FILIPƐ 1 - WE NU GALE 1995

¹ Wi a mi Polo, lɛ do Timote, Owi dɛa tonɔ 'da Yezu Kristo, lɛ kɔma mbɛti gɛ hã nɛ owinɔ 'da Gale tɛ kɔ le Filipɛ, kɛ nɛ mba kpo do Yezu Kristo ni. Lɛ kɔma 'bɔ hã nɛ, Owi zɔ mɔ tɛ eklezianɔ, do owi 'dafa to kɔ eklezianɔ.

² E kɔ Baa lɛ Gale, do Nwa 'da lɛ Yezu Kristo wa be dia zã 'da wa hã nɛ, nɛ wa dɛ na, nɛ dungu do gɛa sila.

Polo sambala Gale we owi Kristonɔ tɛ Filipɛ

³ 'Da falanɔ vɛ̃ kɛ mi lengge do nɛ ni, nɛ mi hã iɔ̃nae hã Gale.

⁴ Nɛ 'da falanɔ vɛ̃ mi sambala Gale we nɛ ni, mi sambala do yangga,

⁵ we duzu kɛ ndo do kɔ̃ tũi kɛ nɛ kɔ̃a zi do zu li Yezu ni, nɛ gala lɛ tɛ to be Dia Sakoe gbaa we hɔ sɔɛ gɛ.

⁶ Gbãlã we, mi ĩ na, Gale kɛ a ndua nyanga dɛ dia to kɔ sila nɛ ni, a 'bana sɛ tɛ dɛ na mɛ ni fai, gbaa we sɔkpɔ do ngba soe kɛ Yezu Kristo a tɛ sɛ nɛ ni.

⁷ Kɔ ma dia fɛ̃ na, mi lengge do nɛ na mɛ ni, we kɛ nɛ ngɔ sila mi. Mba gɔ, 'da fala kɛ mi zi tɛ bi ngɔ Dia Sakoe, do dɛ na ma nganda kɔ sila winɔ ni, nɛ nɛ mba zi do mi kɔ dɛa toe ni, kɛ Gale hã ma hã mi do dia zã 'da a ni. Nɛ sɔɛ gɛ, nɛ́ kɛ mi a kɔ bɔlɔkɛ gɛ, nɛ 'bana tɛ dɛ toe ni do mi.

⁸ Gale ĩ na, we mi nɛ tɔ̃ nɛ gɛ a gbãlã we: Mi kɔ̃a gɛnɛ nɛ wena ɔ nɛ kɛ Yezu Kristo kɔ̃a do gɛnɛ nɛ ni.

⁹ Mi sambala Gale we nɛ na, kɔ̃a zã 'da nɛ gã dɛ dati, nɛ nɛ ĩ ti gbãlã we ngboo, nɛ nɛ kpa hã zã,

¹⁰ we saka mɛ kɛ ma dia nɛa ngɔ ngbɛ ɛ ni. Na mɛ ni, sila nɛ sɛ a sa, nɛ do ngba soe kɛ Yezu Kristo a tɛ sɛ nɛ ni, nɛ nde nɛ kpá sɛ kɔ'da gɔ.

¹¹ Yezu Kristo a dɛ sɛ na, nɛ dɛ bɔlɔ zu dɛa mɔ kɔ dungu nza 'da nɛ vɛ, nɛ ma hã dɔ̃lɔ̃ li do dɔngga wi hã Gale.

Polo dungu we Yezu Kristo

¹² Onyae, mi kɔ̃a na nɛ ĩ́ na, ngamɛnɔ mi kpa ma ni, ma gala Dia Sakoe na, ma yɛ'bɛ dɛ dati.

¹³ Mba gɔ, osodanɔ wa zɔ mɔ tɛ nu tɔa 'da gã nwa ngɔ nù Roma ni, do ombe gele winɔ vɛ, wa ĩ na, mi lia bɔlɔkɛ gɛ, we kɛ mi kɔ̃a zu li Yezu Kristo.

¹⁴ Nɛ bɔlɔkɛ mi lia gɛ ma dɛa na, mbe dɛlɛ onya lɛ wi kɔ̃a wenɔ wa gbini zã wa do Yezu Kristo dɛ dati. Nɛ ma kpãlã sila wa we be we nu Gale hã Owele, nɛ wa tɛ dɛ̀ 'bɔ kili gɔ.

¹⁵ Kafi bina, ombe sanga wa ni, wa be Dia Sakoe 'da Kristo do kɔ sila bɔnɛ, nɛ wa fa we nɛ ngɔ ngba wa iko. Nɛ nde ombe wa be ma do dia kɔ sila ngboo.

¹⁶ Wanɔ ni wa dɛ to we duzu kɛ wa kɔ̃a gɛnɛ mi, nɛ wa ĩ na, Gale ia mi do wi bi ngɔ Dia Sakoe.

