OZE 13 - WE NU GALE 1995

Gale a 'bili sɛ we 'da Oisraɛlɛ

¹ Zɛ́ dati, 'da fala owi nu kpala Efraimɛ wa wele we, nɛ kili ba winɔ vɛ̃. Owele wa dɔnggɔ zi wa ngɔ nù Israɛlɛ vɛ̃. Nɛ wa ndua dɔnggɔ gale Bala, nɛ wa tia do ngbangga, nɛ wa kpa fio.

² Nɛ nde wa 'bana tɛ dɛ 'dã mɔ fai. Wa dolo okpikima do fɛ̃a mɔ bolonɔ 'da wa, nɛ wa dɔnggɔ ma. Nɛ nde ĩ na, mɛ a mɔ kɛ wi dɛ to kɔ̃ wi a dolo ma iko. Nɛ wa tɔ̃ na: “Lɛ nɛ́, hã lɛ gbɛ́ sa'de we dɔnggɔ do kpikimanɔ.” Kɔdɛ kɛ wa wia we gbɛ wele, nɛ wa dɔnggɔ do kpikima ni nɛ nde?

³ Ma kɛ owinɔ ni wa mbiti sɛ ngɔ nùi gɛ do'do. Wa la sɛ nɛ́ mbɔɛ titole, tabi nɛ́ kɔa tɛ kpalɛ kɛ wa pɛpɛ, nɛ bũi ba ma la nɛ, tabi nɛ́ zɛ̃ we kɛ ma hɔ do gbogbo zu tɔa, nɛ ma la ni.

⁴ NWA tɔ̃a na: “Ndo do kɛ nɛ 'bana zi ngɔ nù Ezipeto ni, mi a NWA Gale 'da nɛ. Nɛ fo mbé gele Gale mɔ nɛ olo mi gɛ bina. Mi zu mi kpo a mi kpasa nɛ.

⁵ Nɛ 'da fala nɛ zi ngɔ nù kpangba li gba zɔ̃ i ni, nɛ mi a mi zɔa zi mɔ tɛ nɛ.

⁶ Nɛ nde 'da fala nɛ nɛa we le ngɔ dia nùi, nɛ nɛ nyɔngɔ mɔ, nɛ zã nɛ hɛ̃ ni, nɛ nɛ hɔa wi gã zu, nɛ ta zu nɛ ele ngɔ mi.

⁷ Ma kɛ mi bi sɛ nɛ ɔ nɛ gbɔgbɔ ni. Mi gu sɛ dɛ li wala olo nɛ ɔ nɛ gɔ̃̀ ni, we kala nɛ.

⁸ Mi bi sɛ nɛ do dã ɔ nɛ 'dã sa'de kɛ wa ba be 'da a olo a do'do ni. Nɛ mi ɛ̃ sɛ sanga wɔlɔ nɛ, ɔ nɛ naa gbɔgbɔ ɛ̃ do sanga sa'de ni.

⁹ “Nɛ, obe Israɛlɛ, nɛ kumu sɛ, we kɛ nɛ bɛ̃a gɛnɛ mi, wi gala nɛ.

¹⁰ Nwa 'da nɛ, do ogã wi ngɔ nɛ wa a do nde? Nɛ aka zi mi na, mi hã wa hã nɛ, kɔ ngangga gɛ wa gálá 'bɔ nɛ gɔ nde?

¹¹ Mi hã zi nwanɔ ni hã nɛ do nɔ̃lɔ̃ zã, nɛ mi fua 'bɔ wa kɔ nɛ do nɔ̃lɔ̃ zã.

¹² “Nɛ, Oisraɛlɛ, wa kɔmɔ 'dã mɛnɔ 'da nɛ li mbɛti, nɛ wa usu ma tɛ fala kɛ wele wè tɛ hɔ tɛ nɛ gɔ ni.

¹³ Nɛ ɔ nɛ yɔndɔ be, kɛ kula a to naa a, nɛ nde a kɔ̃̀ we hɔ nza gɔ ni.

¹⁴ Mi NWA, mi kpasa sɛ nɛ Oisraɛlɛ li ngawi 'da fio nde? Aa fio, mɔ kálá bolo 'da mɔ, nɛ mɔ tɛ́ nɛ. Mɔ bé ngawi 'da mɔ hã wa, nɛ mɔ kumu wa. Mi ĩ́ sɛ 'bako hã wa gɔ.

¹⁵ Aa nɛ, Oisraɛlɛ, nɛ kpa de mɔ wena, nɛ nɛ ɔ nɛ kpalɛ kɛ ma kua nɛa ngɔ gele kɛnɔ ni. Nɛ nde mi tombo sɛ bawe bũ, nɛ ma yolo li go i, nɛ ma ɔ̃sɔ̃ lì kɔ kɔ̃nɔ do zu lìnɔ 'da nɛ vɛ̃. Nɛ owi sɛnɛ nɛ wa tɛ sɛ we kala dia mɛnɔ 'da nɛ vɛ̃.”