OZE 9 - WE NU GALE 1995

Oze mbisa Oisraɛlɛ na wa kpa sɛ etumbu

¹ Aa nɛ, Oisraɛlɛ, nɛ lá fala dungu ɛngga, nɛ nɛ tɛ dɛ̀ 'bɔ yangga ɔ nɛ ogele winɔ ni gɔ. We kɛ nɛ siki 'do nɛ lua do Gale 'da nɛ do'do, nɛ nɛ yɛnggɛ 'dɔkɔlɔ gele galenɔ ɔ nɛ kɛ owuko ndumba wa yɛnggɛ 'dɔkɔlɔ owi wilinɔ ni. Nɛ nɛ zɔ kpalɛnɔ kɔ yangganɔ 'da nɛ ɔ nɛ si olo kɛ nɛ dɔnggɔ do Bala ni.

² Nɛ nde Gale a dɛ sɛ na, kpalɛ tɛ ɔ̀ 'bɔ kɔ yangganɔ 'da nɛ gɔ, nɛ nɛ zɔlɔ sɛ dɔ́ do nɔ.

³ Nɛ, Oisraɛlɛ, nɛ 'báná sɛ dɛ ngɔ nùi 'da NWA Gale fai gɔ, nɛ kpolo sɛ tɛ nɛ dɛ ngɔ nù Ezipeto, tabi Asiri, nɛ nɛ nyɔngɔ sɛ mɛnɔ kɛ Gale bɛ̃a ma ni.

⁴ Nɛ 'da fala nɛ sɛ a ngɔ gele nùnɔ ni, nɛ nɛ wé sɛ 'bɔ we hã odɔnggamɔ dɔ́, tabi gbɛ sa'denɔ 'da nɛ we dɔnggɔ do NWA Gale gɔ. Nɛ nyɔngɔmɛnɔ 'da nɛ, ma ɔ sɛ nɛ nyɔngɔmɔ nu tɔa fio ni. Wi kɛ a nyɔngɔ ma, nɛ a hɔ sɛ wi ndi li NWA. Nyɔngɔmɛ 'da nɛ ma sɛ tati a we wɔ zã nɛ, nɛ nde nɛ lé sɛ do ma kɔ Tɛmpɛloe 'da NWA, we dɔnggɔ do a gɔ.

⁵ Hã fala kɛ kɔ̃ tũ ɛngga 'da NWA ma we, nɛ nɛ dɔnggɔ sɛ a do ge nde?

⁶ 'Da fala ngamɔ hɔ ngɔ nùi, kɔ nɛ pɛsɛ ni, nɛ Oezipeto wa ngɛmɛ sɛ li nɛ si do nɛ. Nɛ nɛ fe sɛ dɛ i mɔ, nɛ wa mi sɛ nɛ kɔ le Mɛmfisi. Nɛ odia mɛnɔ 'da nɛ kɛ wa dɛa do fɛ̃a mɔ bolonɔ ni, nɛ la sɛ ma dɛ i mɔ, nɛ ma 'danga sɛ, nɛ hɛlɛ ma hɔ sɛ olo tɔanɔ 'da nɛ.

Oisraɛlɛ wa dã Oze

⁷ Aa nɛ, Oisraɛlɛ, ngba soe kpa etumbui 'da nɛ ma wia ia. Gale nɛ bili nu gbã 'dã mɛnɔ 'da nɛ, nɛ nɛ ĩ sɛ fala nɛ! Nɛ tɔ̃ dɛ ngɔ mi na: “Bɔ tia zu wi gba olo nu Gale gɛ do'do! A tɔ̃ na, Hi Wi 'da Gale kɔ ɛ boe, nɛ nde a wele we mba mba iko.” Nɛ sɛnɛ mi wena we duzu kɛ 'dã mɛnɔ 'da nɛ ma dɔa la li ngele.

⁸ Gale tumba mi na, mi gba olo nu a, nɛ mi zɔ mɔ tɛ owinɔ 'da a, Oisraɛlɛ. Nɛ nde falanɔ vɛ̃ mi la do ma ni, nɛ ndɔa bili hã mi. Nɛ gɛnɛ kɔ mi a kɔ tɔa 'da Gale ngboo, nɛ nɛ Owi sɛnɛ mi, nɛ bi mi iko.