¹⁷ Nɛ nde kuti wanɔ ni, wa be Sakoe 'da Kristo do sila wa bɔa, we kɛ wa kɔ̃a na li lo dɔ̃lɔ̃ nɛ ngɔ mi. Wa lengge na lo dɛ́ ni, sɛ a ma hã 'bɔ mbé zɛlɛ tɛ hã mi dɛ ngɔ kɛ mi do ma kɔ bɔlɔkɛ gɛ de.

¹⁸ Ma dɛ́ mɔ gɔ! Gɛnɛ kɔ wa be Dia Sakoe 'da Kristo do kɔ sila bɔnɛ, tabi wa be do ngbongbo nɛ, nɛ nde we bina. Wa vɛ̃ wa tɛ pɛsɛ Dia Sakoe dɛ dati, nɛ ma hã yangga hã mi. Nɛ mi dɛ sɛ yangga we ma fai,

¹⁹ we kɛ mi ĩ na, mɛnɔ vɛ̃ ma sɔkpɔ sɛ hã mi do dia nɛ, we duzu sambala 'da nɛ, mba do Hi Wi 'da Yezu Kristo kɛ a gala mi ni.

²⁰ Mɛ mi kɔ̃a ma ngboo, nɛ mi e sila mi ngɔ ma vɛ ni, mɛ a kɛ na, dɔ mi dɛ́ mɔ kɛ ma hã sape hã mi ni gɔ. Nɛ nde di ngangga ni, do 'da fala fai, tabi mi 'bana nza, tabi mi fe nde, nɛ mi sɛ do nɔa sila na, dɛa mɔ tɛ mi vɛ́ hã dɔ̃lɔ̃ li hã Yezu Kristo.

²¹ Mba gɔ, we mi, gulu dungu nza 'da mi a Kristo. Nɛ fio a de mɔ we mi.

²² Kɔ fala kɛ mi 'bana nza, nɛ mi we sɛ 'bɔ we dɛ dia dɛa to hã winɔ. Mi lengge ma bɔa nɛ, nɛ mi ĩ̀ ti kɛ mi nɛ saka nɛ ni gɔ.

²³ Ma ɔ nɛ kɛ mi a nu nzangba wala ni. Mi kɔ̃a na mi fe, takɔ mi nɛ we kpa li ngba mi do Kristo, nɛ ki ni ma de sɔ tɛ mi la li.

²⁴ Nɛ nde we duzu nɛ, ma dia fɛ̃ na, mi 'bana nza.

²⁵ Nɛ we duzu ki ni, mi ĩ na, mi 'bana sɛ nza, nɛ mi dungu sɛ do nɛ we gbaka nɛ, takɔ nɛ kɔ̃ gɛnɛ Gale dɛ dati fai, nɛ nɛ dɛ yangga.

²⁶ Na mɛ ni, 'da fala kɛ mi hɔ nza kɔ bɔlɔkɛ, kɔ mi kpolo tɛ mi dɛ 'da nɛ i, nɛ nɛ dɔnggɔ sɛ 'bɔ Yezu Kristo dɛ dati we duzu mi.

²⁷ Nɛ nde dati ngboo ma wia na, nɛ 'dafa dungi 'da nɛ, nɛ ma we do 'da Dia Sakoe 'da Yezu Kristo. Kɔ fala kɛ mi hɔ 'da nɛ i, tabi mi hɔ̀ 'bɔ gɔ nde, nɛ mi zele sɛ na, nɛ 'bana do nɔa sila kɔ kɔ̃a we 'da nɛ, nɛ nɛ 'bana do sila nɛ kpo, do linggamɔ kpo, we bi ngɔ Dia Sakoe kɛ nɛ kɔ̃a ma ni.

²⁸ Nɛ tɛ dɛ̀ kili owi sɛnɛ nɛ fala kpo gɔ. Nɛ ɔ́ do kpã sila, nɛ ma be sɛ hã wa na, wa kumu sɛ, nɛ nɛ kpasa sɛ. Nɛ wi a Gale hã a dɛa na mɛ ni we nɛ.

²⁹ Mba gɔ, Gale bia dia zã 'da a hã nɛ na, nɛ ɔ owinɔ 'da Kristo. A sàkà nɛ na, nɛ kɔ̃ zu li Kristo iko gɔ, nɛ nde nɛ zɔ 'bɔ ngamɔ we duzu a.

³⁰ Ma a ngangga ni, nɛ mba do mi li bole kɛ mi bi ni. Mɛ a kpo bole kɛ mi bi zi, nɛ mi 'bana tɛ bi nɛ, nɛ́ kɛ nɛ ĩ fala nɛ ni.