OZE 5 - WE NU GALE 1995

Gale dãlã we dɛ tɛ onganganɔ do ogã winɔ

¹ NWA tɔ̃a na: “Aa nɛ, onganganɔ, nɛ zélé we gɛ! Nɛ nɛ, obe Israɛlɛ, do Owi nu fɛlɛ nwa, nɛ gɛ́ zala nɛ sɛ! Ma wia sɔ na, nɛ gɔnɔ wenɔ do bɔlɔ nɛ. Nɛ nde nɛ dɛa na, owinɔ 'da mi wa te kɔ 'dã mɔ. Nɛ ndɔa bili hã wa tɛ Mispa, nɛ nɛ fí gbanda hã wa tɛ ngɔ kala Tabɔrɛ.

² Nɛ nɛ gu kɔ̃ hã wa tɛ Sitimɛ. Nɛ nde mi hã sɛ etumbu hã nɛ vɛ̃.

³ Mi ĩ ti obe Israɛlɛ de wena, wa do mɔ kɛ ma usu tɛ̃ ɛ ni li mi bina. Nɛ dɛa na, wa yɛnggɛ 'do gele galenɔ, ɔ nɛ wuko ndumba yɛnggɛ 'do wi wili ni, nɛ wa hɔa wi ndi li mi.”

Oze dãlã dɛ tɛ owi sambala kpikimanɔ

⁴ Oisraɛlɛ wa ba sila wa vɛ̃ we dɔnggɔ ogele galenɔ. Dɛa mɔ tɛ wa kpia wala ti wa na, wa tɛ kpòlò tɛ wa dɛ 'da Gale 'da wa gɔ. Mba gɔ, wɔ tɛ kpikimanɔ nɛa ngɔ sila wa do'do, nɛ wa kɔ̃̀ 'bɔ gɛnɛ Gale gɔ.

⁵ Wali 'da Oisraɛlɛ ma fi wa li ngbangga. Nɛ 'dã mɛ 'da wa dɛa na, wa kɔ zu nyanga wa, nɛ wa te. Oyuda wa mba do wa, nɛ wa te 'bɔ kɔ kpo 'dã mɛ ni.

⁶ Wa tɛ do ngɔmbɔnɔ, do obatanɔ 'da wa we gbɛ wa, takɔ wa dɔnggɔ do NWA Gale, nɛ wa aka a we ĩ ti linggamɛ 'da a. Nɛ nde wa kpá sɛ a gɔ, we kɛ a yu wa do'do.

⁷ Wa hã sape hã nwa, we kɛ wa kua obe ndumba kɛ wa a mɔ́ a gɔ. Na mɛ ni, nùi 'da wa ma kɔlɔ 'danga nɛ ia.

Oisraɛlɛ wa bi do Oyuda

⁸ NWA tɔ̃a na: “Nɛ dámá mɔtũlũ bolo tɛ Gibea do Rama. Nɛ nɛ hé hiamɔ bolo tɛ Betɛlɛ. Nɛ nɛ, onu kpala Bɛnzamɛ, nɛ hámá do owi sɛnɛ nɛ, wa tɛ ndi 'do nɛ.

⁹ Do ngba soe kɛ mi hã sɛ etumbui ni, nɛ nù Israɛlɛ ma 'danga sɛ vɛ̃. Kafi bina, we mi tɔ̃ ma hã Oisraɛlɛ ni, ma dɛ sɛ tɛ̃ ɛ ngboo.

¹⁰ “Ogã winɔ ngɔ nù Yuda, wa ɔ nɛ owinɔ kɛ wa tili li ngbala nùi 'da wa dɛ dati ni. Ma kɛ mi nɛ sulu dã 'da mi dɛ ngɔ wa ɔ nɛ fua lì ni.

¹¹ Oisraɛlɛ wa kpa zɛlɛ tɛ wena, nɛ wa tia li ngbangga. We kɛ sila wa ɔkɔlɔ wa, nɛ wa fa gala wi kɔ̃ owinɔ kɛ wa wè tɛ gala wa gɔ ni.

¹² Ma kɛ mi ɔ sɛ we Oisraɛlɛ nɛ hɛ̃a mɔ, kɛ ma nyɔngɔ dɛ dati fai ni. Nɛ mi ɔ sɛ we Oyuda nɛ dani, kɛ ma ɛ̃́ gɔ ni.

¹³ “Oisraɛlɛ wa zɔa zɛlɛ tɛ kɛ wa tɛ kpa nɛ ni, nɛ Oyuda wa zɔ tɛ mɛ 'bɔ dani 'da wa. Nɛ Oisraɛlɛ wa nɛa 'da gã nwa ngɔ nù Asiri na, a gbaka lo. Nɛ nde nwa ngɔ nù Asiri wè tɛ dɛ zɛlɛ tɛ wa, tabi a dani tɛ wa gɔ.

¹⁴ Mi nwa, mi bi sɛ Oisraɛlɛ do Oyuda, ɔ nɛ kɛ gbɔgbɔ bi do sa'de ni. Nɛ mi do tɛ mi, mi ɛ̃ sɛ sanga wa, nɛ mi la do wa, nɛ nde fo sɛ wi kala wa kɔ̃ mi bina.

¹⁵ “Mi la sɛ owinɔ 'da mi, nɛ tɛ wa ma zɛlɛ sɛ olo 'dã mɛnɔ wa dɛa ni gbaa na, wa kpolo tɛ wa we fa mi sɛ nɛ de. Kɔ wa te kɔ ngamɔ, nɛ wa fa sɛ mi.”