OZE 2 - WE NU GALE 1995

Gale a 'dafa sɛ nu Israɛlɛ dɛ olo nɛ

¹ Mbe tũ kpo, nɛ obe Israɛlɛ wa dɔ sɛ nɛ́ gbãlã kɛnzɛ nu gba lì ni, nɛ wele wé sɛ we tɔlɔ wa gɔ. Nɛ olo li kɛ Gale tɔ̃a zi hã wa na, wa 'bɔ a owinɔ 'da ɛ gɔ ni, nɛ a tɔ̃ sɛ hã wa na, wa a obenɔ 'da ɛ, Gale wele kpasi.

² Nɛ Oyuda do Oisraɛlɛ wa mba sɛ li ngba wa, nɛ wa saka sɛ wele kpo iko na, a dungu nwa ngɔ lo. Nɛ wa dunu sɛ ngɔ nùi 'da wa. Mɛ sɛ a gã ngba soe we duzu Yizreɛlɛ.

³ Nɛ nɛ, obe Israɛlɛ, nɛ sa li obulu nya nɛ na, “Owinɔ 'da Gale.” Nɛ nɛ sa li oboko nya nɛ na, “Owinɔ kɛ Gale kɔ̃a gɛnɛ wa.”

Israɛlɛ ɔ nɛ wuko ndumba

⁴ NWA tɔ̃a hã obe Israɛlɛ na: “Nɛ tɔ̃́ ngbangga do naa nɛ, we kɛ a 'bɔ a kɛnɛ mi gɔ, nɛ mi 'bɔ a wili a gɔ. Nɛ tɔ̃ hã a na, a lá fala dɛ ndumba, nɛ a hɔlɔ mɛnɔ kɛ a 'dafa do tɛ̃ a we yɛnggɛ ndumba ni.

⁵ Fala kɛ a là fala nɛ gɔ, nɛ mi e sɛ a do kũlĩ tɛ̃ a, nɛ́ kɛ wa kua zi do a ni. Mi dɛ sɛ na, a kolo kparr nɛ́ nù li go ni, nɛ a fe wɔ lì.

⁶ Mi kɔ̃́ gɛnɛ benɔ 'da a gɔ, we kɛ wa a obe ndumba.

⁷ Mba gɔ, naa wa dɛa mɔ sape, kɔ a ko do wa de. A tɔ̃a na: ‘Mi nɛ yu 'do Owi wilinɔ wa kɔ̃a mi ni. Wa a wa hã nyɔngɔmɔ do lì hã mi, nɛ wa a wa hã 'bɔ dia tulu, do nɔ yɔmbɔ, do dɔ̃ hã mi.’

⁸ “Nɛ nde mi nwa, mi kele sɛ wala ti a do nyaka gbakɔnda. Nɛ mi zĩ sɛ ngbo dɛ tɛ̃ a na, da dɛ kɔ a hɔ́ nza gɔ.

⁹ A fa sɛ we kpa ngba a do owili a zãa. A dɛ sɛ nganda wena we kpa wa, nɛ nde ma wé sɛ gɔ. A zɔ sɛ ní, nɛ a tɔ̃ na: ‘Mi nɛ kpolo tɛ mi 'da kuti wili mi, we kɛ mi zi i mɔ do yangga nɛa ngɔ kɛ mi do ma ngangga gɛ.’

¹⁰ Nɛ nde mi NWA, mi a mi hã kpalɛ, do dɔ̃, do nɔ gi do mɔ hã a. Nɛ mi hã 'bɔ fɛ̃a mɔ bolo, do mɔ mbali kɛ a dɔnggɔ do ogale Balanɔ ni hã a, nɛ nde a ĩ̀ ní gɔ.

¹¹ Ma kɛ do li zɔlɔ kala kpalɛ dɛ nza, nɛ mi kala sɛ ma kɔ̃ a do'do. Mi kala sɛ wala vinɔ 'da a, nɛ a sɛ do dɔ̃ bina. Nɛ mi hɔlɔ sɛ dia tulunɔ kɛ mi ia zi tɛ̃ a na, ma kele tɛ̃ a ni do'do.

¹² Mi hɔlɔ sɛ ma dɛ li owili a, nɛ nde wele kpo ámbá sɛ mi gɔ.

