OZE 4 - WE NU GALE 1995

Gale 'bili ngbangga 'da owinɔ 'da a

¹ Aa nɛ, obe Israɛlɛ, NWA tɔ̃ ngbangga do owinɔ ngɔ nùi gɛ. Kɔ nɛ zélé we a tɔ̃ gɛ! A na: “Owinɔ ngɔ nùi gɛ, wa dɛ́ bɔlɔ zu dɛa mɔ gɔ, nɛ wa kɔ̃̀ 'bɔ gɛnɛ ngba wa gɔ. Fo wi kɛ a ĩ ti mi na, mi a Gale ni bina.

² Wa zonggo zu ngba wa. Wa vũ to tɛ ngba wa. Wa gbɛ wi, nɛ wa zũ mɔ, nɛ wa ɔ do wukonɔ 'da ngba wa. Na mɛ ni, ngɔ nùi dunu do 'dã mɔ, tati a gbɛ ngba wi do gbɛ ngba wi.

³ Ma kɛ ngangga ma yolo sɛ, nɛ ngɔ nùi ma kolo sɛ kparr, nɛ owinɔ ngɔ nɛ gɛ vɛ̃, mba do osa'de zamɛnɔ do onɔɛnɔ, wa fe sɛ. Nɛ gɛnɛ kɔ kɔyɔnɔ 'dɔ gba lì i, nɛ wa fe sɛ.”

Gale 'bili we 'da onganganɔ ngɔ nù Israɛlɛ

⁴ NWA tɔ̃a na: “Nɛ, owinɔ ngɔ nùi gɛ, do nɛ onganganɔ, dɔ wele dá ngbɛ ɛ gɔ, nɛ dɔ wele 'bílí we mɔ́ ngbɛ ɛ gɔ. Nɛ nde winɔ mi do ngbangga do wa ni, wi a nɛ, onganganɔ.

⁵ Nɛ kɔ sɛ zu nyanga nɛ do gba wese gɛ, ɔ nɛ wi ua li ni. Nɛ ongba nɛ, owi gba olo nu mi Gale, wa kɔ sɛ tɛ mɛ 'bɔ zu nyanga wa do tũ. Nɛ mi kumu sɛ nù Israɛlɛ kɛ ma kua nɛ ni.

⁶ Winɔ 'da mi wa fe sɛ, we kɛ wa ĩ̀ ti mi gɔ. Nɛ nɛ, onganganɔ, nɛ kɔ̃̀ 'bɔ gɛnɛ mi gɔ. Nɛ bɛ̃a mbulanɔ 'da mi, ma kɛ mi bɛ̃ sɛ tɛ mɛ 'bɔ gɛnɛ nɛ. Nɛ benɔ 'da nɛ wa sɛ 'bɔ a onganganɔ 'da mi gɔ.

⁷ “Aa nɛ, onganganɔ, 'da fala nɛ dɛlɛ dɛ dati, nɛ 'dã mɛnɔ 'da nɛ ma gã ta 'bɔ dɛ dati. Ma kɛ mi kifi sɛ dɔ́lɔ́ li 'da nɛ do sape.

⁸ Nɛ, onganganɔ, nɛ dɛ yangga 'dã mɛnɔ kɛ owinɔ 'da mi wa dɛ ni wena. Nɛ kɔ̃a na, owinɔ wa dɛ 'dã mɔ, sɛ a wa tɛa do dɔnggamɔ we fo ku'da 'dã mɔ zu wa, kɔ nɛ nyɔngɔ ma de.

⁹ Nɛ nde nɛ kpa sɛ kpo etumbui owinɔ wa nɛ kpa ma ni. Mi hã sɛ etumbu hã nɛ olo dɛa mɔ tɛ nɛ, nɛ mi bili sɛ nu gbã 'dã mɛnɔ nɛ dɛa ni hã nɛ.

