OZE 6 - WE NU GALE 1995

Oisraɛlɛ wa kpolo sɛ tɛ wa 'da Gale nde?

¹ Owinɔ wa tɔ̃ na: “Lɛ nɛ́, lɛ kpóló tɛ lɛ dɛ 'da NWA! Wi ia dani tɛ lɛ, wi a a, kɔ a a sɛ dani ni. Wi zɛa lɛ, wi a a, kɔ a kpasa sɛ lɛ.

² Ma 'bana di tũ bɔa, talɛ, nɛ a tɛ sɛ we ba lɛ dɛ ngɔ, nɛ lɛ sɛ dɛ kɛ zã a.

³ Kɔ lɛ dɛ́ nganda we ĩ ti NWA, nɛ lɛ kɔ̃ gɛnɛ a. Lɛ tɛ bà kafi gɔ, a hɔ nɛ! A zɔ́lɔ́ sɛ gɔ, ɔ nɛ kɛ titole kpo kpo, nɛ wese zɔ́lɔ́ tɛ gba nɛ gɔɛ ni. A hɔ sɛ 'da lɛ nga, nɛ a ɔ sɛ nɛ kolo, kɛ ma tɛ dɛ zu kpalɛnɔ ni.”

⁴ Nɛ nde NWA tɔ̃a na: “Aa nɛ, Oisraɛlɛ do Oyuda, mɛ mi nɛ dɛ hã nɛ ni a ge nde? Kɔ̃a zã 'da nɛ dɛ 'da mi, ma e 'da kala gɔ ɔ nɛ kutu, tabi mbɔɛ titole ni.

⁵ Ma kɛ mi tumba Owi gba olo nu mi we tɔ̃ ngbangga dɛ ngɔ nɛ, nɛ olo nu mi ma gbɛ sɛ nɛ. Nɛ 'bili we 'da mi ma sala sɛ nɛ́ tua wese ni.

⁶ Mba gɔ, dɛ mɔ do dia zã ma dia tɛ mi nɛa ngɔ odɔnggamɛnɔ. Ĩ ti mi na, mi a Gale ma dia tɛ mi nɛa ngɔ dɔ osa'de we dɔnggɔ do mi.

⁷ “Nɛ nde nɛ, 'da fala kɛ nɛ lia kɔ le Adamɛ, nɛ nɛ yala gba tɔkɛ, nɛ nɛ 'bana tɛ vũ to tɛ mi fai.

⁸ Galadɛ mɛ a le kɛ ma dunu do Owi dɛ 'dã mɔ, do Owi gbɛ wi.

⁹ Nɛ onganganɔ wa hɔa owi gbɛ wi. Wa usu tɛ wa tɛ li wala le Sikɛmɛ, kɛ owinɔ wa dɔnggɔ mi Gale tɛ nɛ ni, nɛ wa kala wa, nɛ wa gbɛ wa. Kɛ wa dɛa ni, mɛ a gã 'dã mɔ.

¹⁰ Mɛ kɛ mi zɔa ngɔ nù Israɛlɛ ni, ma 'danga la li ngele. Dɛa ndumba 'da Oisraɛlɛ ma 'danga nù Israɛlɛ vɛ̃.

¹¹ Nɛ ma tɛ mɛ 'bɔ na mɛ ni we nɛ, Oyuda. Nɛ mi 'dafa 'bɔ ngba soe hã etumbu olo 'dã mɛnɔ 'da nɛ ia.