OZE 8 - WE NU GALE 1995

NWA hã etumbu hã Oisraɛlɛ we kpikimanɔ wa dɔnggɔ ni

¹ NWA tɔ̃a na: “Nɛ dámá mɔtũlũ bolo! O'dã wi wa zĩlĩ sɛ dɛ ngɔ winɔ 'da mi, ɔ nɛ ziki zĩlĩ dɛ ngɔ sa'de ni. We kɛ owinɔ 'da mi wa yala gba tɔkɛ mi gba zi do wa ni do'do, nɛ wa bɛ̃a we zele mbulanɔ 'da mi.

² Gɛnɛ kɔ wa sa li mi na, mi a Gale 'da wa, nɛ wa tɔ̃ na lo a owinɔ 'da mi,

³ nɛ nde wa bɛ̃a mɛ kɛ ma wia we gala wa ni do'do. Ma kɛ owi sɛnɛ wa wa ndaka sɛ wa.

⁴ “Oisraɛlɛ wa saka nwanɔ 'da wa, do owi olo li wa ɔ nɛ kɛ zã wa kɔ̃a ni, nɛ nde wa áká mi we ĩ ti linggamɛ 'da mi gɔ. Wa kala fɛ̃a mɔ bole, do mɔ mbali 'da wa, nɛ wa dolo do okpikima. Kɔ mi kumu sɛ wa we duzu ma.

⁵ Aa nɛ, owi Samaria, zã mi nɔ̃lɔ̃ dɛ tɛ nɛ wena, we kɛ mi sɛnɛ be wili ngɔmbɛ kɛ nɛ dula do mɔ mbali we dɔnggɔ ma ni wena. Nɛ la sɛ fala dɔnggɔ kpikimanɔ 'da nɛ soe ki nge nde?

⁶ Nɛ, Oisraɛlɛ, nɛ dula kpikima be wili ngɔmbɛ ni do kɔ̃ nɛ ngboo. Mbe wi dɛ dula hã a dula ma, nɛ nde mɛ a ngbongbo Gale gɔ. Ma kɛ mi gbini sɛ sanga be wili ngɔmbɛ mɔ mbali ni sikili sikili, nɛ ma pɛsɛ sɛ vɛ̃.

⁷ Ɔ nɛ kɛ nɛ fa ngamɔ ni, nɛ kpa sɛ gã zɛlɛ tɛ. Fala kɛ fo gbãlã li kɔni bina, nɛ nde wele to sɛ do tula gɔ. Kɔ gɛnɛ kɔ gbãlã nɛ boe, nɛ ogele wele wa to sɛ do tula, nɛ wa nyɔngɔ ma.

⁸ “Ogele nu kɔnggɔ wa yɔ'dɔ nu kɔnggɔ Oisraɛlɛ vɛ̃. Nɛ wa ɔ sanga wa nɛ sangbãlã kɛ wa da nù ni.

⁹ Zu wa ma nganda nɛ́ zu wili punda, kɛ a yɛnggɛ zu a kpo ni. Nɛ nde wa nɛa 'da Oasiri we fa gala wi kɔ̃ wa, nɛ wa hã mbili hã ogele nu kɔnggɔnɔ, takɔ wa bi bolo zu wa.

¹⁰ Kɔ mi nɛ ngɛmɛ li wa vɛ̃ kpo, nɛ wa kpa sɛ ngamɔ ti kɔ̃ nwa ngɔ nù Asiri.

¹¹ “Oisraɛlɛ wa 'dafa ogbagala dɔ wena, we hã do dɔnggamɔ we si olo ku'da 'dã mɔ zu wa. Nɛ gbagalanɔ ni ma hɔa fala dɛ 'dã mɔ mɔ́ wa.

¹² Mi kɔma mbulanɔ 'da mi hã wa dɔ wena, nɛ nde wa zɔ ma nɛ́ mbula mɔ́ ogele wi ni.

¹³ Gbɛ osa'de we dɔnggɔ do mi, ma de tɛ wa wena, sɛ a wa nyɔngɔ mulu sa'denɔ ni de. Nɛ nde mi NWA, mi dɛ́ yangga ma gɔ. Mi èlè 'dã mɛnɔ 'da wa gɔ, ma 'bana dɛ li mi gɛ iko. We duzu nɛ, wa kpolo sɛ 'bɔ tɛ wa dɛ Ezipeto.

¹⁴ “Oisraɛlɛ wa dɛa gã tɔa nwa, nɛ ta zu wa ila ngɔ mi, Wi dɛ wa do'do. Nɛ Oyuda wa dɛa tɛ mɛ 'bɔ ongbo 'do lenɔ 'da wa, nɛ nde mi fi sɛ we tɛ lenɔ ni, nɛ ma bɛlɛ sɛ gã tɔanɔ 'da wa.”