OZE 12 - WE NU GALE 1995

Oisraɛlɛ do Oyuda wa kpa sɛ etumbu

¹ NWA tɔ̃a na: “Oisraɛlɛ wa tɛ ɔkɔlɔ mi, do 'bili bɛlɛ hã mi fai. Nɛ Oyuda wa 'bana tɛ dɛ nga zu dɛ tɛ mi kɛ mi a Gale santo ni.

² Nɛ mɛnɔ vɛ̃ kɛ Oisraɛlɛ wa dɛ ni, mɛ a mɔ kɔsa iko. Yolo do titole we hɔ gɛ̃a wese, ma ɔ nɛ wa ndaka 'do bũ iko ni. Nga zu do bɛlɛ ma gã kɔ wa wena. Wa dɛ na do Oasiri, nɛ wa be gole nɔ hã Oezipeto.”

³ NWA nɛ tɔ̃ ngbangga do Oyuda, nɛ a hã etumbu hã Oisraɛlɛ we dɛa mɔ tɛ wa. A nɛ bili nu gbã hã Oisraɛlɛ olo 'dã mɛnɔ kɛ wa dɛa ni.

⁴ Yaa wa Yakɔbɔ 'bana zi dɛ kɔ zã naa a i, nɛ a fa we nɛ ngɔ nya a Ezau. Nɛ 'da fala wa kua a, nɛ a gã ni, nɛ a bi do Gale.

⁵ A bi do anzɛ 'da Gale, nɛ a nɛ ngɔ a. Nɛ a ala nu a hã anzɛ ni na, a wele nu a tɛ̃ ɛ. Nɛ wa kpa ngba wa do Gale tɛ Betɛlɛ, nɛ Gale wele we hã a.

⁶ Do gbãlã we, wi zi a Gale ngɔ mɔ nyanga nza vɛ̃, wele kɛ lɛ sa li a na, NWA ni.

⁷ Ma kɛ nɛ obe zã Yakɔbɔ, nɛ kpóló tɛ nɛ dɛ 'da Gale 'da nɛ. Nɛ bé dia zã, nɛ nɛ dɛ́ bɔlɔ zu dɛa mɔ, nɛ nɛ gbíní zã nɛ do a Gale 'da nɛ.

Gale hã etumbu hã Oisraɛlɛ

⁸ NWA tɔ̃a na: “Nɛ, Oisraɛlɛ, nɛ ɔ nɛ Okanana ni. Nɛ we mɔ do 'dã kilo, nɛ nɛ dɛ yangga zũ mɔ kɔ̃ owinɔ.

⁹ Nɛ nɛ tɔ̃ na: ‘Lɛ dɛa gbaa, nɛ lɛ hɔa wi kpamɔ, nɛ nde lɛ dɛ̃ 'dã mɔ gɔ.’

¹⁰ Ma kɛ mi NWA, kɛ mi zi belee a Gale 'da nɛ yolo tɛ Ezipeto i ni, mi dɛ sɛ na, nɛ ɔ 'bɔ ti otande mbé nɛ, ɔ nɛ kɛ zi dati, 'da fala mi kpa zi do nɛ li gba zɔ̃ i ni.

¹¹ “Mi wila zi we hã owi gba olo nu mi, nɛ mi bia mɔ li wa do kɔ yalɛ wena. Nɛ owi gba olo nu mi ni, wa mbisa owinɔ 'da mi do wenɔ ni.

¹² Nɛ nde Oisraɛlɛ wa 'danga vɛ̃. Gɛnɛ kɔ owanɔ ngɔ nù Galadɛ, nɛ wa tɛ dɔnggɔ kpikimanɔ i mɔ ni. Nɛ owinɔ wa dɔ ongɔmbɔ we dɔnggɔ do gale bɛlɛnɔ tɛ Gilgalɛ. Nɛ nde gbagalanɔ 'da wa ma 'danga sɛ, nɛ ogili ta olo nɛ 'bana dɛ kɔ fɔnɔ.”

¹³ Yaa lɛ Yakɔbɔ yu zi dɛ ngɔ nù Mezopotami, nɛ a dɛa to zɔ mɔ tɛ nadalamɛnɔ 'da Labanɛ, takɔ a ba ko ti a.

¹⁴ 'Do nɛ, nɛ NWA tumba 'bɔ wi gba olo nu a kpo, takɔ a fo obe Israɛlɛ kɔ ngbá ngɔ nù Ezipeto i dɛ nza, nɛ a ɔ wi zɔ mɔ tɛ wa.

¹⁵ Nɛ nde obe Israɛlɛ wa hã dã hã NWA wena. Nɛ NWA a gese sɛ olo 'dã mɛnɔ 'da wa hã wa, nɛ a bili sɛ nu gbã sape wa hã hã a ni.