¹³ Mi dɛ sɛ na, yangga a dɛ do 'da fala ɛngganɔ ni, ma Sɔkpɔ. A dɛ́ sɛ 'bɔ yangga ɛngga mbé hɔa zɛkɛ, do ɛngga kɔ̃ tũ ɔmɔ tɛ wi, do ogele ɛngganɔ kpi do kpi ni gɔ.

¹⁴ Mi 'danga sɛ fɔ vinɔnɔ do fɔ figɛnɔ, kɛ a tɔ̃ na, owili ɛ wa hã ma hã ɛ ni kɔ̃ a do'do. Mi dɛ sɛ na, fɔnɔ 'da a ma kulu, nɛ osa'de zamɔ wa nyɔngɔ sɛ mɔ di ni.

¹⁵ Mi hã sɛ etumbu hã a, we duzu ɛngganɔ kɛ a dungu zi, nɛ a gbɛ sa'de we dɔnggɔ do gale Bala, do ogele gale bɛlɛnɔ ni. A hi'da zi 'bɔ pɛtɛ do oiyaka, nɛ a yu 'do ogele wili, nɛ tɛ zu a ele ngɔ mi Gale. Mi NWA, mi tɔ̃a ni.”

Gale a kɔ̃ sɛ 'bɔ gɛnɛ winɔ 'da a

¹⁶ NWA tɔ̃a na: “Mi la sɛ do a dɛ li go i, nɛ mi le sɛ ti sila a, nɛ a kɔ̃ sɛ 'bɔ gɛnɛ mi.

¹⁷ Mi gese sɛ fɔ vinɔnɔ 'da a hã a. Nɛ mi dɛ sɛ na, gbangɔlɔ̃ Akɔrɛ (gulu nɛ na: ‘Gbangɔlɔ̃ Ngamɔ’), ma hɔ li wala kpa do dia mɔ kɛ a gbini zã a do ma ni. Fala kɛ mi sa mɔ hã a, nɛ a kɔ̃ sɛ nu mi, ɔ nɛ kɛ a dɛ zi kɔ be zɔnga 'da a, do 'da fala a hɔa zi nza ngɔ nù Ezipeto ni.

¹⁸ Mi NWA, mi tɔ̃a na, do fala nɛ ni, nɛ a sa sɛ li mi na: ‘Wili mi’. Nɛ nde a tɔ̃́ sɛ 'bɔ na: ‘Mɔ Bala, mɔ a nwa 'da mi’ gɔ.

¹⁹ Nɛ mi é sɛ a na, a sa 'bɔ li Bala, tabi ogele gale bɛlɛnɔ gɔ.

²⁰ “Mi gba sɛ tɔkɔ do osa'de zamɔ, do onɔɛnɔ, do obe sa'denɔ ngɔ nùi gɛ na, da dɛ kɔ wa zɛ́lɛ́ tɛ owinɔ 'da mi gɔ. Nɛ mi fo sɛ 'bɔ omɔ bi bolonɔ kpi do kpi ɔ nɛ onzabele, do odu kɔya ngɔ nùi gɛ do'do. Nɛ mi dɛ sɛ na, owinɔ 'da mi wa kpa dungu fio.

²¹ Mɔ Israɛlɛ, mi ba sɛ mɔ do wuke 'da mi fai. Mi dɛ sɛ olo nu mi hã mɔ do wala olo nɛ ngboo, mi sɛ do mbɔkɔ li we mɔ, nɛ mi be sɛ dia zã hã mɔ.

²² Mi dɛ sɛ mbulu kɛ mi kpua hã mɔ ni, nɛ mi ba sɛ mɔ do wuke 'da mi fai. Na mɛ ni, nɛ mɔ kɔ̃ sɛ gɛnɛ mi na, mi a NWA.

²³ Do ngba soe ni, nɛ mi gese sɛ nu sambala 'da Yizreɛlɛ, winɔ 'da mi.

²⁴ Mi dɛ sɛ na kolo tɛ, nɛ nùi ma ko kpalɛ do wala tenɔ kɛ ma hã dɔ̃ do nɔ gi do mɔ ni.

²⁵ Mi gese sɛ owinɔ 'da mi dɛ ngɔ nùi ni, nɛ mi kɔ̃ sɛ 'bɔ gɛnɛ wa, kɛ mi ia zi li wa na Sɛnami ni. Nɛ mi tɔ̃ sɛ hã wa, kɛ mi sa zi li wa na Gelewi ni na: ‘Nɛ a owinɔ 'da mi’. Nɛ wa tɔ̃ sɛ na: ‘Mɔ a Gale 'da lɛ.’ ”