɛlɛ 'da ɛ.

²⁷ A zi do zɛlɛ gbãlã we, nɛ ma 'bana zi sĩ na a fe. Nɛ nde Gale ĩ 'bako hã a, nɛ a kpasa a. Gale ĩ̀ 'bakoe ni tati nɛ hã a iko gɔ, nɛ nde a ĩ 'bakoe ni hã mi na, da dɛ kɔ mi kpá 'bɔ mbé 'bako dɛ ngɔ kɛ mi do ma gɛ gɔ.

²⁸ Ma kɛ mi kɔ̃a we gese a hã nɛ dɔ̃, takɔ nɛ zɔ tɛ a, nɛ nɛ dɛ yangga, nɛ 'bakoe 'da mi mbɔkɔ mbe.

²⁹ Kɔ a hɔ i mɔ, nɛ nɛ kɔ̃́ gɛnɛ a do yangga, we kɛ a a nya nɛ wi Kristo. Ma wia na, nɛ dɔnggɔ Owi ɔ nɛ Epafroditɛ ni.

³⁰ Mba gɔ, a hɔa fɛna fio kɔ dɛa toe 'da Kristo. A kã zi tɛ̃ a hã fio we gala mi do mɛ kɛ nɛ wè zi tɛ dɛ nɛ gɔ ni.