OZE 7 - WE NU GALE 1995

'Dã mɛnɔ kɛ Oisraɛlɛ wa dɛ ma ni

¹ “Fala kɛ mi lengge we kpasa Oisraɛlɛ, kɔ mi nɛ ka mɔ, nɛ mi zɔ 'bɔ 'dã mɛnɔ vɛ̃ kɛ wa dɛ ni. Wa ĩ ti ɔlɔ ngba wa wena. Wa gbini nu tɔanɔ, nɛ wa le we zũ mɔ, wa gɔnɔ ti owi la walanɔ, nɛ wa zũ mɛnɔ kɔ wa.

² Nɛ nde fo wi lengge mbe na, mi zɔ 'dã mɛnɔ 'da lo zɔa ni bina. 'Dã mɛnɔ 'da Oisraɛlɛ ma fi fɛlɛ gɛlɛ wa ia, nɛ 'dã mɛnɔ ni vɛ̃ ma dɛ ngɔ li mi gɛ.”

Oisraɛlɛ wa ba zã zu gbɛ nwanɔ 'da wa

³ NWA tɔ́a na: “Owinɔ wa usu 'dã linggamɔ zu wa, nɛ wa tɔ̃ ɛ̃fɛ̃ lɛnggɛ hã nwanɔ do owi olo li wa, nɛ ma de tɛ wa.

⁴ Winɔ ni vɛ̃ wa a Owi ɔkɔlɔ wi. Sɛnɛmɔ nyɛ kɔ sila wa ɔ nɛ we kɔ furu, kɛ wi dɔ mapa dã ma, nɛ a lá na ma nyɛ, nɛ ma ba we gbaa na, mapa hana sɛ ni.

⁵ 'Da fala ɛngga 'da nwa, nɛ a nɔ dɔɛ do Owi olo li a gbaa, nɛ ma zangala zu wa, nɛ a dɛ sa do Owi vũ to tɛ̃ a.

⁶ Nɛ nde kɔ sila Owi vũ to tɛ̃ a ni, ma nyɛ nɛ́ we kɔ furu ni. Do tũi, nɛ wa e ta ngɔ sila wa, kɔ ma nɛ hɔ titole, nɛ dã 'da wa fũ, nɛ ma nyɛ ɔ nɛ we ni.

⁷ Nɛ ma hɛlɛ onwa ngɔ wa, nɛ wa fe do 'do ngba wa kpo kpo, nɛ nde wele kpo kɔ wa ni sá mɔ hã mi na, mi gala ɛ gɔ.

Oisraɛlɛ wa nɛa 'da ogele winɔ na wa gala lo

⁸ “Oisraɛlɛ wa ɔ nɛ mukate kɛ wele dɔa ma, nɛ nde a kìfì gɔ, nɛ ma bɛlɛ do mbee nɛ iko ni. Wa mba ngba wa do ogele winɔ, nɛ 'dã mɛ 'da winɔ ni ma lia wa,

⁹ nɛ nde wa ĩ̀ na, gele winɔ wa nɔmɔ ngawi 'da lo do'do ni gɔ. Wa mbɔkɔ ɔ nɛ kpasa wi ni, nɛ nde wa ĩ́ fala nɛ gɔ.

¹⁰ 'Dã mɛ 'da Oisraɛlɛ ma fi wa li ngbangga. Nɛ nde kɔ mɛnɔ ni vɛ̃, wa kpòlò tɛ wa we fa mi NWA Gale 'da wa gɔ.

¹¹ Wa dɛ mɔ tɛ wa ɔ nɛ nɔɛ kɛ a bũlũ si falanɔ vɛ̃, nɛ nde a lénggé mɔ gɔ ni. Wa sa mɔ hã Oezipeto na, wa gala lo. 'Do nɛ, nɛ wa yu 'bɔ dɛ 'da Oasiri we fa gala wi kɔ̃ wa.

¹² Nɛ nde 'da fala wa nɛ la dɛ i mɔ ni, nɛ mi da sɛ gbanda 'da mi, nɛ ma kala wa ɔ nɛ onɔɛ ni. Nɛ mi hã sɛ etumbu hã wa we kɔ̃ do 'da 'dã mɛnɔ wa dɛa ni.

¹³ “'Bako do Oisraɛlɛ, we kɛ wa yu mi ni. Mi kumu sɛ wa vɛ̃, we kɛ wa dɛa nga zu dɛ tɛ mi. Mi kɔ̃a sɔ we kpasa wa, nɛ nde wa sambala mi do bɛlɛ iko.

¹⁴ Wa sámbálá mi do kɔ sila wa vɛ̃ gɔ. Wa te nù, nɛ wa zɛ nu wa, nɛ wa gɔnɔ dã tɛ wa, nɛ wa gbini zã wa na, lo kpa sɛ dia kpalɛ do dia dɔ̃. Na mɛ ni, wa dɛa nga zu dɛ tɛ mi.

¹⁵ Gɛnɛ kɔ mi bia wala hã wa, nɛ mi hã ngawi hã wa li bolo, nɛ nde wa là fala ba zã zu mi gɔ.

¹⁶ Wa kpòlò tɛ wa dɛ 'da mi gɔ, wa nɛa dɛ 'da gele wele. Wa ɔ nɛ nzabele kɛ zã nɛ dɔngba, nɛ tili nɛ ba li wi da ma do'do ni. Nwanɔ 'da wa wa fe sɛ li bolo, we duzu lɛnggɛ ngatɛnɔ wa tɔ̃ ni, nɛ wa hɔ sɛ wi gbɔlɔ mɔmu ngɔ nù Ezipeto.”