OZE 3 - WE NU GALE 1995

Oze kpula tɛ a 'da Gɔmɛrɛ

¹ NWA tɔ̃a hã mi na: “Aa Oze, mɔ zélé mi sɛ! Mɔ kpóló tɛ mɔ 'da wuke 'da mɔ, kɛ a dɛ ndumba do gele wili ni, nɛ mɔ kɔ̃ 'bɔ gɛnɛ a ɔ nɛ kɛ mi NWA, mi 'bana kɔ̃ do gɛnɛ obe Israɛlɛ ni. Gɛnɛ kɔ wa hã tɛ wa hã ogale bɛlɛnɔ, nɛ wa dɔnggɔ wa do mukate kɛ wa dɛa do wala vinɔ ni, nɛ nde mi bɛ gɛnɛ wa gɔ.”

² Na mɛ ni, nɛ mi Oze, mi kala mbili kilo 'bu ngɔ nɛ mɔlɔ, do saki ɔrzɛ gazɛlɛ, nɛ mi nɛ we gɔnɔ do wuke 'da mi.

³ Nɛ mi tɔ̃ hã a na: “Mɔ ɔ sɛ dɛ 'da mi gɛ 'do dɔa kɔ̃ tũ. Nɛ mɔ gbese sɛ zu mɔ, nɛ mɔ mbá sɛ ngɔ te do gele wili gɔ. Nɛ mi tɛ mɛ 'bɔ, mi mbá sɛ ngɔ te do mɔ gɔ.”

⁴ Ma dɛ sɛ tɛ̃ ɛ kpasaa na mɛ ni we obe Israɛlɛ. Nwa do ogã wi sɛ ngɔ wa bina 'do dɔa kɔ̃ tũ. Wa zɔlɔ sɛ mɔ dɔnggɔ do Gale, do ota santonɔ, do mɛnɔ kɛ ma santo we aka do NWA Gale ni.

⁵ 'Do nɛ, nɛ obe Israɛlɛ wa kpolo sɛ tɛ wa dɛ 'da nwa. Wa siki sɛ li wa dɛ 'da Gale 'da wa, do 'da nwa ngɔ wa, kɛ a a be zã Davidi ni. Nɛ wa yu sɛ kili NWA, nɛ wa kpa sɛ dia mɔ kɔ̃ a.