⁹ Nɛ dɛa 'dã mɔ gbaa, nɛ nɛ hɔa Sɔkpɔ nɛ, ɔ nɛ kɛ oyaa nɛ wa dɛa zi tɛ Gibea i ni. Nɛ nde ta zu NWA èlè ngɔ 'dã mɛnɔ 'da nɛ gɔ, a hã sɛ etumbu hã nɛ.

Oisraɛlɛ wa kpa sɛ etumbu olo 'dã mɛnɔ 'da wa

¹⁰ NWA tɔ̃a na: “Kuti kɛ mi kpa zi nɛ, obe Israɛlɛ ni, ma dia zi ɔ nɛ mi kpa be ganza wala te vinɔ li go ni. Nɛ 'da fala kɛ mi zɔa zi oyaa nɛ ni, ma ɔ zi nɛ mi zɔa kuti wala te kɛ ma fila ngɔ te nɛ ni. Nɛ nde 'da fala oyaa nɛ wa nɛa we hɔ tɛ Bɛtɛ-Peɔrɛ ni, nɛ wa hã tɛ wa we dɔnggɔ gale Bala. Nɛ wa ngboo ni, wa dɛa mɔ sape ɔ nɛ galenɔ kɛ wa kɔ̃a gɛnɛ wa ni.

¹¹ We duzu ma, dɔ̃lɔ̃ li 'da nɛ Oisraɛlɛ ma la sɛ ɔ nɛ nɔɛ ni. Fo sɛ onzɔ be mɔ́ nɛ bina, nɛ wi naa zã tabi mbé be sɛ 'bɔ kɔ nɛ bina.

¹² Nɛ gɛnɛ kɔ nɛ ko 'bɔ obe, kɔ benɔ ni wa kpasa, nɛ mi kala sɛ wa kɔ nɛ, nɛ mi lá sɛ mbe kpo do tunu li a gɔ. 'Da fala mi bɛ̃ sɛ gɛnɛ nɛ ni, nɛ nɛ kpa sɛ ngamɔ wena.”

¹³ Aa NWA, Oisraɛlɛ wa dia zi nɛ́ fɔ lì ni. Nɛ nde ngangga gɛ, wa tɛ 'dɔlɔ benɔ 'da wa hã owi gbɛ wa.

¹⁴ Kɔ mɛ mi nɛ aka kɔ mɔ NWA we owinɔ gɛ a ge nde? Mi aka mɔ na, mɔ dɛ́ na wukonɔ 'da wa wa hɔ ndɔlɔ, nɛ wa tɛ ɔmɔ 'bɔ obe gɔ!

NWA hã etumbu hã Oisraɛlɛ

¹⁵ NWA tɔ́a na: “'Dã mɛnɔ 'da wa vɛ̃ ma bia zi tɛ̃ ɛ dɛ nza tɛ Gilgalɛ i, nɛ mi ndua zi sɛnɛ wa dɛ di ni. Nɛ we duzu 'dã mɛnɔ wa dɛa ni, mi ndaka sɛ wa ngɔ nùi 'da mi do'do, nɛ mi kɔ̃́ sɛ 'bɔ gɛnɛ wa gɔ. Ogã winɔ 'da wa vɛ̃ wa dɛa nga zu dɛ tɛ mi.

¹⁶ Oisraɛlɛ wa ɔ nɛ te kɛ Hã nɛ mbulu, nɛ ma kula, nɛ ma wè 'bɔ tɛ wala nɛ gɔ ni. Nɛ gɛnɛ kɔ wukonɔ 'da wa wa ko obe, nɛ mi gbɛ sɛ benɔ kɛ wa ngɔ sila wa ni do'do.”

Oze wila we dɛ ngɔ Oisraɛlɛ

¹⁷ Gale kɛ mi dɔnggɔ a ni, a kɔ̃̀ 'bɔ gɛnɛ owinɔ 'da a gɔ, we kɛ wa kɔ̃̀ we zele a gɔ. Ma kɛ wa pɛsɛ sɛ, nɛ wa yɛnggɛ sɛ mba mba do sanga ogele nu kɔnggɔnɔ.