¹⁰ Nɛ nyɔngɔ sɛ mɔ gbaa, nɛ nde zã nɛ hɛ̃́ sɛ gɔ. Nɛ dɛ sɛ ndumba we dɔnggɔ do ogale e kuli benɔ gbaa, nɛ nde nɛ kó sɛ obe olo nɛ gɔ. We kɛ nɛ bɛ̃a gɛnɛ mi NWA, nɛ nɛ nɛa 'do ogele galenɔ.”

Gale hã etumbu hã owi dɔnggɔ gale bɛlɛnɔ

¹¹ NWA tɔ̃a na: “Vĩ zu yɛli do ba dɔ̃ ma 'danga zu winɔ 'da mi do'do.

¹² Wa aka sɛa tenɔ, takɔ ma tɔ̃ we mɛnɔ kɛ ma nɛ dɛ sɛ tɛ̃ ɛ 'do gɛ ni hã wa. Nɛ wa aka be dɔ tenɔ na, ma tɔ̃ we mɛ wa wia we dɛ ma ni hã wa. Wa bɛ̃a gɛnɛ mi do'do, nɛ wa hã tɛ wa hã ogele galenɔ, ɔ nɛ wuko kɛ a hã tɛ̃ a we dɛ ndumba ni.

¹³ Wa kũ dɛ zu kalanɔ tɛ falanɔ kɛ wa dɔnggɔ do ogalenɔ ni, nɛ wa hã dɔnggamɛnɔ hã wa dɛ di ni. Wa dɔ fũ yɔmbɔnɔ 'da wa dɛ ti gã tenɔ tɛ zu be kalanɔ, we kɛ ti gɔ̃lɔ̃ tenɔ ni de tɛ wa wena. Nɛ we duzu mɛnɔ ni vɛ̃, ma kɛ oboko benɔ 'da wa do okondukanɔ 'da wa, wa yɛnggɛ vĩ zu yali ni.

¹⁴ Nɛ nde mi ha sɛ etumbu hã wa we ma gɔ. Mi hã sɛ etumbu hã nɛ, onganganɔ, we kɛ nɛ kala owuko ndumba dɛ tɛ nɛ, nɛ nɛ la do wa. Nɛ nɛ nyɔngɔ mɔ do wa dɛ fala sambala do ogale bɛlɛnɔ. Nɛ dɛa ɔ nɛ kɛ wa tɔ̃ na: ‘Winɔ kɛ wa lénggé mɔ gɔ, wa 'danga sɛ ni.’

¹⁵ “Aa nɛ, obe Israɛlɛ, nɛ dɛa ndumba. Nɛ nde dɔ Oyuda wa dɛ́ kpo 'dã mɛ ni gɔ. Nɛ tɛ nɛ we dɔnggɔ galenɔ tɛ Gilgalɛ i, tabi tɛ Bɛtɛ-Avɛnɛ gɔ. Nɛ nɛ tɛ zònggò tɛ nɛ do zu li mi nwa, wele kpasi i mɔ gɔ.

¹⁶ Zu nɛ obe Israɛlɛ nganda ɔ nɛ zu wili ngɔmbɔ ni. Ní a mi Gale, mi nɛ dɛ fala kã nɛ dɛ tɛ dia fala nyɔngɔ do mɔ, ɔ nɛ kɛ wele kã do obata ni nɛ nde?

¹⁷ Nɛ, Oisraɛlɛ, nɛ ba 'bia do okpikimanɔ. Kɔ mi nɛ la nɛ, hã nɛ dɛ́ ɔ nɛ kɛ nɛ kɔ̃a ni.

¹⁸ Nɛ nɔ nga dɔ̃ɛ 'da nɛ gbaa, nɛ nɛ dɛ ndumba. Onwanɔ 'da nɛ wa kɔ̃a kpa sape nɛa ngɔ ɔ do dĩ.

¹⁹ Owi sɛnɛ wa wa tɛ sɛ ɔ nɛ gba bũ kamba ni, nɛ wa kala wa la do wa, nɛ sape ma ba sɛ li wa we dɔnggamɛnɔ wa hã hã gele galenɔ ni.”