OZE 14 - WE NU GALE 1995

¹ “Mi Gale, mi hã sɛ etumbu hã owi Samaria, we kɛ wa dɛa nga zu dɛ tɛ mi. Owi sɛnɛ wa wa gbɛ sɛ wa li bolo, nɛ wa mbɔtɔ sanga obenɔ 'da wa, nɛ wa gba zã wi naa zãnɔ.”

Oze tɔ̃a ngbangga dɛ ngɔ Oisraɛlɛ

² Aa nɛ, obe Israɛlɛ, nɛ kpóló tɛ nɛ dɛ 'da NWA Gale 'da nɛ, we kɛ nɛ kɔa zu nyanga nɛ, nɛ nɛ tia we duzu 'dã mɛnɔ 'da nɛ.

³ Nɛ kpóló tɛ nɛ dɛ 'da NWA, nɛ nɛ tɔ̃ hã a na: “Mɔ a mɔ fo ku'da 'dã mɔ zu wele. Kɔ mɔ kɔ̃, nɛ mɔ zele sambala 'da lɛ.

⁴ Oasiri wa wè tɛ kpasa lɛ gɔ, nɛ ombalata bolonɔ wa wè tɛ gɔnɔ zu lɛ gɔ. Lɛ tɔ̃́ sɛ 'bɔ na, kpikimanɔ lɛ dolo wa ni a Gale 'da lɛ gɔ. We kɛ mɛ a mɔ kɛ lɛ dɛa do kɔ̃ lɛ iko. Nɛ nde mɔ nwa zu mɔ kpo, mɔ a mɔ be dia zã hã wi kɛ fo wele 'do a bina ni.”

NWA Gale kpua mbulu we hã mbé kpasi hã Oisraɛlɛ

⁵ NWA tɔ̃a na: “Mi kpasa sɛ Oisraɛlɛ, nɛ wa síkí sɛ 'bɔ 'do wa hã mi gɔ, nɛ mi kɔ̃ sɛ gɛnɛ wa do sila mi kpo, nɛ zã mi nɔ̃́lɔ̃́ sɛ 'bɔ dɛ tɛ wa gɔ.

⁶ Mi ɔ sɛ we Oisraɛlɛ nɛ kolo kɛ ma tɛ dɛ zu kpalɛnɔ ni. Wa ɔ sɛ nɛ dia fulɛlɛ kɛ ma bulu zala ɛ, tabi nɛ́ tenɔ ngɔ nù Libanɛ kɛ liã nɛ lia gbaa ti nùi ni.

⁷ Nu kpala wa ma gã sɛ dɛ dati ɔ nɛ te olivɛ kɛ mbé kunu nɛ hɔ tɛ nɛ fai, nɛ ma 'bɔ de wena ni. Wa ɔ sɛ nɛ tenɔ ngɔ nù Libanɛ, kɛ ma do, nɛ ma unu sirr ni.

⁸ Owinɔ 'da mi kɛ mi zɔ zi mɔ tɛ wa ni, wa kpolo sɛ tɛ wa dɛ 'da mi. Wa wa sɛ 'bɔ fɔ, nɛ ma ko sɛ kpalɛ wena, nɛ sako li wa ma yɛ'bɛ sɛ, ɔ nɛ sako li dia dɔ̃ ngɔ nù Libanɛ ni.

⁹ We mɔ Oisraɛlɛ sɛ tɛ kpikima bina, we kɛ mi a mi gese sɛ nu sambala 'da wa, nɛ mi zɔ mɔ tɛ wa. Mi ɔ nɛ te kɛ ma hã gɔ̃lɔ̃ hã wa fai ni, nɛ wi hã dia dungu hã wa, wi a mi zu mi kpo.”

Ndɔti lɛnggɛ

¹⁰ Winɔ kɛ wa do hã zã boe ni, wa ĩ sɛ ti gulu wenɔ kɔ 'buki gɛ, nɛ wa ba ma dɛ kɔ sila wa. Mba gɔ, wala 'da nwa ma a bɔlɔ, nɛ owi bɔlɔ zunɔ wa la do ma. Nɛ nde o'dã winɔ wa te sɛ dɛ li wala ni.